Kawlram ralkap hruainak ralchanh in, capo biatak in, Evan. Thawng Dun nih a rak chim chin bal tawn mi: "Kawl timi cu fir a si."
Nihin ni chun - Australia ram hna ahcun, lunglawm le zalong tein kan nun kan hman lio le kan tuah ttuan bon te kan pehzulh lio ah - Kawlram cu chunmui nih a tlunh ti awk in, ralkap nih hramhram in ram cu a hum tthan hoi ko. Democracy vawlei ah kan tlawng cuahmah ve cang kan ti lio ah, Kawl ralkap nih kan i ruahchannak vuikhat in an fir nolh - caan sau a nguh kho.
Ramthumnak um pawl nih Kawlram ramkhel kong ah i thlak tuk ti lo ding timi hi, a chimrel mi kan um tawn. Tutan bantuk caan ahhin ta, zeiti phun in dah kan lungthli in khua kan ruah cio hnga ti ka ruat ngai.
Kawlram cu peemtaak cang hmanh usih, zaamtaak cang hmanh usih, a dih donghnak in kan kaltaak tihi ho hmanh nih kan ti kho lai lo. Aruang cu kan chuahkehnak le laihri tannak a si pinah, philh lomi, duhdawt mi minung le cinken siaherh mi tampi kan ngei cio hna. Acheu kan caah, nulepa, pilepu, a cheu kan caah u le nau, chungkhar, cingla rualchan le hawikom, cun a cheu kan caah kan sangveng, kan dum le kan lo, kan Khrihfabu, cun le a cheu kan caah kan ram.
Philh lo ding minung le thil kan ngeih mi nih hin - Kawlram ramkhel dirhmun he naihniam in a kan chiah zungzal lai. Ram chung chawlehthalnak le zatlang nun boruak a ngan tikah, ram thumnak khuasa pawl hi pumpak in a kan hnursawn cio colh ve lai. Lung le thin lei in, khuaruahnak lei in le tangka chawva thazaang lei hrimhrim in, tubantuk in, thil sining aa pehtlai thluangthluan ahcun a kan tthihkheih ngai te lai.
Tehte pek khawh lomi 9 million deng mee nan fir ti ruangah, tubantuk in, ralkap nih, lakhruak ngai le saimahrang in khua an khan i thil an tuahnak zong cu a si. Lung cu a nuam hrim lo. Lailung khuasa kan taantaak mi zawnruah ko ahhin thin a phang, thin a har i lung a buai. Ramthumnak ummi kan ca zong ah, ralkap nih a tlaih thai ahcun, zatlong tein Kawlram ah tlunkal hna a har kho te men.
Ngapih le arti zong cawk an hauhnak, rian le khai zong cawk an hauhnak, nuhrin covo le zatlang zalonnak min an ngeih lonak Kawlram ah, ralkap nih duh paoh in a kan hruai tthan ahcun, a poi ngai ko lai.
Hi ruang ahhin Chin mi hi a bu in rianttuan kan thiam ngai a herh i a hau. Hi ruang ahhin Chin mi hi mi bochan le mi rinhchan siloin, mah le mah i bochan le i rinhchan kan thiam ngai a herh i a hau. Phun tibantuk le, khua tibantuk le pengtlang sawhsawh ttanh kan thiamnak nakin a ram ttanh zong kan thiam a herh i a hau. Ramkhel rian hi sual hmuh in kan hmuh lo ding le kan ttuanvo hmuh in kan hmuh i kan pom ding hi a herh i a hau. Mah khua, mah pengtlang, mah ca le mah holh, mah phun tibantuk in kan ttan tuk caah hin, ramkhel vawlei ah hnu kan khar tuk. A tuar cem tu kan si fawn.
2014 - 2016 kar i Kawlram ramchung milu relnak le zatlang boruak hlathlainak ahkhan: Kawlram chungah; a sifak bik mi Chin ram, fimthiamnak a niamnak bik zong Chin ram, a thih tuan bik mi zong Chin ram, sii-ai le thlopbilnak a tlamtling lo bik mi zong Chin ram, mei le ti tlamtling in a hmu kho lomi zong Chin ram. Zatlang zalam a chiat khaatnak bik zong Chin ram. Hibantuk kongkau pawl hi kan umnak mibu cio ah, a hlei in mino pawl sinah, kan hlathlai ding, kan kherhhlai ding le kan cawn ngaingai ding a si nain, caan tampi cu awngkua in kan lanh ter dih hna.
Ram sersiamnak tthannak timi hi ramleng ngun chawva in kan timh ahcun a fekfual kho lai lo. Kan i tlaihtleng mi le tinh mi a muru hi chan khat hnu chan khat in kan tthan ter a herh i a hau. Hi ahhin i peknak timi hi a vun biapi ngaingai. Thil pakhat khat kong ah i peknak kan ngeih khawhnak ding ahcun kan hngalhfian mi holh in biahram kan domh a hau.
Chin mi pawl sin biacah:
1. Kan holh le kan ca nun ter khawh i zuam usih
2. Kan tuanbia le sining-hlun philh loin tefa chan tiang zamh usih
3. A khua le pengtlang ttanhnak (tribalism) hi thlahthlam deuh hna usihlaw, ram ttanhnak (nationalism) thisa hi ngeih khawh i zuam ve hna usih.
