Philh Tuan Har Lai

"Philh Tuan Har Lai"

Mitkuh thu sin zong i ka manh khawh ti lomi le chunmang thlum sin zong i ka phai ngam ti lomi-- a uai i a ṭil cang mi--kei ka dawtmi le kumthum chung kan tuanbia cu, caan nih hrapkhat thinlung thlek in a khirh nolh ṭhan hoi. Ka philh rih kho hrim lo. Kei cu hlafung fungkhat a khirh ṭhan lengmang mi ka si, a cuai ṭungmi hlafung.

Kei le ka dawtmi ka ti hnga maw, silole ka sinin a nung ṭian mi minu dawh ka ti hnga dah? A min zeitin ka auh lai ti cu kaa tuaipi mi asi lo. Ṭian cang ko hmanh usih; ka thinlung, ka ruahnak le ka nunnak i a nun rihnak le; nem tein, fek tein le dingfel tein ka duhdawt rihnak nih, "Ka dawtmi," tiin auh rih ding ahhin ka sining ah ningkelnak tampi in a um rih, hrapkhat duhnak ṭheo. Hi vawlei ahhin keimah bantukin a tuarmi tampi an um ve lai ti zong ka hngalh ko. Keimah bangin, duhdawtnak tlaihchan tuk lioah a lin kha ṭungmi mitthli he tampi an ṭap ve ko lai ti zong hi ka hngalh ko. Asinain, cu he aa ralkah tukmi minung zong an um ve ṭhiamṭhiam zong cu ka hngalh thotho. Cu si bu ah, ka tuar tluk cun a tuarmi cu an um lai lo, tiah keimah le keimah cu biathli kaa chim lengmang.

Tuzan zong, zaan dang tawn bang, dawtmi muithlam, awthlam le rimthlam he, thuk piin a mui cang mi zaanṭim tiang, lilen ngaihnak mitthli he a buar deng cang mi nehnang ka hlam ṭhan.

Dawtmi le kei kan i tonnak tuanbia cu hitihin a si:

A vuikhatnak kan rak i ton zaan hi khuasik cing ling lio Nubu zaan pumh cu rak si kaw, van ahcun arfi cu tleu dildel te tein an var, nain thlapa muisam bal a cuang lo. Lai lei innka bang, thlizil nih duh paoh in a hnirh khawh lomi innka cu 'Kuk-kuk!' cun an vun kingh. Lekmalak in siloin, duhsah nuarsam cun ka tak cung khuasiksem bo rual he cun, innka cu ka hei hun. Ka hun sin cun,

"Nan innka on a tlai ve ning! Nan um rua loh ka ti cu teh! Khoi na kut kan tlai lai," a ti pah khin a kut cu kik thiktherh in a vaimi thlizil lak ahcun a hun thlir. Amit ah ṭhep lo tein ka zoh hnu ah a kik hirhiar mi a kut cu ka hei tlaih. Akih tuk ahhin ka thinlung tiang in aka durh. Biang sensum tein a mirh bu khin, "Na kut lum ning," a vun ka ti. Cu chikhat te i chawnhbiaknak nih cun thinlung innka tiang a hun chih. Kan duhtuk, kan dawttuk timi biafang kaa khat hmanh zong a chim na loin, ka lung nih ai hruhpi mi cu, cucu biafang lawngte cu an si. Duhnak hi zei asi ti kan chim hmanh lai: Duhnak hi na tei ka tei khawh mi asi lo; nang le kei cu duhnak nih a teimi tu kan si, nain dawtnak he na komhṭi ahcun hawikom ṭha bik na hmuhnak a si. Duhnak cu thinlung uktu a si.

Pumh chung vialte mei pawngah kan i sir i, a thli in theihhngalhnak tampi kan hun ngei kho. Cu zaan cu a vuikhatnak, van le vawlei, cun Pathian zong ka philh dih hna zaan a si. Ka hngalh mi cu, cu minu lawng cu asi i, ka lung nih a duhmi cu amah he i naihniam chinchin lawng cu asi. A poinak pakhat cu, caan nih mi a ngan lo bantuk in a tlai duahmah mi zaan nih cun akan thlimtaak.

Asinain, nithar sinah, nikhat hnu nikhat in kan ngamh a sang. Kan i naihniamnak a fek deuhdeuh. Cun biatak tein kan i tlaihchan. Cutitecun, pakhat le pakhat hawikomhnak vuai ngei lo le cim ngei loin, kaa rak sunhsak tukmi hawikomhnak chung ahcun kan pil chin thluahmah.

