Chungkhar caah zaanriah a rak timlam lenmi nu cu manh lo ngai in innte ahcun aa tuai. Cabuai pakhat cungah hun a herhmi ti le rawl cu a vun hun dih hna. Hnawhhnam ngai in rian in a rak lawi mi a va cu i phuhrung nawn khin, a fapa he cun din-ei awkah an ṭhu. Pa nih cun an nu cu a thawh i, "Kan nu, chimh ding bia kan ngei," tiah a ti. An nu nih, "Ka chim kho hih," tiah a vun leh. Pa nih cun, "Silo, pumpak in kan iruah awk a si. Eidih hnu tu ah kan chimh te lai. Ei rih ko," a ti ṭhan. An nu mithmai cu a panh ziar ti lo.
Rawl ei cu awlokchong ngai in an vun lim. Bel le kheng a vun fimtawl dih hnu ah ihnak khan lei cun an lut. An pa nih cun an nu cu,"Kan nu, i ṭhen usih. I mak usih," tiah a ti. An nu nih cun,"Aherh lomi hi rak ka capo tuah hlah," tiah a vun leh. Pa nih cun,"Ka biatak a si. Kan duh ti lo. Kan daw ti lo. Kan i ṭhen ko lai," tiah a vun nolh. Nu nih cun mitthli he, "Naa biatak maw?" tiah a hal. Pa nih cun, "Biatak!" a ti. (Pa hi a thli tein a rianṭuannak ah duhmi a rak ngei ziar cang--cu a rianṭuan ṭi hawi nu nih cun a lemsoi ca zongah, a si fawn rua).
Pa nih cun a thawh i, "Nangmah he kan i umnak ni thok in lawmhnak timi zong ka hmu kho ti lo. Dawtnak zong hi ka tep kho ti lo," a vun ti. Cun, pa nih cun,"Kan ngeihmi thil cung ahcun na thinphang hlah a zet in kan i cheu lai," tiah a ti. Nu nih cun,"Inn le lo, thil le ri, sawm le ngun hi ka herhmi an si lo. Cu vialte nak cun kan fapi hi a si deuh. Na ka duh ti lo cun kal ding cu ka rian a si nain, hi kan fa ca ahhin tah na tuak ve lo maw," tiah a vun ti. An fapa camipuai ngeih lio si fawn caah an nu nih cun,"Na sinah thlakhat in ka um rih lai," a ti. "Thlakhat hnu ah ka kal te lai," tiah a leh.
Pa nih cun,"Si cun, biakam ter kaan duh mi a um: kan fapa na theihter lai lo. Thlakhat a dih bak in na chuak lai," a ti. Nu nih cun,"Nifatin, kan innpi in ihnak khan tiang na ka cawi peng ve lai," tiah a ti ve. Cuti na tuah lawng ah ka lungtling lai a ti. Pa nih cun si ne seh, a ti ve.
(Kapkhat lei ah, mipa le a rianṭuan ṭi hawi nu cu ṭhitumnak te pawl tuah ding ah khua an khang cang. Zei bantuk hni le puan dah kan i hruk-aih lai tiah khua an tuaktan len cang...)
An biakam le an biasih bang cun zing fatin innpi in ihnak khan tiang mipa nih cun an nu cu a cawi peng ding kha, a hung si. Nikhat ni zing bakin aiawt i an nu cu a cawi--cu thil cu an fapa nih a hmuh tikah aa lawm tuk hringhran. Mipa nih cun an nu mithmai a zoh ahkhin a huat hna a zual chin. Zarhhnih chung cuticun, an pa nih cun a cawi i zei holh ring loin rian ahcun a kal taak lengmang. (Vanchiat ah an nu hi cancer a ngei, nain an pa nih cu bantuk thil sining a vun chuah pi tikah cun a chim ngam lo. Thih caan zat in thi te ko ning timi lungput lawng a ngei cang.
