Hlan lio pi ah hin Ni, Ruah, Thli, Thlapa le an Nu kha an rak um hna. Cun an U Arfi kha anmah he aa hlat nak hmun ah khan a um. Nikhat cu an U Arfi kha len an i tim, ti a si. An i timh bang cun an U Arfi sin ah cun an va leng. Arfi a umnak kha a hlat ngai caah sau ngai an rau. An U Arfi sin an va phanh le cang ka in; an U Arfi nih arak don hna i nuamhnak nganpi a tuah piak hna. Cun, rawl-dum tinak a tuah pi hna, puai phunkip a tuah pi hna. Cu an i nuamh cuahmah len lio le rawl an ei lio ahcun Thlapa te nih cun "Ka Nu hi rak i tel ve sehlaw aa lawm tuk ve lai tiin a lungchung in a Nu cung ah siaherh te a ngeih zungzal." Nain a dang cu Thlapa bantuk cun an si loh, an mah nuamh in an i nuam i, an ding an ei. Arfi sinah cun sau ngai an cam. Cun caan avun liam ziah-mah i tlun caan kha a hung phan cang,... tlun din cun an i thawh hna i, "Thlapa te nih cun ka Nu caah tiin Changreu hlumkhat te kha aa put," ti asi. An vun tlun pah ah cun Ruah kha aa lawmhnak langhter awk ah Fak piin a sur, ti a si. Cu ruah nih cun a Changreu kha a cin dih. Ni nih ruah bantuk cun aa lawmhnak langhter nak ah Lin taktak in a tlang ve, ti a si. Ni a vun tlan bak ahkhan changreu cinmi cu a zeimaw a ro pah. Cun, Thli zong cu an mah bantuk cun asi ve. An Nu sin cun an Van phan i an Nu nih pakhat cio bia ahal hna.
Ninu Cerlian : "Anu nih khah nang U Pa cem ah kan hal hmasa lai a ti. Anu nih cun, naa nuam maw" ati. Nika nih cun nuam tuk ko , a ti. Anu nih zei tal na ka put ve maw? a ti. Nika put hlah, ati. ANU nih cun nangmah nuamh-nak na tinak ah na Nu cu na ka philh, cucaah nang cu Na tlan tik i Na link tuk ah cun mi nih Ni baw, Ni cai, Ni bator, an i ti lai, Na Tlan lo ah cu bantuk thiam cun an i ti lai, tiin chiat a serh."
Ruah : " Anu nih khah nang Ruah kan hal ve lai, a ti. Naa nuam tiah ahal. Ruah nih cun nuam tuk, a ti. Anu nih zei tal na ka put ve maw? a ti. Ruah nih cun, ka Nu kaa nuamh tuknak ah ka philh diam, kan put loh hi, tiah a hei ti. ANU nih cun nangmah nuamh-nak na tinak ah na Nu cu na ka philh, cucaah nang cu Na surtuk tik i Na tuh/lianh tuk ah cun mi nih Ruah baw, Ruah cai, Ruah bator, an i ti lai, Na Sur lo ah cu bantuk thiam cun an i ti lai, tiin chiat a serh."
Thli : "Anu nih khah nang Thli kan hal ve lai, a ti. Anu nih cun naa nuam maw? a ti. Thli nih cun nuam tuk, a ti. Anu nih zei tal na ka put ve maw? a ti. Thli nih cun, ka Nu kaa nuamh tuknak ah a put kan philh, tiah a ti ve ttheo. ANU nih cun nangmah nuamh-nak na tinak ah na Nu cu na ka philh, cucaah nang cu Na Hran tik i fak tuk in na hran ah cun mi nih Thli baw, Thli cai, Thli bator, an i ti lai, Na Hran lo ah cu bantuk thiam cun an i ti lai, tiin chiat a serh." An nu lung cu an donghter hringhran cang ko.
Thlapa : "Anu nih na khawl tlawnnak cu naa nuam maw ti? Thlapa nih cun nuam pah ko, tiah a hei leh. Anu nih zeital na ka put ve maw? tiah a hal. Thlapa nih cun, ka Nu tam cu kan put kho loh, Changreu hlumkhat te kan put, amah belte ka U Ruah nih lampi ah faktuk in aa lawmh-nak alangh ter le acin dih, ka U Nika nih aalawmh-nak alangh ter ve le tlawmpal acheu cu aro, ka U THli nih faktuk in aa lawmh nak a langh ter ve le a mawt pah dih, ati. Changreu cu aa chuah i a hei pek.
A Nu nih cun nangmah cu thluachuak mi na si lai, Na van lo paoh ah Mi nih Thlapa te aw Rungvang law an in ti lai, an in kawl, na van ah le Mi nih na min an in hlorh lai, tiah a ti.
Hi tuanbia hi Nu le Pa nih kan Fale kan chimh hna awk asi, Nu le Pa dawtnak an theih khawh nak ding caah.