Cu bantuk duhdawtnak, tlaihchannak le theihthiamnak tampi he kan i rungveng kan ti lio zongah, vawlei nih a hnuh in a hnuh chih mi i siknak nih zaan khat cu a kan fenh ai. Cu zaan cu, hi minu, biatak tein ka rak duh cangnak le ka rak tlaihchan cang nak ka fian zaan zong a si. Show piah zaan si nain, hall chung hmanh lut loin, a luancia nihnih chung i thil cangmi kongah kan buai. Lung nuamh lo si, thlizil kih si, cun pakhat le pakhat, kan lung in kan i unhnak nih ka thinlung lawng hlah, ka takpum tiangin a therh in aka therh. Aw a din ṭung i hrang ngai ṭung mi aw le aan he khin,

"Nizan tihni kha pangpar na ka pek lo! Na ka pek rua lai tiah chunnitlak te ruahchannak te he kan hngah..." a vun ka ti.

"A pangpar tak cu kan pe kho na loin, ka thiam tawk in ka suaimi pei kan kuat kho kha, na duh cemmi colour tein ka ṭamhmi a si kha! Chim thiam silo nain, suimilam pakhat chung deng ka suai ve mi a si kha," tiah ro ngang cun ka leh ve. Nain ka lung aa nuamh lonak cu ka takpum tein ka tuar. Ka mitthli tlak lo lawng. Ka hit viar. Ka hmur hrim cu a sawn dih hlah maw ti awk in. "Ka ngaithiam," timi biafang fangkhat rumro hmanh ka hmurka in a chuah khawh lo caah ka nun khing rih a zual.

Khuasih si, hmaichiat si, zei lunghna chuak loin inn ka lawi. Inn ka phanh sin cun Wifi nih a ṭhangh ve colh mi messenger notification cu a hung awn. Ka zoh cu dawtmi sinin a si ai. Ka let hnga maw tiah sau ngang kai duada hnu ahkhin, "Biaktak tein ma ka cungah na thinhun? Sorry si. Ka ngaithiam. Ka palh," a hun ti pin ahkhin a mitthli tla mi emoticon te khi a ka kuat.

"Ai. Silo, ka thinhung lo. Ka ningzak. Tuan deuh i na lung kan fahter mi cung i sorry ti hmanh kan ti khawh lomi ka ruah ahkhan, na hmai he kan khap lo," tiah ka hei leh.

"Sorry. Sorry. I'm very sorry. Ka ngaithiam," ka hei ti nolh.

A poi lo. Kan ngaithiam ko. Ka theihthiam ko aka ti rua lai ti kaa ruah lio ah, "Atu ahhin na lungthin chung i ummi biathli te kha ka chim," a vun ka ti hngap. Minute 5 chung hrawng leh loin ka um. "Na si hoi ko cu khih nang pi hi cu...ka chuak lai mangṭha ko ne," a vun ka ti.

Achuak cang sawk ai lai ti phun khin, "Ka lung chung, a chung hmanh ahcun a tawne taktak ah ummi biathli cu hihi a si: I Love You," tiah ka hei kuat.

"Ziah mah cu online chung cun na ka chimh! Face to face in pei na ka chimh ding si cu," tiah leklak tiah a ka leh colh.

"Na chuak rua ka ti cu...Okay, okay..Hmaitonh te cun thaizing ah kan chimh te lai," ka hei ti nolh ve, chim awk theih lo tukah. Ka thinphan ning hi ti awk ṭha lo. Ka hmuh ṭung lomi le ka tongh khawh ṭung lomi, asinain ṭihnak tel tung loin ka tuarmi ahcun fak cem in ka lung a turtertu bak a si. Cu biafang fangthum 'I Love You'.

A thaizing ah, tlanglawng cung ahcun kan ṭhu ṭi ai. Ka biakam bang cun, cu ahcun, a hna hram ahkhin, "I Love You," ti cu zakzum ngai te khin ka ti nolh. 

Cu sin cun zungzal in kan hmun rua lai tiah ka ruah. Zeitik hmanhah kan ṭian ti lai lo tiah ka ruah. Zeitik paoh ah kan i duhdaw zungzal rua lai tiah ka ruah. Ka vuikhatnak si bantukin a vuihatnak ka si ve rua lai tiah ka ruah. Pakhat le pakhat nem tein, fek tein le dingfel tein kan i duhdaw in kan i tlaihchan in kan zum zungzal lai tiah ka ruah. Nain, a vui lomi tuanbia ṭialtu kan si rua.

