Dawtnak timi hi zeidah a si? Zeidah a kan pek? Zeidah a kan miak ter? Zeibantuk hmuhtonnak dah a kan pek? Zeibantuk lunglawmhnak le daihnak dah a kan pek tihi ka ruat lengmang tawn. Ka lu hi a tu le tu tein kai kheuh sawk nain ka fiang kho bak lo. Zeitin kan tah hnga le zeitin kan hrinhfiah hnga timi ka ruah ahkhin maths(kanan) khi hei si sehlaw a tuahto ning pakhat hmanh ka thei hnga lo. Cu nih cun, Dawtnak a tthawn zia, a ngan zia, a fim zia kha lamkip in a ka hmuhsak ve. Cuticun, awlokchong ngai in khuaza ka ruat. Dawtnak hi hei um hlah sehlaw: minung hi zeiton ko dah kan ton hnga i zei can ko he kan can hnga ti ka ruah hrimhrim ahcun ka Nun hi a buai ngamsam. 'Dawtnak' timi biafang hi ka tlaihchan bikmi biafang zong a si ve. Cu dawtnak cu vuikhat zan ah ruah lo pi in ka hmuhton...
Kannih chungkhar hi pate-rual chuak cu kan va si kaw--umtu tthutdir le khuasak lairel ning cang ahhin kan kong-kaw deuh suaumau tawn. Hnipuan hruk-aih cu chim lo; din le ei koko thlak hmanh ahhin kan kong-kaw. Kan Pa nih tuan tuk ah mual a kan liam taak. Kei le ka nau le bang nih cun: Pa kan ngei lo tiah ngaihchiat awk hmanh kan hngal lo; a hlam awk zong kan hngal lo. Cuticun, nitin in vawlei caan hi kan vun hmang ve. Kan nunnak ahhin ngaihchiat-ni hi ton lengmang le ton cemmi, a si. Ilawmh khawh ni hi cu a bikin zing-ka le zan, cun zarhpi ni hi si lai dah: hi caan paoh ahhin kan lungrehteihnak le ngaichiatnak paoh Pathian sinah kan bungh tawn i, kan um-khua sia zong rem deuh tawn. Cu lo paoh cu: mitthli he inn chuahtaak caan hi a tam i mitthli he inn fuh caan hi a tam. Kan innchungkhar ahhin harsetnak hi ahme bik in angan bik tiang nih kan itlaih cio. Amah belte, Nu le hi cu Nu le cingcing an si ko. Pa can adir hau i Nu can a dir hau--aphur rit taktak. Zeidang vialte nakin khuaruahhar pakhat simi cu kanmah kan cingla-rualchan lila hmanh nih a kan ttih.
Ni nikhat te hmanh hi ilawm pih-meuh tein tling khitkhat tein kan hman hi a um bal lo. Zingka kan ilawmh ahcun zanlei ah mitthli a tla. Cuti lengmang in Nun hi kan hman tawn. I hmaithlak awk thil pakhat hmanh kan ngei lo. Ka Pa hi Pastor si nain; a thi cang mi nih cun upatnak hmuh hi a har ngaingai ko--khua theihngal deuh pawl bel nih kan Pa tuahsernak ruat in a kan zoh sang ngaingai tawn. Kan Nu ti le sianginn cachim si nain; cachimhnak in a hmuhmi nihlawh nih minung 3 awrka hmanh a khimh lai lo. A rian cu chuaktaak in lei-kil-li dawh a culh ve ko cuh. Khua hngalthei nih zaangfahnak lungthin he thazaang an hei pek tawn. Miluak-chuak kanmah khuktthi rual bel nih cun 'nautatnak' lungput ingeih riangmang in ar cawng-thai in cawng a kan thai hnawh tawn. Cu lio ko ahcun nun hi a mui khun. Mitthli hi a tam khun. Fale nih izuam ve usih ti zong ah tha le zaang, duhtthawnnak le hngalhthiamnak, kan sining hrimhrim nih a zawh lo--cu ruang bikah 'ngak-ttah' nun zong hi aharnak si lai dah tiah khuaza ka ruat tawn. Cicip-aimang in ni le thla rel hi zeihe dah aa lawh ti ahcun: zoh aa dawh ngaimi thil pakhat khat hmaiah, mitcaw dir ve bantuk khi a si--zoh ko zongah hmuh khawh lo, anuamhnak cu theih tung i; hngalkhawh(tep) kho ve lo. Nun hi afak.
