"Kan Phirmi Nun"
© VCL
Vairaang vawlei leng in nun kan phir,
Chantiluan he hnu hmai in kan i sir,
Fimnak kan kawl: vawlei ngeihchunh ri le raa;
Kan hriat, kan dap, manh lo cio.
Miphun tthanchonak
Pathian ttihzahnak
Chungkhar dawtnak
An ti, kan ti ve; nawncek cung chikhat ti tliang kan bang.
"Pathian thlahmi kan si," tiah sunpar kan i pe!
Hmanhseh, chungkhar ah 'dawtnak ser caan' hmanh kan ngei lo.
Fimnak cungah kan kai caan tam,
Ruahnak kan i chuih-pah ttheo,
Bia-so kan hlur, bo thlorh bo.
A nepnap ah 'fimnak' nih a kan hrawh.
Thlaihhrem bang cawnpiaknak nih lung a tuai,
Lungtuainak nih ningzah pinak a hrin:
Pakhat le pakhat sual kan i phaw.
Cun, kan zapi tein kan 'zaw'.
Khua zung in a hun thlengmi awaan
-"Bochan mi nan si," ka theih ah ka lu ri,
Ningzahnak he ka ngaihchia chih.
Peknak nun ah kan thi
Ramkhel kongah kan tak thak
Thlarau nun ah awlok kan chong
Hawikomhnak ah kan kam uih
-Zumhnak thlaici kan maan ter
Mah le hmuh ning cio tiin:
Aw kan thlir cio
Kutdong kan sawh cio
Van kan cau cio
Pakhat le pakaht i cohlang ngai loin, cuai kan thlai;
Sahngar ni na arpi ttap na ti kan hluan.
Cangai sir vak fale sir vak,
Kan chim zel, hmanhseh kan hngalfiang lo!
A nepnap ah rawhralnak hrik nih a kan vah.
Khuanu khuapa bia lila biathli;
biathli lila thing par au; kan 'Vakok' a ngawn.
Kha kan si ko cang!
Tum Tling nupi chung chuak fa,
Fa bawn lo ah kan cang rulhmal ko hi ta...
Na mit au
A au khawh lo cun keu
Na hmur cip
A cip khawh lo cun na kut in iap
Thaizing man kong ruah hun ngol rih:
Nun A Phirmi kan Si hi vun ruat tthan;
Ralring in nun kan tunmer hau ti na theih ahcun,
Hmunkhat ah ttuan tti usih!
