Khuaruahhar Anṭam Ci Mu
Tuluk
tuanphung ahhin, a fapa fangkhat te nih mual a liamtaak mi nuhmei nu tuanbia a
um. A ngaihchiat le lungfah celh lo ah, 'mi thiang' timi an tlangbawi sinah a
va kal i, "Zeibantuk thlacamnak, zeibantuk khuaruahhar camhnak hi dah, hi
ka fapa nunter ṭhannak ding caah na herh," tiah tlangbawi cu ngaihchia
ngai in a vung hal.
Tlangbawi
nih cun ṭhawl lem lo le zeiti biaceihnak ngeih piak lem loin, "A ngaih a
chia bal lomi; ngaichiatnak a thei bal lomi chungkhar sinah an anṭam ci mu kha
vung hal hna. Cucu na fapa zuun na tuarnak hlohnak caah kan hman lai,"
tiah nuhmei nu cu anṭam ci kawl ahcun a fial. Nuhmei nu cu tlangbawi pa tining
te cun anṭam ci mu kawl ahcun aa thawh.
Innṭha
ngai le inn lian ngai mi pakhat a hun fuh, innka cu a vun kingh i, "Ngaihchiatnak
a tuar bal lomi, ngaichiatnak a thei bal lomi chungkhar ka kawl hna. Hika hi cu
bantuk hmun cu asi el maw? Ka caah a biapi tuk hringhran," tiah a nawl
hna.
"Kapi,
inn naa palh. Hika cu, cu bantuk hmun cu a si lo," an hun ti pah khin, an
innchung khurkhar i a cang mi thil vialte kong cu an chimh dih. An harsatnak le
an temtuar ning hna an hun chimh dih.
Cutikah,
nuhmei nu nih cun, "Aa, hi tluk sifah le ngaihchiatnak tuar mi hna hi, ka
nakin pei an van a chiat deuh hi, keimah bantuk in pei, rawhralnak a tong ve mi
an si ko hi," tiah amah le amah cu a lung in aa chim.
Cu
hna chungkhar sinah cun a lut i, an ngaihchiatnak le an tuarnak vialte a vun
hnemh hna hnu ah ngaihchiatnak a thei bal lomi chungkhar sin i anṭam ci mu kawl
ahcun aa thawh ṭhan. Asinain, khuazeika a kalnak hmun kipah; a hmuh lengmang mi
lehnak cu harnak, ngaihchiatnak, rawhralnak, thihnak le paamnak tong mi lawngte
an si dih. Amah nakin mi vanchia an ram tamtuk lawmmam zong, atu le atu, a thar
in a hmuh ṭhan lengmang.
Nuhmei
nu cu, cu bantuk chungkhar hna zaangfah in le zawnruah in, a bawmhchanhnak hna
ah le a hnemhnak hna ah, a donghnak ahcun amah lila a ngaihchiatnak le fahnak
vialte cu a philh dih ve. Ahnu ah cu bantuk a ngaihchiatnak le a tuarnak vialte
a teipiaktu cu, cu anṭam ci mu kawl aa rak thawhnak kha a si.
Vawlei
cung ahhin mi harsa an um i, harsa chin zong an um, a ngaihchia mi an um i, a
ngaihchia chin mi zong an um rihnak; cu vawlei nunnak kong cu biatak tein a hun
hngalh tikah, a nunnak caan a tangmi vialte cu, cu bantuk mi vanchia
bawmhchanhnak ahcun a thap dih.
