Pangpar khi aa dawhnak le a rim hmuinak hngalh le teh khawh na duh ah cun, a pawng te in zoh law a fiang dih ko lai. Cu bang, minung zong hi, aa dawh nak le a sining theih na duh ah cun, a lungthin le hoihher in zoh law afiang ve ko lai. Kotho ziaza hi thuh khawh asi lo, sum khawh zong asi lo. Zeicahtiah, nunnak caah lam a dap chung tu asi cang. Aa dawh bik pangpar hmanh khi na tawh ah cun a uai zau ko lai, cu bang, nu kip/ pa kip khi tto hna hlah, zeicahtiah an nih cu an uai zau ve cang lai. Na ttawh mi pangpar cu vawlei ah na phun i, ti rim na theih ter i, ti na pek ah cun, Nun hram asih than zau ko lai, cu bang, Minu/Mipa na ttawh asi ah cun, dawtnak, theihthiamnak, tlaihchannak he kilveng law, hmuh khawh lomi thil chungah hram fek piin asih lai. Khuai khi zohmanh, a uai cang mi par a tlan ti lo, cu bang, mikip nih a uai cang mi Nu/Pa cu an tlan ve ti hna lai lo, cucaah mi nunnak na hrawh sualnak hnga lo i ralring. Duhnak hi cawn lo kawl loin kan hngalh, kan ngeih cio mi asi. Hmanhseh, va duh sawhnak le duhnak chung lawng umnak men ah pamh heih tuk hna hlah usih. Een ttha par cu khuai nih a tlenh i tizu le hliti thlum a chuah bang, na caah een ttha par kha tlanh ve law, nan caah tizu le hliti thlum chuah ter ve. Par khi vawlei aa dawh tertu le a ttamh hmuaih tu asi, cu bang, nang zong an ngei/co tu caah aa dawh par bang si law, hnemtu ttha si ve. Va duh khi cu zeihmanh asi lo, duhdawtnak chung i um khi cu zeimaw cu asi , duhdawt zong duhdawt, duhdawtnak chung zongah um khi vawlei pakhat nan ser asi. Par khi ci an ngei dih, chan tling tein an par hnu ah cun, an za, an uai, an car, an ci kha vawlei ah atla i a hninghno mi par rual kha an sem tthan, cu bang, nang le na duhdawt mi nu/pa karah chan tling tein zattial kuttlaih sihlaw, ci ttha ser u, cucu, i duhdawtnak kan par ter zong asi. Mi nu/pa pakhat na duhdawt mi kha kal tak lengmang hlah, zeicahtiah, duhdawtnak hi zei rel loin na um ter sual lai.
