A hlanlio pi ahhin unau hna pahnih an rak um. Ngakṭah buangro dirhmun in tleirawlmi an si. An nu nih tuan tukah mual a liam taak hna caah--Nu duhnak-dawtnak kong pakhat hmanh an thei lo. "Vawlei cungah Nu le hi aa dawh bik an si; pa le hi a ṭhawng bik an si," timi zong pakhat hmanh an thei lo. Cuticun, vawlei caan hi an hung hmang ve.
Nikhat cu, vawlei he iṭhen cang ko usih--vawlei nun hi a har men--a titu pa an pa nih an pahnih cun a auh hna. An pa cu tar-thih hmanh a cu cang mi a si; cucaah, ro kan vuih ta hna lai, tiah a auh hna. An pa nih cun hiti hin biaro a vui hna:
"Ka fale, ka bia hi ngaita hmanh u. Nannih cu ngakṭah buangro dawh nan si---cucaah nanmah le nanmah rak idaw cikcek u mu, rak i sivel hlah u, rak i zawnruat u. Nu nan ngei ti lo, cun pa zong nan ngei ti lai lo. Cucaah, nanmah pahnih hi unau dirhmun pinah, nucan le pacan nan si ahau. Innpa ṭha nan si ahau. Ka bia hi nan lungtlap iṭial hnik hna ulaw, nan ruahnak chungah ifim hnik hna u; zeicahtiah, ni nikhat ahcun rawhralnak nih an tlunh te hna lai. Cucaah, nan tlu sual ko hnga ti ka phang...ka bia hi i cinken hram uh," tiah a ti ta hna.
Cu ahcun: "Khah! Cawtum pi pakhat ka ngeih--leithuannak ah rak hmangṭi te u, u ting nau zo tein ihrawm uh. Cun, "puan" zunkhat te ka ngeih, cucu nan pahnih tein rak ihrawm uh. Khuasih nih an hrem sualnak hnga lo rak i hrawm uh," tiah a ti hna ta hna. Cuticun, a thukmi muihnak lei ahcun a tli.
Dawtnak kong a tep ve rih lomi unau hna pahnih cu muihnak thlam nih ahun silhnalh colh ve hna. Nu an ngei lo i pa zong an ngei ti lo. Harsa ngai in lei caan hi an rel lio ah, an pa bia bang rawhralnak tampi an hun ton taktak.
Nikhat cu a upa nih a thawh i, "Ka nau, kan pa ro hi icheu usih, cun keimah nih kaa ham hmaisa lai," ti a si. A nau nih cun, "Ka u, ihrawm ko usih, kan pa bia kha na hngal ti lo maw," tiah a hun ti. A u nih cun, "A thi cangmi nih cun...cu bia le bia lo cu...a rannak icheu usih," tiah a vun ti. Cuti cun, an pa ro cu an icheu--upa deuh pa nih ham hmaisa kaw: cawtum pi kha--a lai in a tawlei kha aa thim. Puan zong cu, a u nih cun zaan caah aa thim. A naupa bal cu, chun caan; a herh lo lio caan ah puan hman ding a si le cawtum pi a lai in a cung lei a ting. Cucaah, a naupa nih cawhnuk a tingzo ve ti lo. Cuticun, ttamhal ngai in khuacaan a rel tawn caah, a caah a har tuk.
Nikhat cu, a nau pa nih cun, "Ka u, zaangfah tein na cawhnuk ka hrawm ve," tiah a hal. A u nih cun a siang lo. A lai in a lu lei paoh kha na duhning in ituah ve ko, ti a si. Zaan caan a hung si, a nau nih cun, "Ka u, ka khuasik tuk, zaangfahnak tein na puan ka zawh ve," tiah a hal ṭhan. A u nih cun, "Chun ah na ta a si bangin, chun caan ah ithuanh te ko," tiah a ti mei.
Cuti lengmang cun ni le thla hi an rel. A upa cu ai nuam dom i a pa nih biaro a vuihmi hna ha zei ah a rel ti lo. A naupa cu pawṭam nih ahrem, khuasih nih a hrem. Cuticun, rawhralnak nih cun a tlunh taktak hna.
Nikhat cu, cu bantuk an sining le dirhmun ituarh ti lo ah, a naupa nih cun cawtum pi cu a thah. A lai in a lu lei paoh kha (amah covo) a lak i a zuar. A upa nih cun, "Zeiruang ah na thah," tiah a thinhung ngai in a vun hal. A nau nih cun, "Ka hrawm kan ti lio ah na ka hrawm ve lo, cucaah keimah ta a si lio te ah ka thahmi si ko hih! I chir lai cih! Na covo khi ilak law na duh ning tein tuah ve ko," tiah a vun leh. A thaizing ah puan zong cu a zuar bak hoi. Zaan cu hung phan kaw, a u nih, "Ka nau, khoi ka puan kha ka pe cang," tiah a vun ti. A nau nih cun, "Ka zuar," a vun ti mei. A u nih cun, "Ho nih zuar an ti," tiah thinlin tak khin a hun ṭhuat. A nau nih cun, "Keimah nih kaa ti! Ka khuasih caan zongah na ka hrawm ve lo--cucaah, keimah ta a si lio ah ka zuar," tiah a vun ti. A u nih cun, "Si cun, tangka zat ceo in ka pe," tiah a vun ti. A nau nih nih cun, "Nemmam! Keimah ta a si lio, chun ah ka zuarmi a si," nangmah he zeihmanh aa ceihnak a um lo a ti mei.
Hnabei kuakmei dongh in a hun dongh hnu, muihnak thlam pin lei ahkhin a u nih cun thil pakhat a hmuh. Cucu hihi a si: dawtnak, zawnruahnak, zaangfahnak hna hi nunnak caah pei nu le pa, u le nau, hawi le kom an si hi! Ka pa nih a kan ti ṭheo mi kha; kan i dawt i kan zawn kan i ruah i kan i zaangfah ahcun, nuncan le pacan hmanh a dir kho mi pei kan si hi," tiah mitthli a ṭap.
Hmuhsak: Dawtnak, Zawnruahnak, Zaangfahnak hna hi nunnak caah nu le pa, u le nau, hawi le kom dawh an si taktak.
