Cawnpiaktu pakhat nih ti tlawmpal a zawimi hrai cu i put in chimh cawnpiaknak cu a thok. Hrai cu thli cungah a thlir i, "Hi hrai hi zeitluk in dah a rih," tiah sianginn ngakchia pawl sin ah, bia a hal hna.
"50gms"..."100gms"..."120"...tiin an ruahnak cio an chim.
Cawnpiaktu pa nih cun,"Zeitluk in a rih zaan ti hi ka tah dah ti lo cun ka thei ve lo," tiah a leh hna... A peh rih mi cu"Sihmanhsehlaw, ka biahalnak cu mah hi a si: Minute zeimawzet chung hi hrai hi hlir ning law zeidah cang lai," tiah biahalnak a peh.
Sianginn ngakchia pawl nih cun, "Zeihmanh," tiah an leh ve.
"Si cun, suimilam pakhat chung hrawng in hlir ning law ta?" tiah a hal tthan hna.
"Na ban a fak lai," tiah pakhat nih a vun ti.
"Na dik, nikhat chung hlir ning law tah?" tiah a hal tthan hna.
"Na ban a hit kho, na thari a fak kho, cun a zeng hmanh in na zeng men lai, i sii-inn hmanh ah kalpi na hau men lai," tiah sianginn nagkchia nih cun khu le phak in cun an hun leh.
"TThatuk. Sihmanhsehlaw, hrai a rih zaan hi tah aa thleng ve lai lo ma?" tiah a hal tthan hna.
"Nemmam" tiah an vun leh...
Cawnpiaktu pa nih cun, "Si cun, zei nih dah ka ban cu a fahter kun lai," tiah a hun hal nolh hna.
Sianginn nngakchia cu an lung a hun i tuai.
"Hrai ka thlir ruangah fahnak ka in ding mi hin zeitindah ka luat lai," tiah a hal tthan hna.
"Hrai kha chia." tiah an vun leh.
"Si hrim." tiah a vun ti hna, i a peh mi cu, "Nunnak ah tonmi harnak le buaibainak hna hi, hi bantuk hi a si," tiah a vun chimh hna.
"Na tonmi, ton liomi, ton te lai ding mi kong hna hi minute pakhat tluk hrawng te lawng in ruah ahcun, cuti ngaingai in harnak le buainak petu an si lo; sihmanhsehlaw, nikhat chung hna in vun ruat hna hmanh, fahnak le buainak cu aa thok colh ko lai...
Ruat deuh chinchin hna hmanh, naa tuai chinchin lai i na buai chinchin lai. A nepnak ahcun zeihmanh tuah awk hngal lo hmanh in na um lai.
Cu caah--nun hi hneksaknak a si, silole buaibainak hi hrial khawh a si lo tiin ruat tawn ko, amah belte--a biapi deuh mi cu, cu ruahnak 'a chiah ta hi philh hlah u'...a hlei in zaan nan ih hlan ah, philh ta dih hna u..." tiah a ti hna.
"Cuticun pei, naa rengh tuk lai lo i, panh le thawng ngai in na thawh tthan khawh lai cu, cun hneksaknak le zeimaw buaibainak hna zong na tei khawh deuh hna lai," tiah a chimh hna.
Hmuhsak: Fak tukin khuaruah le tuaktan hi kan caah nun dawptu a si. Ruah cu ruah ding a si, sihmanhsehlaw, kan dirhmun tiang a hnursawn ding in ruat hna hlah usih.
"Kan i lawmhnak le nuamhnak hme tete hna hi, angan deuh mi le a tam deuh mi nuamh le lawmhnak kan ruahchih tuk hna ruangah kan hlohhlak tawn hna..."
