A hlanah a nuam ngaingaimi tupi pakhat a um. Ei awk din awk tlamtling tein a um lengah tlawnlennak ah a nuam tuk hringhran. Mah tupi chungah cun ngal rual an um i nifate nun nuam ngaiin an ei an ding, an tlong an leng.
Mah tupi cun a hlat tuk lonak ah tupi pakhat a um. Eidein awk zeihmanh a um lo lengah tlawnlennak ah a nuamh lo caah saram dang pakhat hmanh an um lo i pawpi pakhat lawng a rak um.
Cu pawpi cu ngal rual an umnak tupi ah cun a va kal. Ngal rual hna cu a va hmuh tik hna ah ngal pakhat kha a seh i a umnak ah a kirpi. Cu bantuk cun nifate ngal cu pakhat lengmang a seh hna i hnarcheu hrawng lawng an tang cang.
Ni khat cu an hruaitupa nih a pumh hna i, " Hi bantukin kan um lengmang ah cun kan thi ko lai. Hmun dang ah kan zamtak a hau lai." tiah a ti. Ngal dang nih cun, " Hmun dang a thatnak ah cun kan zam ko lai," tiah an ti ve i hmun dang i zam ding cun bia cu an chah.
Asinain ngal note pakhat nih, " Kei cu mah tupi chungah hin ka chuak i ka tthang. Nihin tiang lunglawm in kan tlong kan leng kan ei kan ding. Ka dang tupi cu zeitluk hmanh in nuam seh law kal ka duh lo. Pawpi cu kan dihlak in kan seh lai i a thi ko lai, " a ti hna.
Ngal dang nih cun an vun ruah ve i, " A hmaan ko. Kan dihlak kan i bawmh ahcun pawpi cu kan thei ko lai, " tiah an ti dih tthan i an biachahmi cu an ngol tthan.
Thaizing khua a dei tikah pawpi a rat tawnnak cun an dihlak in an rak bawh. Pawpi cu ngal sa ka ei tthan lai, tiah zei poi loin a ra. Ngal rual nih cun hmakhatte ah an i bawm i an seh i an thah.Mah hnu cun zeihmanh ttihphan thlaulaunak um lo tein nun nuam ngai in an ei, an ding, an tlongleng tthan.
Cucaah cun nifate nan tlonlen, nan eidinnak ram nuam hi ral nih an doh hna ahcun lungnge tein nan doh hna lai. Nan tei hna lai i nunnuam tein nan um lai.