Nikhat cu, a hawi le sinin, ka caah thilthar simi le ngaichiat tuk awk thil simi thil pakhat ka hmuh: "Duhmi dang a ngei cang," tihi a si. Ka lungfah hi a celh celh awk a ṭha lo. Duhdawtnak nih hi tluk lawmmam in minung akan uk khawh ding zong hi ka theithiam kho lo. Duhdawtnak nih minung kan nun a thlennawn zia zong hi ka hngal thiam kho lo. Cu si bu ah, caan cu, zaangfahnak ngei loin; a kuai cuahmah mi ka thinlung zong hramkau loin, uimi a ngei lo ti awk khin akal thluangthluan. Cu ni cu a vuikhatnak, chun le zaan aa dan lo ni a si. Aa dangmi thil cu hi lawng hi a si: Caan, thinlung ei in a liam.

A thaizan ah a cakuat ka hmuh:

"Keimah nih kan chawnh lo ahcun mi chawnh zong na hmang ve lo e. Kan ngai ngai," a vun ka ti. Kan i chawnh cianak biadang ka rak halmi a leh lomi a hei tam ning ka hmuh tikah, ka thinlung a hirh in a hir. Ka mitthli a sem. Cu zaan cu ka unh lai ka ti. Nain, tlawmpal hnu ah,

"Naa manh lo maw? Ka umhar tuk hi...tuanbia ka chim," a vun ka ti.

Ka celh na lo te cun, zeihmanh thei lo bantukin, ka theih tawk tuanbia tawi zeimawzet te cu ka hei chimh. Fungthumnak hrawng kan phanh ah, "Na tuanbia chimh mi ka relnak ah ka mitku. Mangṭha," a vun ka ti.

Cu le cangka hngap cun keimah le keimah vuikhat in ka hun i beng. Cu lawng cu a za lo kaa ti i, inn leng ahcun--kon lengmang te cun--angki pan te he thlapa ka vung bih. Khuasik cingling lio caan cu si kaw vur dip dap zong cu van cun an ngol lo cun an hung tla ve hna. 

Hi caan, thinlung fak piin a kehkuai ko lio le nunnak king depdup in lilennak thlam chungah ai nawh lio caan hi, zeibantuk biafang le biatlang in dah ka hlawi ka ti ahhin, zeiti set deuh ti awk khi a ruah awk hrim ka thei lo. Nain, a tuar cun ka tuar dih cikcek. Khuasih si, tlai si, inn lengah kaa hren si; ka khuasih tuk ahhin ka lungfah hmanh ka philh dih hlah maw ti tluk khin, khuasih kihnak nih cun a reh in ak reh. Nain sau a nguh lo. Ka biang cungah mitthli a hun luang. Cu zaan cu a vuikhatnak, duhdawtnak cungah ka ṭah a si. Ka nunnak cheu vang cu arawk dih ti awk tluk khin ka ngaih a chia. Ahar ning. Hnarno ruh a ka ṭam i, cuticun zaan khuadei tein lilen ngaichiatnak a tuarmi a kuai thinlung he ka mawn.

Zeitluk hmanh in siang hlah hmanh ning, cuticun kan i hawikomhnak cu a donghnak lei ah a hung panh thluahmah. Kei nih cun na ka hlen i na ka rawi ka ti lo. Cun, zeiti hlei lamdang in kaa zuam hmanh ah a lung ka tei khawh lonak zong nikhat hnu nikhat in ka hmuhton chin lengmang. Ṭhennak kongkau zong ka khat te hmanh ka tiam pi bal lo. Nain amah lila nih nikhat hnu nikhat in lam a sial. Duhdawtnak kha ruahchannak in a thlen. Tlaihchannak kha ngaihnak in a thlen. Cucu ṭiannak tehte an si!

Zaankhat cu kan i chawn ṭhan. Hi zaan hi kan donghnak zaan a si. Kumthum chung kan ipehtlaihnak kan donghnak zaan a si. Hitihin ca a ka kuat:

"Hmailei pi tiang khi hawikom si kho usihlaw tiah ruahchannak ka ngei. Na ka philh lai lo tiah kaa ruahchan. Atu hmundang kal ding ka si caah kan ngai tuk te lai. Ngandamnak ṭha na ngei zungzal lai tiah ruahchannak ka ngei. Hmailei caan pi tiang zong kan hmun lai tiah kaa ruahchan," a hun ka ti. Hawikom le hawikom dirhmun in vun rel awk ahcun a thlum tuk nain, ai duhdaw ve mi pakhat dirhmun in vun rel ahcun a tangmi cu lungkuainak lawnglawng a si.

