Kei le Minu

"Kei le Minu"
© Van Ceu Lian

Teirawlka ka nun:
Thinlung tlap cungah nahchuaknak arak umlo, lu zong nih
arak hngal lo; nun apiang i atliang, zeizongte an thlum-al,
thinlung ngandamnak arak ttha
caan arak sunglawi
ziaza arak ngawilo
lungthin arak zerlo
thinlung, hma arak tuarlo


Atu!
Thinlung hliamh asi ri,
Atu hnu...
Thinlung, hma atuar hnu ah:
Thinlung, thlihrah bang avai;
shaimahrang in a sawnmi luri pa abang-a mawn;
hruh attih tilo, ningzah attih tilo, hmanhseh kuai nolh angamh tilo,
attihtuk cang, kuai nolh ding!

Minu
Na duhmi duhdawtnak hi
Keimah ca hmanh ah arak sunglawimi 'dawtnak' asi, ka fian!

Hmanhseh,
Thuk deuh na ruah ahcun hliamh atong cangmi thinlung caah
sui le ngun nakin na sunnak na co lai.

Nang cu
A kuaimi ka thinlung pelpawi cawmkengtu na si,
Zeitin na kut zattial nem lo cun ka him lai?

Ka tuarnak ahngalh piaktu na si:
Minu, teirawlka dawtnak ka ngeihmi chungah biathli na kheklo--
atu, ka thinlung na hliamh hnu ah na kheh!
Ka phuan:
Ka nung chung nunnak kengtu na si,
ka tuarnak aa hrawmmi na si caah.
Kei zong, na ngaihchiatnak a ngaihchiami ka si cang lai,
Naa lawmhnak ah aa lawmmi ka si cang lai.