My First Love

"My First Love" 

Photo Credit: Shortday

Panh sialmal tein, dawhnak ci he a khat mi, iang ngei duh nung khun, mirh mithmai he khin, a hawile pahnih he bak, ka hmailei cun an ra thluahmah ko. A hmaifang ka hun zoh chung paoh cu ka lau nawn, i ka lungtur zong a rang bak ve. An bia a thaw ngai ṭheo lai. An i nuam ngaingai, i an ni pah len. Zei kong an chim bal ka thei lo. Nain, cuti an i nuamhnak nih cun a mithmai a tlanter khun, aa dawh bak. Anih nih a ka hmuh ve le hmuh ve lo cu ka hngal lo nain, vuikhat te cu kan mit aa tong, i kei nih cun mit ṭhep lo te bak in ka zoh. Cu caan ahcun, kei nih cun a vuikhat ka hmuhnak in ka duh colh ti cu chim hau loin ka lung in ka hngalh. 

Zaanlei sianginn chuah sin khin a hnulei te tal i, i thlai ve awkah, hnoksum takin--hngarhte run ṭio bang a ṭio mi--mi lak ahcun namhnawh ngai in kaa tenh chih len. "Ka kian ta u, ka kian ta u!" ka ti pah cun khulrang ngai in sianginn luhchuahnak kutka lei cu ka hei fuh thluahmah ve. Ka hmu ti lai lo ti le ka phang, hei hmu kho ṭhan hmanh ning law zeidah ka tuah lai timi ka ruah ah le ka thinpang thotho. Duhnak hi, hi bantuk phun hin ka ton lai tihi ka ruat bal lo. Duh ko nain chim le phuan ngam lo, naih ngam lo le ton ngam lo. Cu bantuk chunglei intuarnak he thin hlau in ka um lio ahcun ka fianmi pakhat a um: hrapkhat duhnak nih a ukmi thinlung nih a ukmi ka si. 

Minu cu sianginn luhchuahnak kutka hram bak ahkhin amah te lawngin a kal cu ka hei hmuh khawh. Ka hei hmuh sin khin chikhat lo ah khulrang in ka kal ning cu ka hun nuarh, i duhsah nuarsam nawn khin a hnulei te cun dai tein ka hei zulh ve. Akal a nuarh pah caah zokzok in ka kal thluangthluan ahcun ka lanhtaak ding a si, cucaah duhsah tein kal kaa hne ve. Hawi a ngei lengmang nain, hi zaanlei thengmang i amah lawng in a ṭin ve hi zeiruang ah a si ka hngal lo. Nain, hi caan ahhin cun 'ziah amah lawngin a si hnga' timi ruahnak cu kaa buaipi mi a si ve lo. "Ti ko, ti ko," timi khi ka lung ah a tur in a hung tur i, cu nih cun thinpang in a ka chiah. "Ti ko," ti tikah, hei chawn ko, hei tong ko, hei fuh ko ka ti duhnak. Nain, vun 'ti ko' ding ahcun ka ngamh ve lo caah dai te tuin--a hnulei cun--ka zulh thluangthluan. 

Sianginn kan hun lonh hnu zong ahkhin kan zulhmi lamthluan cu aa khat ve rih hoi. Khin cun, ka lau chinchin cang. Kan inn lam aa khat ko cang hih, vanṭhat si ti phun khin ka lung cun kaa nuam dom. Sau nawn in kan vun kal hnu ahkhin zapi he kan i hlat deuh hoi, i kanmah pahnih lawng lam khat kan hun zulh ṭi caan zong cu a hung phan hoi. Ka lungtur a rang ko cang. Kei hi 'lamphok' ka uar ngai caah zalam cung in ka kal bal theng lo. Zeiruang ahdah hi zaanlei theng ahhin 'lamphok' in a kal ve zong cu ka hngal lo. Nain, hi caan ahhin cun cu ruahnak cu kaa rak buaipi lo hrim. Abi ngai mi lam a si nain chak le thlang dual tlang i an cin mi pangpar nih dawh sup in a ṭamhmoih mi 'lamphok' cung ahcun i chawnbia lem loin, hrapkhat duhnak ruangah hnu le hmai in kan i tlang. 

