Pale Ni hi kannih Australia ahcun September thla ni 6nk ah
sunlawih a si. A ni le caan a nai pah cang caah, Pale Ni a tuanbia tawi cu, a
tawinak tein Online Cahrawl nih, tlawm tein, hlathlatnak a tuah.
America ram ah Pale Ni aa thok ning tuanbia tawi
Pale Ni an sunlawihnak a ni kong hi tuanbia pahnih in a um.
Mi cheu tam u nih an ti ning ahcun, a hmaisa bik Pale Ni cu 1910 kum June 19
ahhin Washington ramtthen ahhin tuah a rak si, tiah an pom. Cucu, Sonora Smart
Dodd timi nu sinin aa thok mi a si i, Sonora nih pale upatnak pek ding in
khuaruahnak ngeih hram aa thoknak cu 1909 kum Hringtu Nule Ni sunlawih ni i a
ngaih mi thawngttha chim thawng in a si. Pale zong nih teima tein fale a kan cawmken
ning kongkau a ruah tikah, nule lawng upat ttihzahnak pek an si mi kong ahhin a
lung a rak ttha lo.
Sonora pa hi mi menlo a rak si ve. A pa hi William Smart ti a
si i, Civil War lio ralkap zong a rak si. An nu he fa ruknak an rak ngeih lo
ahhin an nu nih vawlei nunnak in a rak dinh taak hna. An umnak Washington ahcun
a fale paruk cu amah lawng in lo hmete zohkhenh pah in a rak cawmken hna.
Sonora a si ah, a u le nau vialte an si ah, an pa nih a cawmken ning hna cungah
lunglawmhnak langhter nak caah, Sonora nih a ruah mi cu pale upat peknak ni hi
a um ve awk a si, ti hi a si. Sonora nih hin Pali Ni sunlawihnak cu June 5nk
ahhin ni le caan pek ding in saduhthahnak a rak ngei nain, khuakhan lairelnak
tlamtlin lo ruangah, June 3nk Zarhpini ah Pale Ni cu Spokane, Washington ah
sunlawih a rak a si.
Hmaisa bik Pale Ni sunlawihnak kong he pehtlai in a dang
tuanbia pakhat cu Fairmont, West Virginia lei in aa thok ve i, 1908 kum July
5nk ahhin rak thok a si. Lung meihol khur cawh lio i bom a puah ruang ah pa
lawngte 361 hi an rak thi. Hi lio ahhin, Grace Golden Clayton timi nih hin anmah sangveng Methodist biakinn hruaitu
pakhat cu a thi mi pa vialte upatnak peknak caah pumh khawmhnak tuah ding in a
rak nawl.
Cuticun, Pale Ni cu ram chung kipah mah le sangveng cio in
cozah theihpinak tel lem loin, rak sunlawih a si nain, caan rau lo ah ram chung
ni sunglawi pakhat ah sersiam ding in dirpi a hun si colh ve. William Jennings hi
biatak tein ttan a rak la mi le a rak cawlcang ve mi a si. 1924 kum ahhin, President
Calvin Coolidge nih Pale Ni cu ram chung ni sunglawi pakhat i sersiam dingah
duh ttanhnak a rak ngei nain, cozah lei in dirpinak a rak um lo.
1966 kum ahhin, Lyndon B. Johnson nih phung ning tein June
3nk Zarhpini ahhin Pale Ni sunlawih ding in a rak dirpi. Sihmanhsehlaw, Nixon
hruainak aa thok hnu, 1972 kum hnu ceo lawng ahhin Pale Ni hi biatak tein ram
chung ni sunglawi mi ni pakhat ah hngalh theih ve a si.
Leikilli Ah Pale Ni
Ram kip zong nih hin Pale Ni sunlawih ding cu an hun i cawn
cio ve. Ram cheukhat nih June 3 ni ah Pale Ni hi sunlawih ding in an zulh lio
ah, a cheu nih cun anmah cio tein ni le caan an i tuk ve. A tanglei ahhin zei
ram nih dah zeitik ni le caan ah Pale Ni hi an sunlawih timi cu langhter a si.
March 14– Iran
March 19– Bolivia, Honduras, Italy, Lichtenstein, Portugal,
Spain
May 8– South Korea
June a zarh khatnak– Lithuania
June a zarh hnihnak– Austria, Ecuador, Belgium
June a zarh thumnak– Antigua, Bahamas, Bangladesh, Bulgaria,
Canada, Chile, Columbia, Costa Rica, Cuba, Cyprus, Czech Republic, France,
Greece, Guyana, Hong Kong, India, Ireland, Jamaica, Japan, Malaysia, Malta,
Mauritius, Mexico, Netherlands, Pakistan, Panama, Paraguay, Peru, Philippines,
Puerto Rico, Saint Vincent, Singapore, Slovakia, South Africa, Sri Lanka,
Switzerland, Trinidad, Turkey, United Kingdom, Venezuela, Zimbabwe
June 17– El Salvador, Guatemala
June 23– Nicaragua, Poland, Uganda
July a zarh hnihnak– Uruguay
July zarh linak– Dominican Republic
Second Sunday in August– Brazil
August 8– Taiwan, China
August 24– Argentina
September a zarh khatnak– Australia, New Zealand
September thlapa thar aa sem ah– Nepal
October a zarh khatnak– Luxembourg
November a zarh hnihnak– Estonia, Finland, Norway, Sweden
December 5– Thailand
Pale Ni ahhin, thil le ri pakhat khat cung men i “Pale Ni”
tibantuk, “Kapa Kan Dawt” tibantuk a cuang mi cawk zau in na pa kha va pe hlah.
Hmurka in na chim ngam lo hmanh ah ca tein ttial ve law, na pa na dawtnak, na
pa cungah naa lawmhnak, le na pa na upat tihzahnak kha langhter in theihter.
Naa ngaichih lai lo.
