Fak ngai in a zaw mi, patung pahnih cu, sii-zung khan khat chungah an um ṭi. Pakhat deuh pa hi zaanlei fatin suimilam pakhat chung paoh hi cu, a cuap in ti a zawr khawhnak hnga ca ahhin, a ihkhun cung ahhin a ṭhut a hau tawn. Amah a ihnak te lawng hi, an umnak khan chung i thlalangawng ummi pawng te ah a si. A dang pakhat bal cu, nichiar-zaanchiar in a ih hmun in caan a rel ve tawn. An pahnih te cun anmah le anmah cu atu le tu in bia an vai ruah ṭheo. An nupi le kong hna, chungkhar kong hna, inn le lo kong hna, rian kong hna, ralkap an tlaknak kong te hna, le khuazeika hmun tibantuk hna ahkhin dah an kal bal cang kong nak te hna cu an i ceih pah lengmang.
Pakhat pa hi, zaanlei chiar, a ihnak cung i a to khawh caan paoh ahhin, a hawipa ca ahhin a lenglei ah zeidah a cang ti khi a hei chimrel lengmang tawn, i cuti te cun a hawipa cu caan a relpi tawn.
A keng le ihkhun aa benh ve mi pa zong cu, cu a hawipa nih suimilam pakhat chung a chimrel mi a ngaihnak thawng te cun, khualeng ah zeidah a cang, ti cu a hngalh khawh ve i, cu nih a nun zong a nuamhter deuh ve i a kauhter deuh ve.
Thlalangawng in a hei lang mi cu: dai siamsiam tein le dawh sup in a tleu mi tidil. Cu tidil cung ahcun cawmpei le varang hna cu nuam chialmal khin an leng, i ngakchia rual nih cun an lentecelhnak tilawng cu heh tiah an vahter ve. Mah cun, ngaknu tlangval no tete, duhdaw ngai in khin, an ban le ban hrenh in, pangpar dawhdawh hna le khuapi velchum dawhnak lak ahcun duhdawtnak biaza an phai ve hna.
Hi vialte hi, thlalangawng pawng i a ummi mipa nih, dikthliar ngai in a hei chimrel tik hna ah, a hawipa nih cun a mit cu aa chim i, cu a chim mi vialte cu a mitthlam khin heh tiah a cuan len ve tawn.
Nikhat cu, lum ngai in a ceu mi zaanlei ninem tang ahcun, thlalangawng pawng ummi pa nih cun, mibu hna lamcung i heh tiah nuam ngai in ringawn he an tur-khawng kong cu a hei chimh.
Ihkhun cung i it mi pa nih cun aw le aan zong a thei na loin, a zukthlam khi a hei hmuh khawh. A ruahnak-mit chung ahkhin, thlalangawng pawng i a ummi pa bia nih cun hmanthlak phunkhip khi a hei suai.
Cuticun, ni le caan an liam. Ni in zarh an hung liam.
Zingkhat cu, sii-sayama pakhat, mizaw pahnih takkhawlhnak ti cu i put in, khan ahcun a rak lut. Asinain, thlalangawng pawng i a it tawn mi mipa cu a ihkhun cungah dai zirziar tein, a ihnak in a thih-lanh cu a hun hmuhtheih. Ngaihchia ngai in sii-inn tawlreltu cu a hei auh hna i, mipa cu pum cu an hun lak.
A hun i remcang sin khin, mipa pakhat nih cun sii-sayama te cu thlalangawng pawng ihkhun ahcun ṭhial ding in a hal hna. Sii-sayama nih cun al lo tein a ṭhial i, zeipaoh aa remcang dih ko cang a ti hnu ahkhin, mipa cu a hei kal taak.
Mipa cu, duhsah hnguamsam nawn khin, le, celh lo ngai in khin, a kio cun a hun i domh i, khualeng hei cuanh awk ahcun a ihkhun cung cun a hun a to.
Thlalangawng cu duhsah nawn te cun, a ihkhun cung cun a hei bih ve.
Cu thlalangawg in a hei hmuh mi cu vampang lawng a si. Mipa nih cun, sii-sayama pakhat cu, a tleicia a hawipa kha zeiko nih dah cu bantuk thil dawhdawh le ngaih nuam pawl kong cu a chimter khawh tiah a hal hna.
Sii-sayama nu nih cun, "Mipa kha a mitcaw mi a si i, khua zong a hmuh ṭung lo," tiah mipa cu a hei chimh.
"Thazaang pek an duh i a si kho men," a hei ti nolh.