Kan pahnih lawng kan si lio ahhin caanṭha vun la ning ka vun ti ahkhin, ka ngamh deuh hoi lo. Ka lungtur lawng a rang chin lengmang. "Ti ko, pasal!" timi chunglei aunak aw nih le dai loin ka lung ah a um tur ve hoi. Cu hlei ah, din loin kan kal ve bantukin, zapi umkalnak zalam cu tlawmpal lo ah kan hei chuah hnawh ding a si hoi. Cun le, zalam kan phanh hnu ahkhin cun ka chawnhbiak ngam ti lo ding, ka zulh ngam ti lo ding le i tonnak caanṭha kan ngeih ti lo ding cu cu zakhat ah zakhat in ka fian. 

Um thiam lo ngai khin; ningzah phun, thinphan phun, cun i ngaih ngai ṭung i ngaihlah pah phun te he khin, ka lungthli in ka uar ziarziar mi minu te cu, a hnulei cun 'hei chawnhbiak' ding cun duhsah nawn te khin ka hun fuh. 

Cuti duhsah te i ka hun fuhpanh lio i ka ruahmi cu hihi a si: "Zeidah ka chim lai?". Cu ruahnak he awlokchong ngai in ka um lio ahcun ruahlo pi bakin ruahpi a hung sur ko. Ni thawng kaa ken ti lo. Ka tlik zokzok lo ahcun a cin dih ding ka si cang. Ruah nih le chikhat lo te ahcun a hun tuk colh ve hoi. Nain ka tli lo. Cin ko ning ka ti. "Thaizing ah hi bantuk caanṭha um ti lo sual ah ta?" tiah keimah le keimah, ka lungthli in kaa hal len lio ahcun, kaa ruahchan lem lomi awaan, ka vuikhat hmuhnak in ka duhmi minu sinin ka hun don, "Ra ve hih! Rak i zawh ve. Na cin dih lai khah!" tiah ka hna caah nemnak in a khatmi aw nem nih cun, 'sursur' in a tlami ruahti dor lak ahcun, ka hnakhaw cu a hun vih. Ka lau ngai. Ningzahnak, i lawmhnak, i nuamhnak le i lunghmuihnak cu ka chung ah a hlok in an i hlok. Chikhat cu ka ar nawn. 

"Naa rak zawh ve lai lo ma?" a hun ka ti ṭhan. Zeipi khi a si lomi te a lo nain, a chung in a rak tuartu kei ka caah cun a nuam taktak khi a si. Amak lawlaw. Ka chung khi a lin hnik bantuk khin lawmhnak in ka khat. A phil in ka phil lo lawng khi a si. Zokzok in ka hei fuh. 

"Keimah nih nithawng cu ka tlaih lai," tiah ka hun hal pah ahkhin nithawng ko ka tlai lai ka ti nak ahcun a kut cu ka hun tawngh sual. Akik ngai. Akihnak nih hlah maw a ka durh ti awk khin le ruah lo pi khin 'dat' nih hlah maw a ka leih ti awk bantuk khin, ka lau, ka thlingza i ka hiar dih. 

Ka mit bak ah a hun ka hun zoh pah khin, "Poi lo, keimah nih ka tlaih ko lai," a ka ti ve, awnem tein.

Kan mit aa ton sin ahkhin, cu taksa i tawngh ruang te i launak, thlingzatnak le hiarnak vialte cu a hun ṭhawng chinchin. 

"Ka tlaih ko lai," ka ti chih ve i, a nepnap ahcun a ka tlaihter lawlaw. Hi caan te hi, zeitik hmanh ah, ka nun chung cu ka philh lo dingmi caan tawite ah a hun cang ve: 

Ka lungthli in, ka vuikhat hmuhnak in ka uar mi minu he kan vuikhat tonnak in, aa duhdaw ngaimi ngaknu tlangval bang, pangpar phunphun nih an but mi lambi te cung i, siamsiam ruahpi sur lakah nithawng kan hun i zawnh ṭi lio caan, ka caah rosung tuanbia a si ve. 

"Na min zeitin an in auh?" tiah a hun ka hal. 

Lau nawn khin, "AWW, AW, Sangpi." tiah ka hei leh ve. 

"Aw si ma? Kei cu Dawtku ka si," a hun ka ti colh. Nain a min fak bal a ka chim lo. Ka min fak ka chimh ve lo caah ma si hnga zeidek, ka hngal ve lo. Nain, Laimi rengreng hi min kan i hal ah minfak chim kan hmang tuk cio rua lo dah ka ti. 

Zeitiawk hngalh lo ah, "Kaa lawm," ka hei ti. 

Lau nawn khin, pum rilrial a mit te cu a hun i rengh i, "Zeicaah?" tiah aka hun hal. 

