“Leh Rih Lo Mithi Pa Thlacamnak”
i
Amah lila
hmanh i hliah ṭung lo lio ah,
Vawlei hi a hmetuk a ti ṭheo—a palh hringhran dah!
A mit nih hmuh ṭung i ṭhaṭhi hmanh cinken lo,
Siarem in a hngalhfian lomi hawi-nun—a ceihhmai tam
ko.
ii
A Vawlei Cung Nun Thilmak:
A nun hi a ṭha tawn i a nun hi a chia tawn;
A ziaza zong cu bak,
A thiltuah zong cu bak,
A khuaruah zong cu bak,
A lungput zong cu bak,
A caan hman zong bak…
iii
Thlalang nih ho a si a hmuhter tawn;
Siseh, ho a si taktak tiang i hngal camcin dingah a
bawm rua lo.
Amah mithmuh vanmi a bang.
iv
A Nun Chung Ningzak Thil:
Mah mithmuh i miṭha si,
Mah mithmuh i mifel si,
Mah mithmuh i miding si,
Mah mithmuh i mithiam si,
Mah mithmuh i mimak si,
Mah mithmuh i mi cungcuang si;
Cun, mah mithmuh lawng in vawlei biaceihtu si.
v
Hi Nun Hi: A Duhmi Nun A Si Lo!
Nemmam!
vi
Siseh, mah le mah aa leirawimi mipa pakhat a si.
vii
A duh lomi nun—a hngalh loin a rak nunpi:
Porhlawtnak,
Ruamkainak,
Uangthlarnak,
Uahfeihnak,
Nahchuaknak…
Hi ziaza nih hin an rawi;
A lung mit, a ruahnak,
cun a nun mit an cawtter.
viii
Chikhat caan tawite—nunnak caan hlanh a si lio ah…
A hngalh lo kar in, hi ziaza hna nih hin,
Thihnak chung ah a nun cu an luhpi.
ix
Cu thihnak nih cun: mipa a mit,
a thinlung, a ruahnak, a nunnak le
a caan cu a thihter ve hna caah;
mipa mit, mipa ruahnak le mipa nunnak chung minung
zong
mipa sinah cun—amah mipa mithmuh ahcun an thi dih ve.
x
Mi chiakha cu an um ve ko,
Mi sual zong an um ve ko,
Mi dingfello zong an um ve ko,
Zumhtlaklo minung zong an um ve ko,
Hmanhseh, cu he ralkah cun,
Mi ṭha, mi dingfel, zumhtlak minung zong tampi an rak
um ko.
Mipa a rak thih bia!
xi
Thihnak nih a kihtermi mipa,
Nunnak thawsa nih vuikhat in a hun chem nolh tikah:
Bi nawn tein a mit a hun i au;
A umnak hmun in van a cau,
A lungthli in thla a cam.
xii
A thlacam:
“A thar in nun ka duh!”
xiii
Cucu leh rih lomi thlacamnak a si…
