Pakhat nu sinah cakuat: nangmah le nangmah i daw
Minu, atu na dirhmun hi zei
taktak dah a lawh ka hngal lo. Zeithil na tuah mi paoh ah tlamtlinnak na hmu
kho men. Nun hi na caah a nuam mi a si kho men. Na hawi le kom he naa
pehtlaihnak zong a ṭha kho men. Ka hngal lo. Nain, cu bantuk i a ṭha mi dirhmun
ah na dir khawh ahcun kan lawmpi ve.
Biadang pi ah, minu, nun hi na
caah a har kho men. Na duh ning in thil a kal lo kho men. Na sianginn kainak
ah, na rianṭuannak ah, silole, nitin na umkalnak ah tlamtlinnak ngaingai na hmu
lo kho men. Na hawi le kom he naa pehtlaihnak zong, na duh ning in a ṭha lo kho
men. Lilleng le umhar zong in na um kho men. Thlavai kiang le mi vanhai zong in
na um kho men. Hmailei caah ruahchannak le zumhngamhnak zong na ngei ti lo kho
men. Ka hngal lo. Nain, cu bantuk dirhmun i na dir sual ahcun, ka umnak hmun in
kan rak tuarpi ve.
Vawlei nun hi khuaruahhar thil a
si hi na fian ve lai ka zumh ko. Ni le caan kalning zong hi kan duhning
ralchanh in a kal lengmang zong hi, na fian ve lai, ka zumh ko. Nun hi har le
sa in nunpi mi a si zong hi, naa fian ve tuk lai tihi ka hngalh ko.
Minu, na lungdongh ruangah, na
lungkuai ruangah, na ngaihchiat ruangah, naa ruahchan ning in nun a umkal lo
ruangah, lungrethei le um khua nuam loin na um tawn maw? Lungdaihnak taktak le
lung hnangam taktak an pe kho lo tu chikhat nuamhnak ah na pil sual maw? Hi
bantuk caan ahhin, minu, zu zong na ding kho, kuak zong na zu kho, night club
zong ah na kal kho, sii zong na tawng kho, silole thil pakhat khat na caah
rawhnak simi in hnemh naa zuam kho. Ka hngal ve lo. Nangmah le nangmah thazaang
naa pe kho, hawi sinin thazaang lak naa zuam kho cun, Pathian sin in i hrimnak
zong na kawl kho. Ka hngal lo. Nain, ka hngalh mi tu cu, na lungdonghnak, na
ngaihchiatnak, na lungkuainak, na lilennak sinin luat na duh caah, na tuah mi
an si ka fian.
Nang zong minung na si. Kei zong
minung ka si. Sinak le sining aa dang mi he a nung mi kan si zong ka fian. Na
thilton mi, na khuaruah mi, na intuar mi, naa ruahchan mi, naa lungthlitum mi
zei an si ka hngal dih lo! Nain, nu pakhat dirhmun na dirnak ah, na hmailei
caah khua cu na ruat bal hrimhrim lai ticu ka hngalh. Cu bantuk ruahnak na
ngeih ahcun, ralṭha in ngeih khawh i zuam ko. Lungdong lo le uai loin dirpi
khawh i zuam ko. Cu bantuk ruahnak na ngeih ti lo sual cun, minu, nun hi ṭih
hlah, tiah chimh kan duh!
Minu, thilttha zei ka ngeilo tiah
na ruat maw? Na ruah ahcun 'dawtnak' timi in na nun cawm. Lungdonghnak nih
chimpit vanang au in an chia maw? An chiah ahcun 'ruahchannak' timi in i thlim.
Vanchiatnak nih lungrethei in an chia maw? An chiah ahcun 'zumhnak' in i cawng.
Dawtnak timi cu a nunnem: Peknak nun an ngeihter lai i aa lawmmi ah an ser lai.
Ruahchannak timi cu rinhchanmi: Lungtthawnnak an pek lai i an dirhkamh lai.
Zumhnak timi cu bocahanmi: Cohlan nun an pek lai i an hmuhsak lai. Minu, hi
thilṭha hi pek kan si. Ziah nun na ṭih? I lak hna law nung cang ko tuah!
Muihnak chungah lawngkarang in, lungdi hmanh riamlo nun sivangh in nai hnur
ahcun, na nun khua afak tuk.
Ni nikhat ahcun, nupi dirhmun
zongah na dir te lai. Mibu pakhat nih, nu—nupi si ding mi nih cun, rawlchumh
zong a thiam hau an ti ko, khuasak tintuk lairel zong a thiam hau an ti ko, nu
le pa dawt zong a thiam a hau an ti ko, vale dawt le vale tang ah aa dor hau ti
zong an ti ko, dingrep tein ṭuanvo a tuahser khawh hau ti zong an ti ko. Nain, minu
na thinphang hlah! Hi vialte hi na ngeih dih hna lo hmanh, cawn khawhnak le
thiam khawhnak thilti khawhnak na ngei ko. Cun, minu, minung hi hohmanh a
tlamtling dih mi kan um lo.
An duhdaw taktak mi mipa nih cun,
na tlamtlin lonak hmuh le hngalh bu zongah an duhdawt ṭhiamṭhiam ko lai. An
tlaihchan ṭhiamṭhiam ko lai. An upat lai i an ṭihzah ṭhiamṭhiam ko lai. Cun,
minu, an duhdaw taktak mi mipa nih cun, zeipaoh, nan pahnih kar hnatlak in,
dawtnak le theihthiamnak he tunmer aa zuam lai. Hihi thei zungzal.
Dawtnak taktak timi cu, rawlchumh
zong a thiam cang mi sinak, khuasak tintuk lairelnak zong a thiam cang mi sinak,
chungkhar a dir khawhnak hnga caah a biapi mi ziaza ṭha vialte zong rak i ngeih
dih cang nak le zeipaoh ah tlamtling mi sinak ngeihnak te hna hi an si lem lo.
Hihi, dawtnak taktak aa semnak a si ti na ruah sual cun, na palh, ti chimh kan
duh. Dawtnak taktak cu, pakhat le pakhat, theihthiamnak le i upat ṭihzahnak le
tlaihchannak he, cawn duh ṭi, thiam duh ṭi le, thlen a herh ahcun thlen duh ṭinak
tu ahkhin—dawtnak taktak timi cu—a dir mi a si.
Minu, nungak no na si lio ahhin,
tlangval na herh. Asinain, na herh ning in na hmu lo kho men. Na lungdong hlah!
Minu, nungak no na si lio ahhin, lungkuai caan le lungrawh caan tam ko lai.
Asinain, na lungdong hlah! Tletle buabua in caan hman i tim bak hlah! Chikhat
lungkuai ruang, chikhat tlamtlin lo ruangah, na muihmai, na tungtai, le na takpum
sawksam i tim hlah! A ngaingai ti ahcun, na mi pum cu phaw pakhat bantuk men
lawng a si. Na thinlung le thlarau ca ruat chih zungzal. Nangmah le nangmah i
daw, cuticun, nu ṭhawng naa sersiam lai.