"Na nithawng na ka zawnh ve caah," tiah biatlang hmanh tling huaha lo khin, zakzum ngai cun ka hei leh ve. 

"Mah tham hna cu, poi lo, ngah ko," a ka ti colh ve. 

"Nangmah lawng khoi ah na kal hnik? Na ṭin lei ma si?" tiah ka hei hal ṭhan. 

"Si lo. Tuition ka kai lai ka ti." 

"Aw." 

Mah hnu ahcun kan sianginn kainak kong le kan umnak kong tlawmpal kan ceih. Kan cataang aa khat nain kan khan aa dang. Kan umnak sang cu aa khat na loin, a tuition kainak lam le ka umkalnak lam cu aa khat. Kei tu hi a tuition kainak in lam hla deuh ah ka va um. Nain, tuition a kainak he cun kan i naih pah ko, naihtuk cu a si lo nain, a za ko. 

Cuti nuam ngai le i lungsi ngai in nithawng tang i kan i dor lio ahcun, zalam cu ka mit khin ka hei hmuh khawh pah cang. Cu nih cun a ka lauter colh. Ka thinphan a zual i ka hit dih hnik. Ka lungduhnak hmanh ka chim manh lai lo ding cu ka phang tuk ve cang. Ka hnakaw cu a tu le a tu kaa tawngh. Vun 'ti lawlaw' ding ah le ka ngamh deuh lo, 'ti lawlaw' lo ah le hi bantuk caanṭha ka hmuh khawh ti lai le hmuh khawh ti lai lo ding ka hngal lo. 

"Ka lung ka zul lai," tiah keimah le keimah kaa chim. Nain, ka tei khawh lomi cu ka 'Ruahnak' ṭheo a si. Ka duhnak hi phuang ning law zeitin a ka leh lai, zeitin a ka hmuh lai, i zeitin a ka ruah lai ti ka ruah ahkhin awlokchong in ka um. Ka zun hna chuak hnik bantuk khin ka um. Phuan lo ah le kaa ngaichih lai i umnak hngal loin ka um lai ti khi ka hngalh hoi. 

Ti awk theih lo ah, 'turtur' in ruah nih a tlak mi nithawng tang ahcun, anih caah ruah lo pi si nain, kei ka caah timh ciammam te i lungthli bia phuannak ka ti hnga maw, " Dawtku, kan uar." ka hei ti. Keimah lila zong khi ka lau. Dawtku chinchin cu--zeiko dah a ruah hnga le a tuar hnga ti hngalh khi ka duh ngaingai. Nain, zeihmanh a ka let lo. Kaa khat te hmanh a ka let lo. Mah hnu cun a dai bak. A zoh zong a ka zoh ti lo. A suimilam khi vuikhat in a hei zoh. Cucaah, ka thinphang colh ve. 

Hi caan ahhin ka lung le ruahnak nih thil an ka chimh veve mi a um: Ka lung nih cun, "Si ko cang hih!" a ti lio ah; ka ruahnak nih cun, "Zeidah cang lai?" ti khi a hun ka ruahter ve. Cu hlei ah, Dawtku sinin kaa khat hmanh lehnak ka ton lomi ko nih awlokchong in a ka umter. 

"Dawtku, na caah ruahlo tuk thil a si ka theih ko, nain na ka leh hau lo. Keimah pumpak lungum ka hei chim mi a si. Na zei poi duh hlah." ka hun ti pah khin, a nithawng cu ka pek i tlik dingah kaa tim.

"I zawh rih ko. Na cin lai." tiah a hun ka ti. 

Ka ningzak ziar. 

"Tuition ka kai pah lai ka ti i, na inn lam pei si ve ko cu. I zawh rih ko. Naa zawh ve lo ahcun keimah lawng in dahkaw ka kal ve lai cu." tiah a hun ka ti colh ve. 

Cu a bialehnak cu a ṭhat khawh chung ṭha in, keimah le keimah caah, kaa ruah piak. Ka lungthli cun, "Yes! Yes! Yes!" ka hun i ti len sek. "Ruahlo tuk piin kan uar kan ti le pei, ka ningzak ve cu," ka hei ti ve. 

Cu ahcun, "Sangpi, duhnak hi zeisat te ko khi hen a si, i zeiruang ahdah keimah theng cu na ka duh?" tiah a ka hal. 

