-=Christmas Tuanbia=-
Hlan chan pi, kum 2000 hrawng a luan cang mi kum lio, Siangpahrang Herod nih Judea ram (Atu Israel ramtthen pakhat si ve mi) arak uk lio ahhin, Pathian nih vanmi Gabriel kha Nazareth khua chaklei i ummi ngaknu sinah arak ratter. Cu ngaknu a min cu Mary kha asi i, cu caan ahcun Joseph he i hamnak kha an rak ngei.
Vanmi Gabriel nih cun Mary cu, "Daihnak na cungah um ko seh! Pathian nih thlua an chuah, cun na cungah a lawmh zong aa lawm," tiah a ti. Mary cu vanmi bia nih lau ngang in le khuaruahhar in a chiah. Vanmi nih cun, "Na thinphang hlah, Pathian cu na cungah zaangfahnak a ngei. Thiang Thlarau thawngin nau na pawi lai i a min ah Jesuh na sak lai. Amah cu Pathian fapa a si lai i, a pennnak cu zeitik hmanhah a dong lai lo," tiah a ti. Mary cu thinphang le thlalau in a um, sihmanhsehlaw Pathian kha a zumh. "Pathian nih a thim le a ti bangin si ko seh tiah," Mary nih cun vancungmi cu a leh. Gabriel nih cun, ho paoh nih fa ngeih dingah a tar tuk cang tiah an ruahmi (Mary unau) Elizabeth zong nih, Jesuh lamsial piaktu dingah, Pathian nih a thim piakmi fapa a ngeih ve lai nak kong zong kha a chimh chih.
Mary nih cun a chungkhar hna le a hawi le kom vialte hna cu kaltaak in a unau Elizabeth le a va Zechariah kha vung len awkah cun akal. Elizabeth cu Marry a hmuh caah aa lawm tuk hringhran. Mary cu Pathian nih naute nu si dingah a thimmi asi zong kha a hngalh. Vancungmi nih cun Zechariah cu Elizabeth nih naute a ngeih lainak kong le cu naute nih cun Jesuh lam a sial piak ding kong kha arak chimh cang. Cu naute cu a min ah John tiah an auh mi kha a si. Mary cu Elizabeth sinah cun thla thum chung tluk hrawng in a um i cu hnu ahcun Nazareth khua ahcun a kir tthan.
Joseph nih, Mary he tthitumhnak an tuah hlanah, Mary nih nau a pawi kha a hngalh caah a lungre a thei ngaingai. A thli in tthitumh puai zong ngol dih ding in khua zong a ruat i a khang. Nain Joseph sinah, a mang in, vancungmi cu ahung lang i, "Mary hi na nupi i lak awkah ttih hlah," tiah ahung chimh. Vancungmi nih cun Joseph sinah cun, Mary cu naute nu si dingah Pathian thimmi nu a sinak kong kha a chimh, cun naute cu Jesuh tiah an min an sak ding kong zong kha a chimh chih. Cu a sullam cu 'Khamhtu' tihi asi, zeicahtiah cun a mi kha a khamh hna lai. Joseph cu a thawh tikah, vancungmi nih a chimh ning te cun a tuah: Mary kha a nupi ah alak.
Hi lio caan ahhin, Mary le Joseph an umnak hmun hi Rom Penmi ram chungah a si. Cu ahcun, Rom khua pentu Augustus nih an ram chung milu cazi vialte kha khomh dih a duh, cucu a tuah cu nungkhuai pe hna seh ti a duhnak caah a tuah cu a si. Mi vialte sinah cun min cazi (milu relnak) chung i min rak ikhumh cio ding kha nawl a chuah. Mary le Joseph zong cu sau ial in khual cu an hung tlawng. Cu hmun cu an khua Nazareth he meng 70 hrawng aa hlat; cucu Bethlehem khua kha a si. Zapi-zaran cu ke in an cheih cio, sihmanhsehlaw mi zeimaw cu la a hmangmi an um. La nih cun an khualtlawnnak chung i a herhmi din le ei awkah, a zatawk in an ikenmi zong kha a phurh bawmh hna. Joseph le Mary cu duhsah tein an hung kal, zeicahtiah naute achuah lainak ni caan kha a nai.
Bethlehem an hun phak tikah cun umnak hmun kongkau ah buaibainak an tong. Mi tamtuk nih min rak ikhumh cio dingin an rat caah, inn vialte a lawngmi a um ti lo. Hmun lawngkang pakhat lawnglawng, an hman khawh dingah, a um. Cucu sattil an zuatnak inn a si. Hi lio caan ahhin, sattil hi, innchungah zuat an rak si cio. Cu a ruang cu 'sattil' phusa hi minung nih rak ilumhnak ah an hman tawn, ahlei in zaan ah.
Cucaah inn zuat sattil (caw) chiahnak hmun ahcun, Mary nih naute Jesuh, Pathian Fapa cu ahrin.
Hi lio caan ahhin nau chuak thar paohpaoh cu 'naupuan' in tuam colh ding kha an zulhphung arak a si. Sihmanhsehlaw, naute Jesuh cu caw rawl einak kuang chung capawl cungah hlawm a si.
Bethlehem khualeng tlang hrawn le nelrawn kuang hrawngah tuukhal pawl zong zanttim le khuamang ahcun an tuu cu an rak khal ve hna. Nithar ahun thawh sinin, ruah lo piin vanmi cu an sinah a hung lang i, Pathian sunparnak cu an velchum ahcun ceu lung in a um. Tuukhal pawl cu ttihnak le phannak he an khat. An ttihtuk hringhran. Sihmansehlaw, vancungmi nih cun, "TTih hlah u. Nan caah le mikip caah thawngttha ka ngei. Nihin ah, Bethlehem ah nan Khamhtu cu a chuak cang. Naute cu caw rawleinak kuang chungah nan va hmuh lai..." tiah a ti hna.
