Nunnak le...

"Nunnak le ..."
--Vclian

I

Minu, kan rak ton sin khan duhnak zong ka ton,
Kha caan sinah khan thil pahnih ka fian:
Caan,
Lungthin duhnak uknak tangah lawn;
Ka relmi suimilam kut silo,
Siseh nang kan duhdawtnak.
Duhnak,
Nunnak lamthluan ah siangpahrangpa a cang;
A tumtahmi nganbik:
Nang, a siangpahrangnu na si lai ding.

II

Nang le kei kar rosung tuanbia ca'h, caan hi
Zeizong vialte asi ka hngalh ko; nain
Ka thlacamnak cu Asertu sin lawng ah ka nawl:
Nang le kei len hmun ding in.
Nang kan ton sinin duhnak hi hawikom asi ka fian;
Nunnak sullam aka petu hawikom:
Caan sunlawih in nang ca thinlung pek, dawtnak.

III

Nang chung i thuk deuh in ka pilnak nih,
Dawtnak muisam le sinak fiang tein aka hmuhter:
Dawtnak,
Lung in ka tuar menmi asi lo;
Kaa nunpi mi le kaa sunhsakmi,
Ka caan caah chansaunak,
Duhnak caah nunnak thaw.
Dawtnak a ngan zia ka hmuh zan cu:
Zungzal in ka ta si ding kan ham zan a si.

IV

Zanmang nih cun nang aka hlam ter,
Chunmang nih cun ruahchannak aka pek;
Siseh, na dawtnak nih cun atak nun aka komhter.

V

I lungsi tukin nang chung ka pilnak nih
Ane tiang aka phakter, khi hmun pin khin,
Ka zumh khawh lomi caan chungah ka tla!
Ttiannak...!
Thih ttian pek nun ttian pek; ka caah fahnak an si.
Ninu cu nichuah valpa sinin achuak i,
Nitlak valpa sinah, a liamnak tuanbia,
Caan sinah ka hmuhton.

VI

Kha caan thok khan lungkuainak zong ka ton than.
Lungkuainak,
Tlaihchannak, ruahchannak, dawtnak le zumhnak:
Hmunkhat ah hmakhat te ah an kuaitinak.

VII

Hi a kuaimi lungthin he caan sinah ka rung bei,
Ka kar karkhat, ka kir karhnih:
Saupi i thawn kho loin hmarung he ka chaihma.
Lungthin,
Caan uknak tangah a hram!
Duhnak,
Amah le mah aa ralmi hmapu pa;
Hi sin ahhin thil pakhat ka fian:
Nunnak ah ton dingmi a tamtuk.