A bia cu, ka lung in ka tuarnak vialte le a chung in ka intuar mi vialte cu hmuh sehlaw fawi tein leh khawh mi si hnga. Hi chunglei in intuarmi vialte hi bia in hun fianh ding a si caah, chikhat cu ka ar nawn. 

"Ka thei ve lo a," ka hei ti. 

Ṭhep lo tein a hun ka zoh. 

"Nain, kan hmuh le cang ka bakin ka lungtur a rang, ka lau, kaa nuam, i nangmah he i chawnhbiak le i naihniam hi ka duh colh. Ka mit ah hawi hlei in naa dawh. Ka lung in khin nangmah hi ka caah na si timi ruahnak khi ka ngei, i 'ti ko, ti ko' timi khi chunglei in fialtu ka ngei. Na ti lo ahcun naa ngaihchih lai timi ruahnak khi ka ngei. Fawi le bai ah kan philh kho lai lo timi ruahnak khi ka ngei. Hi thil, khi thil le cu thil khi tuah ṭi usih, ei ṭi usih, ding ṭi usih timi duhnak khi ka ngei. Hi hmun, khi hmun le cu hmun timi ahkhin leng ṭi usih, kal ṭi usih law hmu ṭi usih timi duhnak khi lung ah a um. Na pawng ka um ahhin ka lung aa nuam, i ka nun di a riam. Hihi duhnak cu a si hngak dek maw ka thei ve lo, nain kan uar ko ti cu keimah nih ka lung in ka hngalh," tiah ka hei ti nolh. 

A mirh. A uiho ka hmuh. A biangchu a hun i sem. Ka uarnak a zual chinchin. Hei hnamh colh le hei puk colh hmanh khi ka duh. Nain, zalam kan chuah cang caah a lam pit viar. Nain, lambi te hmanh kha hrawng rih ko usih law hei hnamh taktak ding le hei puk taktak ding cu ka ngamh lo hrimhrim. Ka lung in ka hei duh sawhsawh bia. 

"Duhnak he aa pehtlai mi tuanbia tawi kan chimh lai, na ngai zuam lai ma," tiah a ka hal. 

"Ngai zuam," ka ti colh. 

A ka chimh mi tuanbia bal a tawi tiah ka ruat lo. A sau pah ko. Phiangkum vuikhat lawng in aa tong kho mi; a fek mi duhdawtnak an ngei ko nain 'van' aa kawp lomi le zuunngaih in a ciam mi Zawl Tling le Ngan Bawm tuanbia cu a ka chimh. 

Nithawng cung i ruahdor tlak thawng lak ah, a nem mi a awaan nih a hlawimi le ruahti lak i a vai mi thlizil kik nih a hun hno ter chinchin ve mi tuanbia cu ka hna chung i an luh cuahmah lio ahcun, kan zulh mi lamthluan hmanh ṭhaṭhi zoh huaha loin Dawtku lawng te cu ka zoh pah. A tuanbia a hun dongh tik ah ka hmuh mi cu, ngaihchiatnak nih a tuam mi dudawtnak tuanbia kong a ka chimh, tihi a si. 

"An i co lo cu ngaichia tein," ka hei ti. 

"An i co lo na ti ve ma, nang?" tiah a vun ka hal colh. 

Zeipipa ruat lem loin, "Aw." ka hei ti ve. 

"An i co ko. Mikip nih an i co lo an ti cio nain, kei cu an i co ko tiah ka ruah." a ka hun ti colh ve.

"Ziah ti hmanh?" tiah a hun ka hal nolh. 

"Ziah?" 

"Khi mu, an tuanbia khi, zei kan ti lai--an i duhdaw, an i tlaihchan i, an i ṭhium i fanu fapa ṭhatha an ngei tiin a dong na loin; keimah nih ka hei hmuh ve ning ahcun--zei bantuk harnak le khenkhamtu an ton zongah lung thawng in an i duhdawtnak le fek tein an i tlaihchannak nih khin a coter ko hna ka ti. An lung in an i co i an i duhdawtnak ah an i co, ka ti lai cu. Thihnak le nunnak ah an i co, ka ti hnga ma? Zeitluk lileng le zuuncuai in an um zongah zumhtlak in an um veve, hngahhlang in an um veve; pakhat le pakhat khi an lungthin an i 'ken piak' mi khi an lo, an i duhdawtnak an tuar ṭi i an ing ṭi veve kan ti ko lai cu. Cucu kei nih 'True Love' ka timi cu a si." tiah sau nawn in a hun ka leh. 

