Rampi (Federal), Ramtthen (State) le Khua (Local) cozah pawl an rian le ttuanvo

Rampi Cozah (The Federal Government)

Rampi Cozah (The Federal silole Commonwealth Government) cu ram kongkau he pehtlai in ttuanvo tampi a ngei. Zeidah a rian le a ttuanvo a si timi cu tling tein Ausralia Phunghrampi (the Australian Constitution) ah chimrel an si.  Cu i a pical deuh in aa telmi hna cu runvennak (defence), ramdang he pehtlaihnak (foreign affairs), chawlehthalnak (trade), chawhrawlnak (commerce), ramchung tangka (currency), pemzaamnak (immigration), thil kuatnak (postal services), chawnhkhenhnak (telecommunications), thawngzamhnak (broadcasting), thlicung khualtlawnnak (air travel), cun mibu bawmhnak pawl (social services) le pengsen (pensions) pawl hi an si. Cu lawng si loin, Rampi Cozah hi hmun dang tampi zongah ttuanvo le rian aa hrawm i, a hlei in Ramtthen Cozah he naihniam ngai in rian a ttuan tawn. A biapi in ramchung ngandamnak (health), fimcawnnak (education), pawngkam humhimnak (environmental issues) le seh thilsernak lei ahhin tangka thazaang (funding) lei hin aa teltum lengmang ve tawn.

 

Ramtthen Cozah (State or Territory Government)

Australia Phungrhampi nih a nanh mi cu, Rampi Cozah caah rian le tuanvo ah chiah lomi paoh cu Ramtthen Cozah nih a tuah ttuan ding, a kilkawi ding le a bultawl dih ding hi a si. Sihmanhsehlaw, caan tampi ahcun an pahnih kawp in teltumnak an ngei tti tawn. Ramtthen Cozah a rian le khai, a pical deuh mi pawl hna cu, sianginn (school), siizung (hospitals), pawngkam Zohkhenhnak (conservation and environment), zalam (roads), tlanglawng lam (railways), lentecelhnak le nuamhheinak (sport and recreation), thil hmangtu Zohkhenhnak (consumer affairs), palik (police), thawnginn (prisons) le lakhruak Zohkhenhnak (emergency services) hna hi an si hna. Ramtthen pakhat cio nih hin anmah le sining hoih tein phunghrampi an ngeih i uk ningcang le dan an i ngeih hna.

 

Khua Cozah (Local Government)

Khua Cozah pawl hi hmun le hma sining hoih in siseh, khua le ram hmetngan sining hoih zong in an i dang cio. Khua Cozah rian le ttuanvo, a biapi deuh pawl cu kan thutdirnak le kan umkalnak lei he hin an i pehtlaih hna. Cu i aa telmi hna cu inn le lo saknak kong he pehtlai in phung le phai (building regulations and development), zatlang ngandamnak (public health), khua zalam (local roads) le minung kalnak (footpaths), lentecelhnak tual le certual pawl (parks and playing fields), cainn (libraries), khuachung pawngkam Zohkhenhnak (local environment issues), hnawm hlonhnak (waste disposal) le a dang mibu bawmhnak tampi (community services) pawl hna hi an si ve.

Zei cozah nih zeidah a tuah?

Zeibantuk cozah nih zeidah a kan tuah piak ti le an rian le ttuanvo theihhngalh hi a fawi thlu ve lo. Zapi-zaran caah cun Rampi Cozah (Federal Government) hi theihhngalh cem mi a si hnga nain, nitin in kan hman, kan tuah mi le kan zulh mi pawl hna hi, a tam u cu, Ramtthen Cozah (State Government) le Khua Cozah (Local Government) nih a tthithruai deuh mi an si hna.

 

Zeibantuk cozah hi dah zeibantuk rian le khai an ttuan timi fawi deuh in kan theihnak ding caah, a tanglei ahhin cakuang ka hun thil chih lai. Nifatin kan tuah mi thil ka tar hna lai i, zeibantuk cozah nih a zohkhenh le a kilkawi timi zong kap khat lei ah ka langhter chih lai.

Nifatin kan tuah mi thil	Zeibantuk cozah dah rian le khai a ngei
	Rampi Cozah (Federal Government)	Ramtthen Cozah (State Government)	Khua Cozah (Local Government)
Rian le sianginn ca takkhawlh timhtuahnak		• Ti, mei, gas, zuunput tibantuk pawl a kan pek
Zing thaithawh kan ei mi caah	• Tangka • Chawlehthalnak • Chawhralnak • Chawdawrnak tibantuk pawl a kan pek	• Thil hmangtu runvennak phungphai ser(consumer laws) • Dawr le rianttuannak he phetlai in phungphai ser	• Dawr chung zuarmi thil ngandamnak  runvennak caah chek le hlat nak tuah piak
Bus kan i cit mi	• Rampi zalam ca tangka thazaang pek	• Bus pawl • Bus citnak catlap pawl • Mi-pawih phungphai ser • Palik • Zalam sersiam • Zalam cung catar • Zalam ngunkhuai	• Khua zalam • Zalam catar (signs) • Bus dirnak (Bus stop)
Sianginn kainak caah	• Tangka thazaang Ramtthen Cozah sinah pek • Fimcawnnak sang sersiam	• Fimcawnnak Bu sersiam • Cawn ding ca he pehtlai in tangka thazaang peknak	• Khua chung mucu pawl le sianginn timhtuahnak cacawnnak
Cainn kalnak caah	• Rampi Cainn	• Ramtthen Cainn • Sianginn cainn • Khawngsil bawmhnak	• Khua chung cainn
Lentecelhnak kan ngeih mi	• Australian Institute of Sport • National sports bodies	• State sports centre • Khua khawngsil fund • Humhimnak, ngandamnak fimcawnnnak	• Khua chung lentelhnak tual le certual pawl
Hawi he phone chawnhnak caah	• Phone chawnhnak ding caah ttuanvo lak
TV kan zoh mi	• Thawngzamhnak lei he pehtlai in phungphai ser • ABC TV le Radio pek
Siibawi kan tok tik	• Medicare • Ramtthen fund • Rithaisii kilvennak	• Siizung • Ambulance services	• Mibu bawmhnak. e.g. harsa rawl danghnak
Inn kan lawinak ding caah		• Planning laws	• Local building controls • Trees and footpaths
Hnawm hlonh char piaknak	• International treaties and national environmental policies	• Hnawmh hlonhnak • Pollution controls	• Hnawm charnak • Local environment