Cuti, zingzaan in innpi in ihnak khan tiang an i cawi lengmang tik ahcun an pa lung hna a ṭha pah ve ti lo. Khua zaza hna a ruat hnik cang. Aban cung i an nu a mit a vun i chimh le dai zirzir tein a um ko a hmuh ahcun a lung hi aa thleng hnik lengmang---cucaah a rannak in a cawi a chiah lengmang. Cuticun, zarhthum tiang an vun kal cang.
A zarhli nak ahkhin cun an nu hi a zaang tuk in a theih cang. A pum le rua zong hme deuh in a theih cang. Cu thil hrimhrim nih cun, an nu a lungrawh ning le a va he ṭhen a duh lo ning kha a hmuhsak tikah, pa cu a ngaihchia ve. Aa ngaihchih. Khua a ruat i a hmuhmi cu,"Aa! Kan nu hi keimah nih caan ka rak pek lo tuk ruang ah le keimah nih dawtnak ka rak pek lo tuk caah pei, keimah le keimah lila nih dawtnak taktak ka rak hmuh khawh lo hi a si ko hi, ka palh tuk hi ta," tiah a vun ti. Nain, an biakam tlinnak hnga caah a ni--nihnihthum lawng in a taang cang. Pasal ka lung cu i thleng ti duh hlah ning ai ti.
A thaizing cu an hung phan. An fapa nih cun,"Tucu ka pa nih ka nu a cawi caan si cang lai," thawngthanh fial bang a hun hau. An fapa nih cun nitin in an tuah awk rian hmuh in a hmuh cang. An pa nih cun an nu cu zaang tukin a cawi. Cucaah, a lung ṭha ti lo. A mitthli a vun tla. A rannak in rian lei ahcun a tli i a rianṭuan ṭi hawi nu zungkhan kutka cu a vung kingh. "Rak lut," timi aw a don le cang ka in innka cu a awn i, "Rak ka ngaithiam, sihmanhsehlaw kan pahnih hi kan i ṭhium ṭhan lai lo," tiah a ti. Kan nu nih a ka daw lo, a ka duh lo, a ka tlaihchan lo tiah ka ruah mi hi ka palh. Keimah nih caan ka rak pek lo bia si, tiah a vun ti. Nu nih cun thinhung ngai in innka cu a tengh i lenglei ah a chuah taak.
Pangpar dawr pakhat ah pangpar cawk ah Pa cu a kal. An nu pek ding caah cawk ai tim. Pangpar zuartu tarnu nih cun zeitin ca kan ṭial piak lai tiah a vun hal. Pa nih cun,"Nifatin in kan cawi peng cang lai," tiah hei ṭiala ti.
Pangpar tawm he nuam ngai le phang in inn lei cu a panh. "Kan nu! Kan nu!" a vun ti ahkhin an nu cu ihnak khan ah a rak thi diam ai. Mitthli he cun a zuan hnawh i,"Ka ngaithiam ka palh," tiah a vun ti. Ai ṭhang hlei ti lomi an nu cu sii-bawi te nih an zohhlai i an hmuhmi cu: cancer a ngeihnak thla 2 hrawng si cang, ti a si.
Mipa cu lungtawne tiang in a ṭap. A linsami mitthli cu a biang cungah an luang. Aw, keimah ṭhat lo le palh pei si ko hi. Zeitluk mihrut dah ngai ka va si...kan nu zawtfahnak theih awk hmanh ka rak hngalh lo hi. A derthawm lio tal khan rak hal ding...kan nu ka ngaithiam, tiah a ṭap. A tle cia cawhnuk cung a ṭapmi mipa nunnak ah a nganbik palhnak a tuah pinah a ngan bik dantatnak a hmuh. Ngaihchih zong ah a dih cangmi nih a hlawm dih cikcek.
Hmuhsammi: Pale hna, vale hna, nupi le hi daw hna uh. Caan tampi pe hna uh. Lawmhnak pi hna u, nuamh pi hna u. Inn chungkhar ah pakhat khat theihthiam lonak a can sual tikah: nan i pehtlaihnak silole nan i dawtnak chah le kaltaak tim loin, a hman lomi ruahnak le lungput tu kha kaltaak uh. Cuticun, pa ṭha nan si lai i thluachuah zong nan hmu lai.