Dawtku bialehnak hi fak ngai in ruah a hau mi a si. Asinain, Dawtku bialehnak nih hin khua tampi a ka ruahter lo. Thil tampi a tuakter lem lo. Nain, ka lung in ka tuar mi thil a um. Cu ka lung i ummi thil te cu, a zeitihlei in holh in cun ka fianh khawh lo caah, "Cu vialte cu kei zong ka duh ve," ka hei ti ve.

"Biatak ma?" a hun ka ti colh.

"Biatak."

"Kan i khat," a hun ka ti nolh ve. 

Vuikhat ka hmuhnak in ka duh colh i, cu ka duhnak ruang i ka fuhpanhnak thawng in, ruah lo piin a vuikhatnak tonnak caanṭha tiang ka hun hmuh lawng si loin, ka duhnak zong a sinah ka phuan hnu ah a tuanbia fung zong ka hun ngaih piak khawh rih mi Dawku hmai cu, siamsiam tein a tla mi ruahdor khamtu nithawng tang ahcun hmuahchih dengmang khin ka hun zoh. Ka lung chung in cun, "Dawtku, kan uar tuk. Dawtku, kan duh tuk," ti cu tu le tu in ka chim ṭheo. 

Dawtku mithmai dawh le aan ṭha nih cun, ruah a sur zong a ka philh ter dih. Cu lawng hlah, a tuition kainak hmun kan phanh cang zong a ka philh ter dih. Cu nak hmanh cun, a tuition kainak inn hmai ah zeimawzat caan chung ruahpi sur lak i kan dir cang hmanh a ka theih ter ti lo. Dawtku ka duhnak chungah ka pil. I lungsi ngai in ka pil. 

"Sangpi, ka tuition kainak hmun kan phan. Kei ka lut cang lai," a hun ka ti. 

"Aw, si tak....Si cun," ka hun ti luklak ahkhin, kan donghnak a si rua lai tiah ka thinphang. I tthen ka siang rih lo. Kaa lungsak tuk lo. I sum kho loin, duhsah nawn te khin, "Dawtku, kan uar tuk. Kan duh tuk." tiah ka hei ti nolh. Panh siamsiam tein a mirh. 

"Thaizing lei ah kan i tong kho ti lai maw?" tiah lungsivang ngai in khin ka hei hal colh ve. 

"Kan duh zong duh lo zongah kan i tong ko lai, na thinphang hlah. Nithawng na ngei lo i, ruahpi sur lakah na ṭin ahcun na cin lai i na zaw sual lai i, thaizing ah kan i tong kho sual lai lo--ka nithawng hi vaa ṭinpi,"a hun ka ti pah khin, panh siamsiam te khin a 'khohṭhi nak' te cu ka kut cung ahcun a vun ka pek. 

"Ziah, nangmah ta? Na ṭin lei ah ta na herh lai lo ma? Nangmah nih vaa luhpi ko," tiah ka hei ti ve. 

"Poi lo. Ka ṭin tik ahcun a haan te ko lai," a ka ti ve. 

Hi caan ahhin zeibantuk feeling dah ka ngeih tihi holh in ka chim kho lo. Nain, vawlei cungah aa lawmbik mi mipa ka si lai dah, ka ti. Aaa lawmbik mi mipa... 

"Dawtku, kaa lawm tuk." ka hei ti. 

"Na caah cun," tiah zakzum ngai khin a hun ka leh ve. Hi caan ahhin cun caan hi a dir. Dawtku dah ti lo ka hmuh mi le ka hngalh mi an um lo, pawngkam thil ka philh dih. A fawinak in cun: vawlei ka philh. 

Dawtku nithawng ka cohlannak a ruang zong cu ruahpi sur caah si lemlo, thaizing ah tonnak caantha a kan petu pei si ko hi ti bak khin, lunglawm ngai in ka hei cohlan ve mi a si. A ngaingai ti ahcun sianginn kainak nithawng aa ken bal mi ka si lo. Ruahpi sur le sur, sur lo le sur lo tiin a um ve mi ka si. Cun, ruahpi zong ka uar ngai. 

Sau ngai zei awaan loin ka dir cang caah si rua, ka cal khin a kut dong in a hun ka nam i, "Class an thok cang khih, luh hau! Mangṭha tuk." timi bia cu panh te khin a hun pau. 

"Mangṭha." 

"Mangṭha...Thaizing ah kan i tong ṭhan lai.. 

"AW."