Cuticun, vawlei caan hman a si lengmang tikah: kan inn chungkhar ahhin Ruahchannak le Zumhnak hi an nung kho lo ti ning law ka palh men lai lo. Kan Nu caah cun a nung zong an nung kho ko. Nain, a dang kan ca'h cun nemmam bak a si. Dawtnak lawnglawng bak hi a nungmi a si tiin ka hmuh. Kha lio caan sining kha ralram he hna ka tahchunh tawn. Cingla-rualchan nih a kan hrial ning le a kan pheo ning kha--'nam hma' bantuk le 'meithal hma' bantuk in an fak. Sihmanhsehlaw, Dawtnak cu a nung zungzal ko. Inn chungkhar caah ti'n: kan Nu hi, khuazakip a cul, hmun zaza a lam. Ngaihchia ngai simi cu motor zong tonghtham lo, Rang te zong ihlan ve loin--Lairam in mizo ram a panh khi a tam. (Cucu, pasal ttha tampi hmanh dih an duh lomi le an zuam lomi khi a si). Harnak tonmi chim cio si sehlaw: ka Nu harnak tonmi khuaruahhar si lai dah tiah ka zumh. Zingzan tthut-te-mui hmanh hmu loin a ttuan le a relmi hna hi Dawtnak ruangah an si ko ti zong ka hun pemh. Kum 4 ka si in Dawtnak hi biatak tein ka pemh ti ning law ka palh lai lo. Cucu, sunghno nu tuarnak i theitlai kha a si. Ka Nu nih hin cawnpiak caan a ngeih bal lo; nain a tuahsernak hna hi kan caah cawnnak nganbik an si zungzal.
Fale caah a duh aa sum. TTuanzai aa hre, aa hne, teiman a thlu. A linsa mi mitthli he inn le lo chuahtaak le fuhpanh hi a rian pakhat a si. Cucu, Dawtnak ruangah a si. A fale hna--hi vawlei mui lakah ceunak a kan panh ter hi Dawtnak cu a si. A fale hna--Sertu Pathian a kan hngalh ter hi Dawtnak taktak cu a si. A fale hna--lungrethei vansang chimpit au in a kan toh lo hi Dawtnak a si. Khuasik zan a si. Ka nau, keimah, kan Nu ti'n ihkhun pakhat cung ah kan i pah cio. Culio ahcun, ka Nu, "Nan ka daw maw," a rak kan hal. Kei nih kaa thawh i, "Daw tuk hme teh! Inn ngaw piin kan dawt," ka rak ti. Ka nu nih cun, "Kaa lawm arak ka ti." Ka nau cu a hal ve nain fawi le bai ah a let lo. A hal chih hramhram...zei ngaw in dah na ka dawt ve, a hei ti. Ka nau nih cun a vun leh, "Kan dawt ve ko cuh! Zei ngaw ticu...ho te nih dawtnak an tah bal lo cuh, a ti deih! Thinlung linhsat ruangah a zut tawnmi mitthli cu chantling cung tiang an hung ril. Ka Nu cu ik hliahmah tein a ttap. Kaa fiang: aw! Dawtnak timi hi tah awk a rak si tak lo hi ta--ka Nu nihhin inn ngaw cun kan daw sehlaw; a luancia kum caan tampi ahkhan a dih cang hnga lo maw, tah awk a ttha lomi Dawtnak he a kan dawt ruang ah pei nihin tiang kan ca a tuar timi lungfimnak cu ka lung nih a hun co. A thli tein ka ttap. (Kum 6 ka rak si lio si i, ka nau hi kum 4 le thla 10 a rak si lio ah a si.
Dawtnak timi tah awk a ttha taktak loh! Tah ding zong a si loh! Na ka dawt chung paoh kan dawt ve lai tiah mi na ti sual hna ahcun cucu Dawtnak a si ti lo. Ahmun zungzal mi a si. Mi zawnruah le thlachiat a ruat mi a si. Kaa fiang tuk ve: mah ruang pei ka Nu nih harsatnak vialte hi a rak innak si ko hi. Dawtnak ruangah a si. Ca na thiam lo zong ah Dawtnak cu ngei ko, na rum lo zong ah dawtnak cu ngei ko. Na tthawn lo zong ah Dawtnak cu ngei ko. Sunghno Nu le hna hi vawlei cung ah tha le zaang, fim le thiamnak cun a tthawng bik an si men lai lo; nain Dawtnak ruang tu ahhin dawh an si cuh. Dawtnak!Dawtnak! Fak piin duh zungzal. Lungduh: Mihrut hmanh nak nak hmanh in mifimpa nih hin Dawtnak hi a herh deuh taw.
