Dawtnak hi zeiset hi dah asi?
Ni
tuaitam zingka, suimilam 8:30 hrawng ahkhin, kum 80 hrawnghrang a si hnga mi
tarpa cu, a kut ṭhit phoih piak awkah sii-inn ahcun a hung phan. Manh lo ngai
le hnawhnam ngai in aa tuaitamnak kong cu cabuai-ṭhu minung sin ahcun a chimh
hna. Cun suimilam 9 bakah doctor ton khawh ding in, tawlrel piak ding zongah a
nawl chih hna. Asinain, cabuai-ṭhu minung nih cun zapi thutnak ahcun an thut
ter i an hngah ter ve. Cu ahcun, doctor pakhat nih, cu tarpa umnak hngal loin
atu le atu a suimilam a zoh cu a hmuh. Doctor pa zong cu mizaw dang zoh awk a
ngeih lem hna lo caah, cu tarpa a hma ṭhitnak zohfeh piak ding ahcun , a a vun
fuh.
A
hma le rung ṭhitnak cu a zoh piak tikah, a dam ngaingai cang nak le a ṭhit
phoih piak a zatnak kong cu doctor pakhat sinah cun a hei chimh chin. Cuticun,
a ṭhit phoihnak ding ca i, a herh mi thlopbulnak thilri vialte cu an pek i,
amah cu tarpa kut ṭhit cu an phoihter. Cuti, an i tuaitam lio ahcun biaruahnak
an hun ngei pah kho.
Doctor
pa nih cun, “Tuzing cu, ziah, cuti rumro cun hnawhnam cun na um,” tiah tarpa cu
a vun hal.
Tarpa
nih cun, “Kan nu hi mizaw le mi tlamtling lomi sii-inn ah a um caah, cuka ahcun
vung kal i, thaithawh vai hrawm ka duh caah asi ko,” tiah doctor pa cu a chimh
ve.
Doctor
pa nih cun cu bia cu a theih tikah, “Nan nu cu a ngandamnak maw a ṭhat lo?
Zeibantuk zawtnak in dah a zawt ning cang si?” tibantuk te pawl a hun hal nolh.
Tarpa
nih cun, “Doctor, kan nu a zawtnak hi Alzheimer timi (thluak, lung le thin lei
in tlamtlin lonak) zawtnak in a zaw mi a si. Atu hi a zawtnak zong a sau
ngaingai cang,” tiah doctor pa cu an nu sining kong cu a hei chimh.
Cuti
bia an I ruahpah lio ahcun a hma cu a hun thlopbul khawh. Asinain tlawmte an
tlai deuh. Doctor pa nih cun, “Nan nu hna nih an hngak tuk sual hnga maw, kan
tlai deuh hi, na lungre hna thei tuk sual maw,” tiah ngaihthiam hal pah khin
tarpa cu bia a hei hal. Asinain, tarpa nih cun an nu nih ho asi hmanh a theih
ti lonak kong cu doctor pa cu a chimh.
Lau
ngang in, doctor pa nih cun, “Cuti si bu ahcun, ho na si hmanh an thei ti na lo
cun maw, zing fatin in nan nu sinah cun na kal lengmang ko,” tiah tarpa cu a
hal.
Tarpa
nih cun doctor pa kut cu din tein a bengh pah khin, “Anih nih cun aho ka si kha
a ka thei ti lo, sihmanhsehlaw, kei nih cun aho asi kha ka hngalh rih ko,” tiah
a bia cu a leh.
