“Par Uai”
A een ṭha, a par cu aa dawh
A rim ṭha, hmuinak he a thaw,
Siseh,
Zaanlei ninem tang bal ahcun, thlamdem tangah a uai.
Zing nichuah sinah, mitfang nih a bihzuun i,
Chun nilai cer ah, lung nih hnak kar ah a tenh,
Siseh,
A uai par cu ṭawh awk ṭha hnga maw?
Hi ‘par uai’,
Ka ṭawh lo ruangah thaizing ah, hngo ṭhan sehlaw ta?
Ka ṭawh ruangah thaizing ah, ṭil sual sehlaw ta?
Hi biahalnak sinah caan a liam.
‘Par uai’ ruah ah lung a uai,
Lung uai sinah ‘nun a buai’,
‘Nun buai’ sinah lunglawmhnak cahmai a tleek,
Kei zong ka uai ve.
