Aa hngilh cuahmah lio mi Chian-deih hmai ah Zute cu 'tem-tem' tiah a hung tli. A itmi Chiandeih cu tthang kaw; thinhung ngai in Chiandeih cu a hung tho. Zute cu a tlaih i ei colh a vun thimh. Cu ahcun, Zute nih therphang ngai in khin: "Ka nunnak na ka zuah a si ahcun, na ka zaangfahnak kan cham tthan ve lai--ni nikhat ahcun kan khamh ve lai," tiah a hei ti.
Chian-deih cu dang huahmah in a ni salam i a ka siamkhat hmanh tling lomi Zute cu a thlah. Ni sau hmanh a liam lo, ramvai pawl an rak vakvai i Chiandeih cu an hmuh. Hri hrual tthawng ngaingai a simi cun Chiandeih cu an khuh, i an tlaih. Chiandeih cu hrum len kaw...Zute nih cun ainak aw thawng cu a vun theih, i a rak fuh.
Zute nih cun, an ttemnak hri cu 'chet-law' tiah a ttam vutmat. Beo khat hnu beo khat in a vun chah duhmat hna. Tlawmpal ahcun hri vialte cu a ttei dih ko. Chian-deih pi cu a luat cang. Zute nih cun: "Zeirel lo le nihsawh in Zute hna nih cun zeidah a ka bawmh khawh hnga tiah ruahnak na ka euh hnawh, Sihmanhsehlaw, tu ahcun ka sin bawmhnak na hmu taktak ve cang ko lo maw?" tiah a hal.
Hmuhsak: Santlai lobik timi zong hi tthathnemnak tampi an ngei tawn ve ko.
