Meeting Hruai Tikah Tuah Ding

Meeting Hruai Tikah Tuah Ding 

Meeting hi bu pakhat khat le phu pakhat khat chungum minung, thil pipa kong i hmunkhat i van i tonnak le biakhiahnak ngeihtinak asi bantukin a biapi tuk hringhran. Meeting kan tuahchannak aruang hi bu chungah, thanchonak le hlawhtlinhnak aum khawhnak ding caah asi lawmmam. Cu ve bantukin, thil hi tlakhiahmah tein ceih le khan asi tawn. Meeting tel le tum tikah ruahchih lengmang ding thil hna:

Meeting Timhlamhnak

Mikip duhnak canh khawh le lungton hi a har tukmi thil a si. Asinain timhlamhnak nih cun, thil sining kha a fawiter deuh suaumau lai. Nangmah lawng hmanh in siloin, na tuanti hawi hna zong timhlamhanak an ngeih ve nak hnga, i tonnak le i chawnhbiaknak zong ngeih ta lengmang hi a tha tuk.

Hmun le hma zong hi an biapit tuk caah, nan meeting tluangtlam tein a kal khawhnak hnga hmun le hma thim zong thiam ve a hau. Tahchunhnak ah Biakinn, silole biakinn-hall tibantuk i meeting hrilh cu, inn luklak i meeting va hrilhnak cun, a let in a tha deuh. Thil le ri zongah tlamtlin tein i ngeih ve le hman khawh cu a tha ngaingai. Tahchunhnak ah: Projector, computer, thutdan/cabuai le whiteboard tibantuk zong hmangin meeting umkal ning a fawi deuhnak hnga timhlamhnak ngeih khawh ahcun a tha tuk.

A caan te ah mi theihter hna

Meeting tuahnak kong ahhin buainak a um tawn. Cucu thawng nan kan thanh a tlaituk ti hi a si tawn. Cucaah cun, meeting auh ahhin a ni hlanken deuh in auh khawh lengmang cu a tha ngaingai. Tahchunhnak ah zarhhnih-thum hlanken in tbk. a der lai ah zarhkhat hlanken tal cun a hau ve. Cun hmun le hma, ni le caan kong zongah fiangfai tein thawngthanh khawh i zuam chih lengmang ding asi.

Hruaitu domhnak

Chairman deuh nih hin meeting hi hruai a si ko, hruaitu an si bantukin. Cu minung cu meeting chungah lutlai a si bantukin, meeting um le kal ning a that khawhnak hnga tuanvo tampi a ngei. Cucaah cun, ceih le khan mi kongah thil a tlamtling khawhnak hnga hruaitu dang zong, Pastor hei ti bantuk, silole Khrihfa upa pakhatkhat zong i domh le rawih khawh ahcun a tha ngaingai. Meeting a tluangtlam deuh tawn.

Agenda tial

Nan theih cio bang Agenda cu meeting chung i ceih le khan awk thil kong cazi i tial khi a si ko. Agenda tha nih cun thanchonak le hlawhtlinnak tampi aa put tawn.

Agenda vialte piangpai te le fiang tein theihhngalh khawh an sinak hnga timhlamhnak ngei, a hlanken in ruahnak tial tbk.

Kong pakhat nih caan pa zeizat a lak tbk zong ruah in tial

Agenda hi zapi theihter hmasa zong hi a tha tuk tawn, ruahnak chuah cio awkah caan tampi zong pek an sinak a si ve, cucu tuah khawh ahcun a tha ngaingai.

Ceihhmai mi kongah pemhnak

Meeting ahhin buainak a um tawn. Aruang cu ceih le hmai mi kongah kan tlau lengmang. Kong pakhat dih hlanah kong pakhat kongah va per duak hman tbk nih khin, cu bantuk buaibainak cu a chuah pi theo. Cucaah ceihhmai mi kongah lung le ruahnak in dikthlir tein pemh cikcek khawh i zuam cu a tha.

Fimhrin tein Meeting hruai/kai

Meeting hruai thiam lomi meeting an hruai paoh ahcun meeting hi a nganfak zungzal. Meeting hruai tik ahhin ruah chih awk thil zeimawzet:

• Midang biachim tikah tha tein ngai law biapi thil char khawh i zuam.

• Ninghngal tukin mi dawnkhan hlah--an biachim lioah biatan tbk, tla dakmak tein an bia leh colh tbk zong hmang hlah

• Lanh cutmat khawh i zuam--Agenda pakhat pakhat ah sautuk nan tan cang i, bia-alnak hna a um pah len ahcun, zapi hnatlaknak in kutthlir, silole Agenda zong that tawn ko

• Bia na hal hna tikah, bialo le bialo hal hna hlah! Sullam a ngei hirhiar mi te hal hna

• Phungchim i tim hlah--meeting ahhin cawnpiaknak biachim in biachimmi kan tamtuk tawn, cucu aa keihkawh lo. Nem tein in biaruahnak bantukin biachim khawh i zuam

• Hmailei meeting nan hrilh than ding kong midang chim hna

Agenda zulhdawi

Ceihhmai mi kong i fianlonak le pemh lonak tbk hna hi Agenda zulhdawi lo ruang theo ah a chuak tawn. Agenda zulhdawi lo ahcun tlau hi a fawi ngaingai. Cucaah cun Agenda ning tein meeting zulhdawi cu a tha suaumau.

Biakhiahnak ngeih tikah

Meeting biakhiahnak ngeih tik ahhin mi tam deuh duhnak le hnatlaknak kha char lengmang a si tawn. Cucaah, biakhiahnak ngeih hlanah, thil kongkau ah fiang tein zapi theihhngalhter cu a tha. Hmailei caah palhnak a tlawm deuh lai.

Minutes (Record) Tial

Meeting minutes cu meeting chung i biakhahnak tialmi khi a si. Cucu meeting tuah tikah a biapi tuk. Cucu secretary rian le khai a si tawn. Cucaah, secretary nih meeting biakhiah vialte cu fiangfai tein le tling tein a tiak awk a si. Cucu minutes cu a hnu ah zohthan lengmang mi zong a si caah, a si khawh chungin tlamtlinh ahcun a tha.

Meeting dih tikah

Ceihkhan cia mi kongah zohthannak ngei lengmang tawn

Meeting minutes zong zapi sinah rel than ding

Palhnak a um cun remh colh ding tbk