Hlan lio pi ahhin Zu siangpahrang nupa an rak um. Fanu dawh te an ngeih. An fanu hi an dawttuk hringhran i a duhmi paoh hi tlamtlinh piak khawh an i zuam. Ni le thla cu liam lengmang kaw tlawmpal lo ah, an fanu cu va ngeih a hun cu. An fanu ttha tein a zohkhenh kho ding mi le a daw ding mi kha an kawl: An nupa cun an fanu caah vawlei le van cung i a tthawng cemmi tthitpiak ding ah, an hna a tla. Cu ahcun, Nika hi a tthawng bik tiah rak ruah a si. Cucaah, Nika cu an hei fuh.
"Nika, nangmah hi a tthawng cemmi na si; cucaah kan fanu caah kan in duh! Kan fanu he nan i um lai..." tiah an vung ti. Nika nih cun, "Keimah cu ka tthawng bik nemnam lo; ka nak in pei, Khuadawm a tthawn deuh cu! Kei cu a duh ah a ka phanh, a ka langhter lo, a duh paoh in pei a ka tuah ko cu..." tiah a rak ti hna. Cuticun, Khuadawm sin ahcun an kal tthan.
"Khuadawm, nangmah hi a tthawng cemmi na si caah kan fanu he umtti dingah kan in duh! Kan fanu caah kan in ham..." tiah an va chimh. Khuadawm nih cun, "Nemmam! Keimah nakin thli pei a let in a tthawn cu: a duhnak lei paoh ah a ka hlawnh in a ka tthial khawh cu teh; Thli sinah vungkal uh," a vun ti hna. Thli sin ahcun an kal.
"Thli, nangmah hi a tthawng cem na si caah kan fanu he itthitum ding ah kan in ham." an vung ti. Thli nih cun, "Aih! Keimah ka tthawng bik lo. Keimah nak in pei Chuncung-bo a tthawn deuh cu. A zeitihmanh in ka choih kho lo," tiah a vun leh hna. Chuncung-bo cu an va fuh.
"Chuncung-bo, a tthawng cemmi na si caah kan fanu hi na sinah pek kan in duh," tiah an vung nawl. Chuncung-bo nih cun, "Ka si lo! Keimah nakin pei cu Cawtum a tthawn deuh cu. A ka nawr cang ahcun a celh in ka celh lo teh! Cawtum a tthawng cem," tiah a vun leh ve hna. Cawtum cu an vung fuh bak hoi.
"Cawtumpi, ho paoh nih a tthawng bik an in ti caah kan fanu hi na caah pek kan sian," tiah an vung ti. Cawtumpi nih cun, "Cu bang cuh! Keimah nakin pei Hri a tthawn deuh suaumau cu. Hri nih cun: cawlcang lo le duh paoh hmanh tuah thiam loin pei a ka tlaih khawh cu..." tiah a vun chimh hna. Hri cu an va fuh tthan.
"Hri, nangmah bak hi a tthawng bik an in ti caah kan fanu hi na caah kan in pek lai," tiah an va biak. Hri nih cun, "Cu ngai cu! Nemmam! Keimah nakin pei Zute a tthawn deuh cu. A duhduh in a ka ttei khawh si. A duhduh in a ka chah khawh," tiah a vun chimh ve hna. Zute cu an va fuh.
"Zute, nangmah hi a tthawng bik na si caah kan fanu zohkhenhtu ding ah kan in duh," an vung ti. Zute le an fanu cu puai cu tuah hna kaw; ram chung zu vialte an ilawm dih. Cuticun, nuam taktak in mah phun le mah phun te an i um i an i daw. Phun hawi ca zong ah cinken awktlak le hngalh camcin awktlak puai sunglawi ah a cang.
Hmuhsak: Mah phun le mah phun itthitvat hi a ttha hrim ko. Taksa, Thinlung, Thlarau ah thuk piin dawtnak hram arak fek cia cang i, a tthawng cia cang.
