Hlan lio pi ahhin khua pakhat arak um. Cuka khua tupi le hmawngtlang cu hring dildel le maw chilchial te khin um kaw; zu le va an ngam ngaingai. Cu khua tupi chung ahcun: thinkung pakhat tteng-nge cung ah Vanzuang nih bu an tuah. Cu Vanzuang nih cun 'Ti pum 2' an tit hna. Cu 'Ti' cu an vun tlumh tikah ah an hung keuh. Cu a hung keuh Va cu rawltuh an hung za.
Nikhat cu an nu le an pa kha rawl kawl ah an kal. Cuti tlawmpal an kal cuahmah lio ahcun aw...thlichia cu 'furfur in a hrang' ai. Thing bor tthattha cu an tlu i an kiak. Vanchiat ah, Vanzuang an umnak thingkung zong cu a kiak ve, i thli nih lo diam a choih hna. Thli nih cun khuapi chung lei a hei hui dupmap ko hna.
Vanzuang pakhat cu 'Mittha hna dawng' inn hmai ah a vung tla; i pakhat cu 'mittha lo hna' dawng inn hmai ah a vung tla ve. Cuticun, mi nih cun an i cawm ve hna. An zoh khenh veve hna. An chimh cawnpiak veve hna. Tlawmpal ahcun holh tiang hmanh in an hun chim khawh. An 2 ning te cun an umnak hmun cawngtu ttha ah an hung i chuah.
Nikhat cu nichuah lei ram in mirum pakhat cu khua ahcun a rung phan. Abat ngaingai caah le a tha dih ngaingai caah dinhhmun a kawl. A vuikhatnak ah 'mittha lo hna dawng' cu a vung fuh hna. Inn leng kaan i an thlaimi Vanzuang nih cun aa thawh i, "Khuazei mirum riamruam ko dek a si...a thilthuam a tthat ning le aa put thil tam ning khi...hei that ulaw; a thil vialte kha lakpiak dih tuah u! tiah heh tiah a au. Mirum pa cu a lau tuk hringhran. A rannak in a tli i a zaam.
Mittha dawng inn cu a hung panh. Vanzuang nih cun, "E!! Mileng kan ngei khih...a ti hna hal lai...ti pe uh," tiah a vun au. Vanzuang nih cun, "Bawipa, hi ka daidem tang te ahhin hung i din hnik law, dairial tikik te hna zong hi hun icoh hnik tuah," tiah a vun ti. Mirum pa cu aa lawm tuk hringhran. Cu pinah, hnangam tein dinhhmun a hmuh khawh.
Cuka inn ngeitu sin ahcun: "Khi ka zawn Vanzuang khi dah ngai holh ttha lo le zia ttha lo hman a va thiam dah! Tu te ahkhan ka vung pal sual i thah hnik a ka timh ko," tiah lau nawn in a hei hal hna.
Inn ngeitu nih cun: "Aw, hi Vanzuang hna hi thlichia nih choih in a rung tla mi an si. Khi ka zawn Vanzuang khi cu ziattha lo le holh ttha lo an cawnpiak caah khi tin a um khi a si," tiah an chimh. Kaa hin cun, "Ziaza ttha le holh tthattha kan cawnpiak; i mileng dongtu ah kan hman," tiah an hun chimh. Mirum pa cu aa lawm tuk hringhran. Hiti thil nan tuah hi a ttha tuk tiah laksawng zong a pek hna.
Hmuhsakmi: Minung cu chim lo saram le sattil hmanh nih cawnpiaknak hi an ilak khawh. Cucaah cun, thei zungzal: na fale ziaza ttha lo cawnpiak hrimhrim hna hlah. Ziaza dawh cawnpiak hna law cu nih cun an nung chung a cawm hna lai.
