A Bami Nun

"A Bami Nun"
 --Vclian

 


Hi nun, a par rim haw hi, ziah,
Ngaihchiatnak rim lawng in an nam?
Kawi-aa, nun hi a ka simh ngaingai ko cang:
Hnu lei caan nih ka kong a chim,
Hmailei caan bal; kei nih ruahdap in a kong ka chim.
Hihi zeihen asi?

Ka lung nih hin a duhmi a hngalh:
lawmhnak, nuamhnak, hlawhtlinnak, sunlawinak,
daihnak, hnangamnak, cun fawi tein saupi nun.

Ruahnak nih hin a phaimi tam:
Rumnak, lianngannak, saduhthah tlinnak,
Cung ṭhu mang bawi sinak, cun hawi hlei sang si.

Siseh, nunnak nih hin a comi tlawm:
Vui lo, a thiang lomi biakam i sawmh in,
Hmun lo, a dik lomi chunmang kaa kiamh,
Fek lo, a hmun lomi hawikom i rawih in,
Nun caan, biavai vuan he ka liampi cukmak...

Hi nun nunpi hi ka ba:
Muihnak chung thlacam
A vui lo, a thiang lomi biakam bochan,
Thli phir mang nun lampi,
Buabua tletle in hmailei helh;
Hi ziaza nih hin ka thlarau ma a thah, ka lung dah?

Hi a bami nun: Biatak tein a ba taktak cang.
Lung a ngawn, ruahnak a bu, nunnak aa sawksam:
Hi nun, a ba ngamsam!

Ka pu, na biafim hna kha i hum rih hna:
Ruahnak le mang hi philh taa hna ning;
Ka bat ning a fak, dinh ka duh cang.