1. Pathian
Pathian cu zeizong vialte sertu a si: minung, fimnak,
thiamnak, hngalhnak, thiltikhawhnak, thil le ri, tisa in tlang saram vialte – a
kan sertu a si. Nunnak pe tu a si. A hramthok le a donghnak a si. Ahlei in
minung nih hin Pathian hi kan herh. Minung kan nunnak ahhin Pathian hi a biapi
tuk. Zeicatiah cun, taksa, lung le thin le thlarau leiah thazaang kan hmuhnak,
lam kan hmuhnak le ruahchannak kan hmuhnak a si, kan zumhnak thawng in.
2. Dawtnak
Pathian hi zeizong vialte hi a ser hna i a hlei in minung hi
dawtnak he a kan sersiam. Dawtnak cu sersiamtu a si. Minung kan nunnak ahhin
dawtnak hi a biapi tuk. Dawtnak a um ahcun daihnak a leng, dawtnak a umnak
ahcun lawmhnak a leng, dawtnak a umnak ahcun nun khua a nuam. Cucu, nunnak caah
a sunglawi cemmi an si.
3. Innchungkhar
Innchungkhar hi a biapi tuk ve. Kan hlawhtlinnak le kan harsatnak
aa hrawm mi kan si. Minung pumkhat lawng si loin, minung pakhat pum tampi a
ngeimi bantuk a si. Innchungkhar ttha ngeih hi minung nunnak ah a biapi tuk mi
a si. Khua kan ruahning cang, thil kan tuah ningcang, le vawlei kan hmuhning te
hna hi kan innchungkhar dirhmun le sining nih biatak tein a hruaimi an si ve
hna. Cucaah, innchungkhar hi a biapi tuk.
4. Ngandamnak
Chikhat pawfah le lufah hmanh kan celh lo. Kan kutpi le
kutdong innka hna nih a kan rial sual hmanh ah, dukduk in kan pum dihlak tiang
in fahnak nih a kan durh tawn. Cancer bantuk zawtnak ngangan kan ngeih tikah
zeitlukindah lungre a theih i van a san? Ngandam loin kan um tikah kan duhmi le
kan saduhthahmi he kan i hlat tawn…cucaah, ngandamnak hi a biapi tuk.
5. Ringawn
Minung kan nunnak ahhin kan hman cemmi hi ‘bia le hla’ hi an
si. Hla ttha, hla sullam ngei le hla nem nih zeitlukindah nunnak hi a kilkawi?
Umharnak, lilennak, thlavai kiannak teipiaktu a sit awn. Mikip nih an i teltum
khawh cio mi zong a si. Minung kan sinak ah langhsar kan duhmi thil hi a tampi
tawn. Cucu, ringawn nih lamkaupi a awn piak i tuanbia ttha ah a ser tawn hna…
6. Hawikom
Hawikom ttha cu sui le ngun nakin an sung deuh, ti a si tawn.
Cucu, thil dik ngai a si. Minung nih hin kan i bochan cemmi hna hi hawikom an
si ttheo tawn. Kan tlaihchan cem mi hna hi hawikom an si ttheo tawn, kan dawt
cem mi hna hi hawikom an si ttheo tawn…hawi ttha ngeih hi zeitlukindah a biapit
mu, a nep te lo.
7. Ti le Rawl
Ei le din thazaang ca ti a si tawn. Tirawl ttha ngandamnak
ttha bik ti zong a si tawn. Nunnak caah ei le din ti zong a si tawn. Ti le rawl
hi minung nunnak ah a biapi bikmi an si ve. Na eidin mi ti le rawl a that lo
ahcun, ngandam lonak a chuak lai, ngandamnak lonak nih tuan kawl khawh lonak a
chuahpi lai, tuan kawl khawh lonak nih lungretheihnak a chuah pi lai,
retheihnak aa khang. Cucaah, ti le rawl hi an biapi tuk.
8. Lawmhnak/nuamhnak
Minung kan hngar tawn mi minung hi aa lawmhnak/nuamhnak hi a
si ttheo tawn. Aa lawmmi minung nunnak, chungkhar nunnak le khua sining hna hi
kan hngar hna, kan phai len tawn hna i kan ceih len tawn hna. Ho paoh nih
duhdim daidam tein i lawmh/nuamh cu kan duh dih cio, i cucu nunnak ah ahar bik
cem zong a si, i a biapi tuk mi zong a si ve.
9. Nu le Pa
Hringtu nu le pa hi an biapi tuk. Sertu an si ve. Dawtnak a
kan pe tu, huatnak a kan pe tu, thil ttha a kan pe tu, thil chia a kan pe tu, min ttha a kan pe tu, min chia a
kan pe tu an si. Minung kan nunnak ahhin nu le pa ttha ngeih hi nunnak rosung
bik a si ve.
10. Fimthiamnak
Fimnak le hngalhthiamnak kha duh hna, kawl hna law na lungtlap
in hlaw hna hlah, tiah Bible zong nih a kan cawnpiak tawn, i, nihin ni
chantiluan zoh in dawi ahcun fimthiamnak sang hi zeitluk indah a biapit! Ram
ttha an si, ram fimthiam an si, kan ti tawn. Fimthiamnak hi minung nunnak a
thlengtu le a sersiamtu a si ve.
