Zingkhat cu ruahnak pakhat he ka hung tho. Cu ruahnak cu hihi hi a si: "Nizan i lawmhnak bia ka chim mi he lawng tho ning law, zei he dah ka thawh hnga?" tihi a si.
Nizan caan sinah mitthlam he ka vun kir ta duak; zeihe hmanh ka tho lai lo ti kha ka hmuh! Paw le thazaang ca cu chim lo, ka thaw te hmanh he zong ka tho lai lo. Ka ihnak kaltaak in thlalang hmaiah ka vung dir. Nihin hi zeiruang ahdah ka hmuh? tiah keimah le keimah kaa hal. Sihmanhsehlaw, zeihmanh ka hmuh khawh mi a um lo. Nain, thil pakhat ka lung ah ummi cu, "Pathian nih vel a ka ngeih caah a si," tihi a si.
Nizan i lawmhnak bia kaa-khat tal ka chim lomi cung ah ka khuaruah a har. Suimilam 24 rulmal chung i lawmhnak vuikhat hmanh chim lo, nun phu hmanh ka si hnga maw tiah khua ka ruat. Ka lung aa nuam lo. Ni le caan hman zong hi um a har khun. Hawikom ṭha ngeih zong hi a har rua dah, ka ti. Lileng in...
Ka u le nau, ka nu le ka zoh hna. Nizan ah lawmhnak bia an chim ve hnga maw? tiah chung-sivang ngai in keimah le keimah kaa hal. Ka kawlmi 'a phi' cu chikhatte ah ka hmuh colh. An chim ve lo a fiang--inn chungkhar ah kan buai ngamsam... Ka nu nih cun a chim lengmang ko lai, tiah ka zumh. Ka u le nau bal--kemah nak hmanh in an ciangkuang lo deuh. Nizan ah lawmhnak a um lo, i nihin zong ah lawmhnak a um lo. Roro le carcar in kan i khawk cio. Nuam lo tuk eih...
Zeiruang ahdah lawmhnak bia ka rak chim lo timi khua ka ruat. Zaan ka ih lai i, chunmang ka ngeihmi vialte...aize! Mah ruangah si lai ti ka hung i fiang. A tak chung ah nun loin chungmang chung ah caan tamtuk ka nung--cucu, ṭih a nung ngaimi zawtnak pakhat a si. Minung hi kanmah le kan sining pin hoih in lawmhnak le nuamhnak kan i ruahchan ruang ahhin, kan ngeihchunh lawmhnak le nuamhnak te hmanh kan thlau tawn dah ngai, ti ka pemh.
Tuni thok cun: nihin ah lawmhnak bia chim hi kaa thawk. Chim ding ka ngeih lo zong ah ka kawl--chim ding umlo tak timi cu ka ngei hraw lo. Keimah pumpak te lawng hmanh chim lo, inn chungkhar ning pi in ngan a dam deuh suaumau. Lawmhnak ka chim khawh deuhdeuh paoh ah ka(n) nun a merzaang, i ka(n) tha a dam. Hmailei caan ca zongah a nungmi ruahchannak le zumhnak kaa/kan tlaih khawh. Nun zong hi sullam a ngei.
Lungduh: Nihin caah lawmhnak bia chim zungzal ve. Nihin kan chimmi he lawng thaizing ah kan thawh taktak ahcun--pakpalawng dawh kan si ko lai cuh. Duhdim nun na duh cun lawmhnak bia chim zungzal.
