"Ralchia Thinlung"
Minu ka duhnak Zingnu nih a hngalh,
Kei zong nih ka thup kho ve lo:
Minu ka duh, nain ka phuang lo.
Minu ka uarnak pawngkam hawi nih an hngalh,
Ka lung nih a uam zia thiam ve lo:
Minu ka uar, nain ka phuang lo.
Minu ka dawtnak ho nih an hngal lo,
Nain, kei nih cun tling tein ka hngalh,
Nain, ka phuang lo, ka langhter lo, ka tuahser lo;
Minu ka ngeih lo caah, ka tuar ṭheo tawn.
Chungsivang in Tum Tling ka hawl tawn:
“Ziah, dawtnak ramri ah lam kan i pialkan?”
Hi biahalnak, zaanṭim hawikom, cun muihnak biathli.
Meithal kuan bang vai mi mit nih minu a hlam tik le,
Tleilo semmawng bang zuun he chaihma mi thinlung nih minu a
hlam tik ah,
Ruahnak cu ka ral; lilen caan lawn in nun hri a buai.
Minu ka duhdawtnak phuan dingah ‘hmur le ka’ a cawl lo tik
le,
Minu ka tlaihchannak fianh dingah aw le aan a pau lo tik ah,
Ka lung lila nih keimah a ka durh, bia he naihniam lo fahnak
an por:
Ka tuar…
Zeiruang i minu ka duhdawt ka phuan ngam lonak kong,
Ho nih chimhfian loin keimah lila nih ka hngalhfian:
Duhnak mitcaw nih a hruaimi thinlung ralchia ngeitu ka si.
