-=Mang Ralkah Kan Nunnak Taktak=-
Khuahliti le cawhnuk luannak ram kan phan, nain
Kan din-ei mi bal aa thleng hlei lo.
Rumnak, hmuhnak, kawlnak ram kan phan, nain
Kan sifah a zual, kan harsatnak ing puang a si.
Fimthiamnak a sannak ram kan phan, nain
Kanmah le kanmah kan i hrawk.
Inn ttha, lo ṭha, motor ṭha...thil ṭha tampi kan ngei, nain
Kan ngeihmi cungah diriam in kan i lungsi kho lo.
Lailung, khuazung ah innpa ṭha kan rak ngei, nain
Hi ram bal ah mi lo mah lo ah kan cang dih.
Kan i hruk aih mi thil le ri, kan i ṭamh thuam--an i dawh, nain
Kan lung bal, nikhat hnu nikhat in, a ṭet chin lengmang.
Ruahnak tampi kan chuah, kan ka tampi kan ang, nain
Mah telh loin mi ca lawngah kan vio, kan khuang tawn.
Duhdim nun nuamhnak le daihnak kan duh, kan kawl, nain
Harnak, fahnak le thinphannak chung lawngah kan hrio.
Khuasak tintuk lairelnak ah kan thapi a pawt lengmang lo, nain
Mi paw kheh kan zalh caan a tam.
Inn chung thilri nih inn a khimh in a khimh, nain
Inn chung minung bal kan ṭamhal lengmang.
Chungkhar cu thi le sa in kan i pehtlai kan ti, nain
Pakhat le pakhat kan thi kan i chuah men mei.
Kan kawl caan a sau, kan hmuh mi a tam, nain
Kan herhbaunak, dongh caan an ngei lo.
Kan zulh mi a lam a kau, kan ke phau a rang, nain
Kan lung a bi, kan thin a tawi, kan ruahnak a hme.
Pathian ca, Amah a Peng le Ram ca kan ti, nain
Pumkhat sinak cu bu kipah kan ṭhencheu hirhiar.
Kan ca, kan holh, kan nunphung kilven ding kan ti, nain
Fale rumro hmanh holh ṭha loin an hna kan vih tawn hna.
Ho paoh i tluknak, i canhnak ram kan ti, nain
Ho maw mi cung kai kho deuh lai ti kan i zuam zel
...
Tuanbia in, naite tiangah--ral le buaibainak kan zam taak, nain
Hi ramling daihnak hmun ah, nikhat hnu nikhat in,
Pathian kan zam taak, i mah le mah kan i zam taak:
A NUNG DING MI TUANBIA THI DING IN HLAH MAW KAN TTIAL?
Hi roling lo, buai ling kan mang ralkah kan nun caan hi dah ngai...
