Chungkhar pakhat: nuam ngai in khua a sa mi, i daw-rem tein ṭhudir tti lengmang mi an um. Vanchiat ah, an nu mi ngam dam lo a si. Fanu fangkhat pakhat te an ngeih--an dawt hringhran. An nu dam lo bu zong ahcun i daw-rem tein ni thla an rel ṭi kho. Chiatni-ṭhatni ah an i kilveng, i an i zohkhenh.
Vanchiat ah, an nu nih ruah lo tuk in a liam taak hna. Ngakchianu pa ca ko ahhin a har. Zeicahtiahcun: an fanu te nih lungfim dirhmun hmanh a phan rih lo--a holh kho fangfang lawng, asi. A hlei in, an nu duhdawtnak biatak in a tep cang mi si fawn. A caah, zeizong vialte hi a thlum-al kho hrim ti lo. Hmailei kong ti ah le--a muimi nih a ruahnak a zelh. Vawlei a pit i van zoh a sang.
Cuticun, hi vawlei muihnak nganpi chung ah nitin in an cawlcang lengmang ve. Ngakchianu te cu a pa nih a dawt tuk hringhran. Sianginn kainak ah tlamtling mi dirhmun a dir khawh nak hnga a pa nih a kutke tampi a hlanh. A lamkip in a bawmh. Cuve bantuk te cun, ngakchia nu nih: a in khawh lo tiang le a ruahphak lo tiang ngaihchiat le harnak a tong bal ve loh--a nu hmanh um ti lo nain...
Dirhmun sang pi an si lo caah plastic in sermi hngawng-awi te, a pa nih a cawk piak. Cu 'ṭhi' te cu a fanu nih a uar tuk hringhran. Cu 'ṭhi' kong ahcun a pa hi, "Lawmhnak hla le tha nuamnak" he a chawnhbiak lengmang. Cu kong cu a pa nih a theih tikah, "Fak piin a ṭap." Mi fanau, a fanu mithmai--cer ngai le lawm miu-meuh tein a um ko nak cun a lawmh ter.
Fak deuh in tei a ma. Rian ai hne. Ei le din ai sum. Inn zong tlai deuh ah a ṭin i tuan deuh in a chuak. Cuticun, nitin a fanu caah tuan ai hne i teiman a thlu.
Nikhat cu, a pa nih a fanu kha, "Ka fanu! Na 'hngawng-awih' te kha ka pe tuah," tiah a hal. A fanu nih cun a pe siang nemmam loh. Nain, a pa nih a hal lengmang. Sihmanhsehlaw, a pe duh bal lo.
Zing-zan chuak a hal lengmang caah, a fanu nih a pa hmanh a huat lei cang. A ṭih in a a ṭih lei cang--an i ton paoh ah a ṭhi te cu a hal lengmang caah. Nikhat cu, a fanu te cu khua a ruat. Ka pa nih hi 'ṭhi' te a ka hal lengmang caah...pe ko ning. I rem lo piin umnak cun i daw-rem tein um ṭi kha nuam deuh. Hi 'ṭhi' hna cu plastic tein pei ser mi, a si ko cu a ti. A donghnak a biakhiah mi cu, cu 'ṭhi' cu a pa sinah va pek ding cu a si.
A pa ihnak khan lei cu duhsah te khin a vun panh. Innka cu a vun awn. Dai semsuam pi in ca a rel ko mi a pa cu a hmuh. "Ka pa?" tiah a hei auh. "Ka fanu, zeidah?" tiah a pa nih a vun leh.
A fanu nih cun, "Ṭhi hi i lak ko. Na duh tuk ahcun i lak ko. Nangmah he i rem tein um kha ka ngai i ka duh deuh. Nitin, i daw-rem loin kan um lengmang nak nih hin; a ka bat ter tuk cang. Cucaah cun, i lak ko," tiah a ti. 'Ṭhi' cu a hei pek.
A pa nih cun, "Ka fanu, kaa lawm!" tiah a hei ti. A pa nih cun, a fa nu cu a thawh i, "Ka fanu, ra hmanh," tiah a hei ti. "Suiṭhi cu aa chuah i a pek." A fanu bak cu a lau tuk. A lung le lu ah a cuang colh mi cu, "Aw ka pa nih hin, ka caah thil ṭha deuh pei a rak ka duh piak ko hi," ti a si. A pa cu a hei kuh i a hnamh. Lawmhnak mitthli cu kirhkirh tein a tla.
Hmuhsakmi: I dawt-remnak na kawl ahcun: na ngeih cang mi thil sunglawinak hmanh in a ngan deuh mi thil na ngeih khawh i na hmuh khawh.
