Kum 6 in 7 tluk ngakchia ka rak si lio ah, ka nutar nih a thlawh dum chungah arak ka kal pi. "Cu dum chung ahcun thlaici a rak ka thlak pi..." Cu dum chung ahcun, Mei-tei, Mirang khuhlu, Zil tbk... tampi an um hna. Cu lio i kan rak thlak mi thlaici cu Peti le an-ttam ci hna, an rak si. Hninghno ngai le tthawng ngai in an tthan khawh nak hnga caah ti'n, Vok-ek cu; cu dum chung ahcun kan rak thlak chih. Chunnitlak te kan tuah hnu ah rian cu kan lim. Aba zong ka rak ba taktak. "Thing-ngiah" tlang pahnih arak ka pek. Ka thabat zong ka rak philh dih. Ngaidem tangah kan i din(inn chung).
Thlaici kan thlak pinah, Vok-ek kan toihmi kha ka khuaruah a rak har ngaingai. Ka nutar cu ka hal "Ka nutar, ziah mah hi thlaici kan thlak pinah fih a nungmi Vok-ek hi kan toih rih," ka rak ti. Ka nutar nih cun "Tuhmui cu a lak i a thianh pah khin, aw...thlaici tthannak caah a ttha," a rak ka ti. Cun a peh rih i " Hi thlaici hna hi an keuh i an tthen tikah, ti-toih an hau tthan te lai," a ka ti. "Kan ei te lai, kan din te lai ti cu pakhat hmanh a rak ka chim lo."
Ka nutar cu ka hei hal tthan, " ziah? an zat tikah kan ding-ei te hna lai lo maw ka rak ti...khuaruahhar nawn khin..." Ka nutar nih cun, " Zawng, an zat khawh ding ahcun ti-toih an hau, nawn pek pei an hauh cu," a rak ka ti.
Cu ka nutar bia nih, a tu ceo ah ka lungmit a au ter. "Nu le pa nih hin, Fa le hi hmet lio tein ttha tein rak kan zohkhanh hna hlah sehlaw, rianttuan tu ah rak kan hmang colh hna sehlaw,...zeibantuk minung ahdah kan vai chuah hnga? Sianginn ah fimnak hi kan cawn ter hlah sehlaw, Sunday School te hna rak kan kai ter hna hlah sehlaw,...zeibantuk minung ahdah kan i can hnga? Ei le din in rak kan cawm hna hlah sehlaw, bia le kaa in kan chimhring hna hlah sehlaw,...zeibantuk lamthluan ahdah kan um hnga?
Fak piin ka ruat! Ka ruat!...I ka hmuhmi cu " Pakpalawng chungah pakpalawng a kawl mi Minung kan si hnga," ti hi a si.
Fimnak kawl ding ah caanttha kan ngeih lio ah, fak piin hmai ah nor usih. Con tawn len ko hmanh usih law ttul len hna hlah usih. Harnak le Fahnak ton cu zeiruang ah na ttih? Nunnak i a van pei an si ve ko cu. Fimnak hi kawl hmanh usih, Nunnak sullam pi hi kan pemh ko lai.
