Nikhat cu Lian Lian timi ngakhchia pate cu rili kam ah lente aa celh. Amah lawng asi caah a duh ning in aa nuam kho lo. Cucaah, keimah he lentecelh tti ding ah "hawi pakhat kaa ser lai tiah," ati.
Inn ah cun a va ttin, i a Pa kha tangka a hal. Cun, amah nih aa khawnmi tangka he khan a fonh Tilawng hme nawn te-thing in sermi cu a cawk. Cu lawng a cawk nak ah cun aa khawn mi phaisa kha $15 te lawng a taang.
Nikhat cu rili kam ah cun a Tilawng te he cun an nuam, lente an i celh tti. Lian Lian nih hawithar ka ngei tiah aa lunghmuih ngaingai.
Vanchiat ah! ...aa nuamh lio pi ahcun ruah lo piin an inn pawng ah hrawng khin inn kangh meikhu cu a hmuh. Kan inn asi sual lai ti a phang tuk, a ttih zong a ttih tuk. Cucaah a, a thinphan buin inn lei ahcun a tlik in a tli. Aa ranh tuk nak ah a lawng te cu a philh taak.
Inn ah cun a va phanh tik ah an inn a rak si lo. An inn pawng hna inn tu, a rak si. A thin cu aa domh i 'Pathian! Pathian! tiah a au len. A nu nih a auh i a nu sinah cun a vung kal. Thil a cang mi cu a rannak in mei-tthattu pawl le palik pawl nih ttuanvo an lak caah, chikhat te ah a hung dai.
Lian Lian te chungkhar zong, an hnangam tthan. Mah khan Lian Lian nih cun, "Elaw!! Ka lawng, a vun ti." A lawng te kha a hlam tikah Tiva kam ah pei ka philh kha, tiah a vun theih.
Tiva kam ah cun a rannak in a va tli tthan. Hohmanh an rak um ti lo. Ngatlai pawl lawng kha an rak um. An sur an remh pah cuahmah lio, a rak si.
Lian Lian nih cun, "Lawng hmete nan hmu maw" tiah tiah a hal hna. Ngatlai pawl nih kan hmuh lo an ti, cu caah Lian Lian cu a ngaihchia ngaingai. Lungnuam lo ngaiin inn ah a ttin.
Aa nuamh pi hawi simi Lawng nih a tlau taak tikah; a ngaihchia hringhran. A nu nih rawl kan ei lai a ti zong ah a duh lo. Zeitin na um tiah a Nu nih ahal nain a let lo. A Pa a rak ṭin i a Nu nih Lian Lian hi ziah rawl zong a ei duh hnga lo. Lung nuam loin a um ee tiah chimh.
A Pa nih cun a ruahawk ka thei ve lo, tiah ati. Zeiruang hi tin na um an ti zong a let duh hna lo. A Nu nih Lian Lian ra law dawr kal ka zul a ti. Huam lo ngai in a nu zulh ahcun aa thawh. Dawr an van kal i khua a van hoi supsap nak bak ah dawr pakhat chung ah a Tilawng hmete kha a hmuh. Aa lawm tuk hringhran i a va zoh i mah hi ka lawng asi tiah dawr ngeitupa kha a va ti. A min te kha arak ttial taak mi a um, hi mah hi ka min asi. Lian Lian ka si, a ti.
Dawr ngeitupa nih cun Ngatlai pawl nih $15 in an ka zawrh mi asi caah $15 rak tlanh, tiah a rak ti. Lian Lian cu aa lawm tuk i a Nu thil cawkmi kha zawkzawk tein inn ah a va chiah, i phaisa aa khawn mi te kha a zoh. $15 te bak arak um ve.
Khan dawr ahcun lawng lak ahcun a va kal, i a lawng sin ah a timi cu, "Ka Lawng te ka sin in na tlau nain tu cu ka sin ah na kir than cang, a ti. Aa lawmhnak mitthli te zong a tla.
Hi tuanbia nih akan duh piak mi cu kannih Lei misual hna zong Pathian hawi ah sermi kan rak si nain nawl kan rak ngeih lo ruang ah kan rak tlau i Fapa Jesuh thawng in Pathian nih ka min ka khanh mi an si cang tiah Satan sin ah a chim. Fapa Jesuh nih akan khamhnak i ka Fa le ka sin in saupi nan tlau nain a tu ka sinah nan rak kir than cang kaa lawm tuk ee tiah akan ti ve ee.