Cun a dang vancungmi tampi zong kha an hung lang hna i, van cu ceunak in an khahter. Tuukhal hna nih cun vanmi hlasak thawng: "A sannak bik van ahkhin Pathian cu sunparnak hmu sehlaw, hi vawlei ahhin dawtnak-remnak um ko seh," an ti thawng cu an theih. Vancungmi an kal dih tikah cun, tuukhal hna cu pakhat le pakhat kha, "Bethlehem ahcun zeidah a cang hnga; hung zoh tuah hna usih," tiah an ti. Cucaah tuukhal hna cu Bethlehem ahcun an kal i, cuka ahcun Mary le Joseph cu an vung hmuh hna. Naute Jesuh cu, chimh an rak si bang khan, caw rawleinak kuang chung ahcun an vung hmuh taktak. Naute Jesuh an hmuh tikah, mikip kha 'hi thil hi vancungmi nih a kan chimh' ti kha an vung chimh hna. Cu nih cun zapi cu lau ngai in a umter hna. Cun tuukhal hna cu an tuu sinah cun an kir tthan. Pathian nih a Fapa, mi Khamhtu dingah a chuahter ca zongah, Pathian cu an conglomh i an thangtthat pah.
Jesuh a chuah lio ahhin, a dang phun arfi ceu cu van lai ahcun a cer ko. Lamhlat pi um Mifim zeimaw nih an hmuh ve tikah zei sullam dah a si hnga ti kha an ruat. Annih cu mifim taktak kha an si i, arfi le thlapa kong a cawngmi kha an si. TTial hlun chungah arfi thar a chuah ahcun siangpahrang thar a chuak lai timi kong kha an rel. Cucaah, siangpahrang thar hmuh awkah cun laksawng he khuatlawn hram cu an ithok.
Mifim hna nihcun arfi ceu cu Judea ram lei ahcun an hun zulh thluahmah i, Judea khualipi Jerusalem an hun phak tikah cun mipi kha: "Khoi ahdah Judah siangpahrang thar cu a chuah lai," tiah an vung hal hna. Herod, Judea siangpahrang, zong nih hi thawngpang hi atheih tikah a thin a hung tuk ve. Zeicahtiah mi pakhat khat nih ka ai an ka rolh lai ti kha a phan caah a si. Mifim hna cu siangpahrang chuak thar an hmuh hlan lo chung paoh arfi vung dawi dingah cun siangpahrang nih cun a fial hna. Herod nih cun : "Nan hmuh tikah, a ho a si kha ka chim ve te u, cuticun, kei zong nih amah cu ka biak ve lai," tiah a ti hna. Sihmanhsehlaw Herod nih khuakhannak ttha lo a ngeih kha a chim hna lo. Cucu Jesuh thah duh kha a si.
Mifim hna nih cun lam hmuhsaktu arfi cu Bethlehem (chim chungah hi hmun ahhin siangpahrang a chuak lai tiah a ti) lei ahcun an zulh. Jesuh a chuahnak hmun cungah dir in ceu sehlaw a dawh.
Mifim hna cu naute Jesuh le Mary an va hmuh hna nak innchung ahcun an vung lut i, an khukbil in le kun in naute Jesuh cu an biak. Mifim hna nih cun naute Jesuh ca i laksawng an hun iput mi zong an pek chih. Cu hna cu: sui, frankincense tihmui le myrrh tihmui hna an si. Mifim hna cu, an mang in, Pathian nih Herod sin lei i kir tthan ti lo dingah ralrin a pek hna. Cucaah nichuah lei lam dang zulh in an kir.
Mifim hna an an kal dih khan, vanmi cu Joseph mang ah cun ahung i langh tthan."Thoh tuah, naute Jesuh le Mary hi Egypt ram ah zaampi tuah hna. Cuka ahcun kal cang kan ti hlan lo paoh cu nan um lai, zeicahtiah naute Jesuh cu Herod nih thah dingin a kawl lai," tiah vancungmi nih cun Joseph cu a chimh. Cucaah Joseph cu a tho i naute Jesuh le Mary cu, zaanttim saling ahcun, Egypt ahcun akalpi hna i cuka ahcun Herod thih hlan tiang cu an um.
Herod nih Mifim hna nih an ka hlan ti atheih tikah a thinhung tuk hringhran. Cucaah Bethlehem khua le pawngkam khua hrawnghrang kum 2 tang pa ngakchia vialte kha thah dih dingin nawl a chuah. Hiti a tuah chan hi Siangpahrang thar kha thah le nawn a duh caah khan a si, zeicahtiah cun Mifim hna sinin ai ruahchanmi kha a tlamtlin khawh ti lo caah.
Herod a thih hnu ah, Joseph nih mang dang a ngeih tthan i vanmi kha a mang in a hmuh tthan. Vanmi nih cun, "Tho tuah, Jesuh le Mary kha Isarel ahcun kalpi tthan hna, zeicahtiah Jesuh that a timtu minung kha an thi cang," tiah a ti.
Cucaah Joseph cu atho i, Jesuh le Mary cu Isreal ahcun a kirpi tthan hna. Sihmanhsehlaw Herod fapa kha Judea siangpahrang a si a theih tthan caah, cuka i kir tthan ding kha a ttih. Cu ruangah Galilee tu ah an kal i cuka ahcun an khua hlun Nazareth tu ahcun an um tthan.
