Innṭhing by Van Ceu Lian
Hi biazai nih hin cinkennak hi innṭhing tiah au in, zeibantuk pawl hmuhtonnak he dah caan a rel timi hi, thluamthlam in a chimrel.
Innṭhing; keneh an i thleng, nehnang a tam,
Ṭial lomi cauk bantuk, nain, tuanbia tampi an i hlumnak.
Cinkennak caah riah-ruun, ruahnak caah len-ruun,
Chim lomi tuanbia bantuk, nain, nun hram aa semnak.
Innṭhing; a tling, a tling lomi nunnak tuanbia, a zawitu
Caan sinah leiba a ngei lo, nunnak sinah a ngei.
Riah-ruun sinak in hlawt a si hlan ahcun, dornak hmun.
Nunnak-ruun sinak in hlawt a si hlan ahcun, lennak hmun.
Hlawt a si hnu bal ahcun: zuun he a chaihma tawn.
Tuzan, hi innṭhing chungah ka nung:
Acheu bang in, riah-ruun a sinak in hlawt a tong,
Acheu bang in, nunnak-ruun a sinak in hlawt a tong,
Nain, ka cheu bang in hi ruun-ṭhing chungah kaa dup.
Vampang suimilam kutcangh thawng hmanh nih, fak ngai in
Ka khuaruahnak hna a hnawh, tlawmte in li a leng;
Nunnak-ruun ah ka sersiam kho hnga maw, hi inn-ṭhing.