Zeibantukin a ka ti ding si paoh ah tiah biakhiahnak ka ngeih hnu ah, a cakuat cu hitin ka leh:

"Ruahchannak hi zeitik hmanhah kan hal bal lo. Ka herhmi zong asi lo. Ruahchannak ka ngeih mi le na ngeihmi hi aa dang tuk lem lai lo. Nain na sinin ka duh taktak mi cu na duhdawtnak kha a si. Ruahchannak, ruahchannak na ka tinak nih, atu ah, mi ralchia ah a ka canter cang. Ruahchannak cu zaangfah tein ka pe hrim ti hlah! A za tawk in ka ngeih cang hna. Nain an tling bal fawn lo. Hmailei kong rumro ruahchannak na ka pekmi nih a hlei in a ka henh; hmailei caan chungah a nungmi ka si lo, atu caan thengte ah anung mi ka si. Cun, kan philh dingmi minung kan ngai hna tihi tuzan ah piangtuk lawmmam in ka fian. Hmailei na ruahchannak vialte na philh lai ding zong ka fian, i cucu ka caah ngaihchiat pi awk tuk a si. Kan philh mi lawng kan ngai hna. Ngaih loin ka philh ko. Mah vialte, kei nih kan duhdawt chung i, nang a ngaih in na rak ka ngaih cu--na lam aa rak dang ruangmang hi mu"

Ka cakuat tha tein a rel dih hnu ah a rel a nuam lo bikmi cakuat ka don nolh.

"Sorry a si, chimh kan duh tuk lengmang ko nain kan chim ngam lo. Nain theihthiam ding le ka hawi si zungzal dingah bia ka kam! Duhmi dang ka rak ngei...hlan deuh lio pi, nangmah hlan piin ka rak komh tuk cangmi a si caah khin, ka philh kho lo...Asinain, zaangfah kan nawl. Hawikom ṭha si ding ah bia ka kam mu." a hun ka ti.

"A kuai cang mi thinlung le a thi cuahmah mi thinlung--a kik cuahmah mi thinlung he cun hawikomhnak ser cu i tim duh hlah! Bia kan kam kho lo. Nang na dirhmun cun zeipaoh a fawi te lai si! A har hnga ding cu na zaang na ka raam ding le, na ka zaangfah ding lawng hi a si. Kei caah cun zeipaoh a har dih cang si," ka ti ve. Nain kaa lungsak kho hrim lo. Kaa lungsak kho lo ti tikah; fak nawn te le mi zeirel lonak lungput te tal he khin heh tiah bia ṭha lo deuh nawn le biafak fak deuh hmanh he khin ti ning law, ti khi ka duh. Nain cu nih zeihmanh a thlen ding a um lem lo ka hngalh caah kaa sum.

A luancia kumthum ahkhan online in, "I Love You," ka rak ti. Kumthumnak a liam lei ah, anih nih, "Sorry," aka ti. Hmaitonh te i, “I love you,” ka timi zong cu ruahchannak le ngaihnak he cun a thlen dih hoi.

Tahchunhnak hman ve ahcun meithal in aka kah ti tluk asi. Cu hma cu, thi hret lo nung hret loin ka tuar. Nain, tuzan tiang zong, a kikmi zuunṭhing he ka mawn rih. Kan kar i pehtlaihnak bal cu a cat dih. Kan i hmuhton zongah aa theihhngal bal lomi minung bang, kan nun, aa hrial. Cu si bu ah, amah nih arak i tlaih mi tlaihtleng kha rak i tlaih ve in, hawikom dirhmun ahkhan dir ning law zeital aa thleng hnga maw ti hna khi ka ruat tawn.

Nain, hi bia hi ka lung in kaa chim: "Hawikom cu rak si usih law, aa duhdaw mi, duhnak le dawtnak chungah a rak nung mi cu kan si hnga lo; theihthiamnak men le zaangfahnak chung lawng i a nung kan si hnga...vuikhatnak te nih mah vialte ka nun caan taang rih mi cu zeitin a hui khawh dih hnga..." kaa ti ve. Khi pin ahkhin zuunṭhing tlawmpal he minu kong thotho ruat in, zaanmang ka hlawm, a kik mi zaan mui chungah leng in.