Holh khawh lo nak ai chuah pi mi tarpa nih fanu pakhat a ngeih. An nu nih tuan tuk ah mual a liam taak hna. Cucaah, inn chungkhar rian le a fanu zohkhenhnak vialte cu, tarpa liang cung ah cun a tla. An pafa nunnak hnga caah lamkam ah thilzuar in ni a tla lengmang. Cu bu ah, a fanu cu sianginn tiang a vung thlah lengmang tawn. Sianginn an vung phanh ah khin a fanu cu, "Cu ti, kha tin, hi tin...na um lai" tbk kha a vung chimh tawn. Kut he lawng cun holh kaw; a fanu nih a zahpi tawn. A duh hmanh a theihter dih hlan ah ṭhawl lengmang, a si. Ruahchannak le Zumhnak le Dawtnak ruang te ah: 'ni nikhat ahcun' timi lungput he Paṭha si ai cuh.
Ni linsa lak ah cun thi deng in a ṭuan. A thlan hi kirhkirh in chun nitlak a tla. A thil tuah mi hna hi--an thawt ngaingai caah le eiawk tlak ngai an si caah, a mikip nih an bawmh lengmang ve tawn. Amah zong: a fanu cung i zumhnak-ruahchannak-dawtnak a ngeih ruang ah, fak piin tei a ma zungzal.
Nikhat cu sianginn kai nak ah a fanu cu a vung thlah. Sianginn ngakchia tampi nih kutka hram i a kut in a holh len pa le a fanu cu an rak hmuh hna. A fanu nih cun a pa duhnak ruah piak lem lo khin, a kal taak. Sianginn cu an hun thawk. Khan chung ahcun mikip nih an nih sawh. A keng cung ah catlap banh in: "Holh thiam lo pa fanu" timi tiang an banh. Mi fanu, cu ti tiang, serhset le nek a ton cu duh ve nam hlah kaw; a leh ve len hna. Amah pakhat lawng a si caah cei ngai in an tongh khawh. Cu thil a ton mi nih cun a pa cung tiang a thin a hun ter. Sianginn kai zong a zuam ti lo. Hrawkhrol le luh-let in aa la. Nain, a pa nih zeihmanh a thei lo.
Zeimawzet caan a liam hnu ah a fanu sining cu a pa nih a vun theih. A pa nih cun, a fanu cu kut lawng cun cawnpiak kaw, a thik bak in ai thik. A fanu nih cun mitthli he a leh len ve. Nangmah hi ka pa si ding ah kan fih! Zeihmanh na ka tuah piak khawh mi a um lo. Na ka pek khawh mi hi: hawisin in ningzahnak le mualphonak lawngte, an si. "Hi bantuk pafa si ding hi ka ningzak," tiah a pa cu bo cel ngai khin a leh. A pa nih cun, "Nangmah ca a si...sianginn ṭha tein kai, i zuam law ni nikhat ahcun..." a vun ti ah khin a fanu cu leng lei ah lo ko in a tli. A pa zong cu a ngaihchia tuk ve. Mi fanau, a rianṭuannak zong ah a tha tho ti lo. Lungkuai le ngaihchia in a um. A fanu zong cu nuamhnak le lawmhnak taktak hmuh kho hlei ve loin; pa rual sinah a vakvai.
Zarh tlawmpal a liam hnu ah a fanu chuah ni cu a chung phan. A fanu chuah ni chun cu rian tuan deuh ah a ngol. A fanu caah tiin 'chuahni-changreu' cu a cawk. Cu changreu cung i meitung vun van i a fanu chem ter ding a ruah ahhin ai lungsi tuk. Cun, catlap pakhat cung ah ca a ṭial:
"Ka Fanu, na ngaih kan chiatternak ruang ah siseh,
Na duh-herh ning in thil kan tuah piak khawh lo ruang ah siseh,
Ka ngaithiam...Na theih bang in hmette in holh kho lomi ka si.
Hi ruang ahhin ningzahnak zong na ton tawn ko lai,
Hmanhseh, kan dawt zungzal ko, 'Happy Birhthday'."
A hmaika changreu le a kut cung catlap he cun a fanu cu hngahhlang in a hngah. Tlawmpal ah innka cu 'kukkuk!' tiah a vun awn. A rannak in a vung tli. A fanu hmuh lai ngaihnak he cun innka cu a vun awn. Nain, thi le hnai he a ummi a fanu cu--a hmaika ahcun a hmuh. A lau tuk ahhin thih-hnik ai tim. A fanu cu a liang cun ai puak i sii-inn lei ahcun a rannak in a tlik pi.
Sii-bawi te cu a kut le mitthli he cun: 'Ka fanu nunnak khamhnak ding caah zei paoh tuah uh; tangka ka ngeih, inn ka ngeih, ka liam khawh ko lai' a ti hna. Sii-bawi te nih cun a herh mi an vun chimh. Na thi rawnh hau an ti. A rannak in ka rawnh piak uh a ti hna. Cu ti cun, a pa thi cu lak in a fanu nun cu an hrimh.
Nikhat hnu ah a fanu cu ai ṭhang. A pa bel ai ṭhang lo. A fanu nih a pa catlap cung cafang cu a rel tikah a mitthli a luang len. A ngakchiat lio: a pa he an rak i dawt ning kong te hna, a mitthlam ah a vun cuang. Mi fanau, a kha mi mitthli le ngaihchihnak mitthli cu a ihnak cung ah an tla len. Mithi bang a pawng ah a it ve mi a pa kut cu a hei tlaih i, "Ka Pa ka ngaithiam" tiah a hei ti.
Hmuhsakmi : Nu le Pa nih an kan serh khawh lo tiang, an sining nih a phak lo tiang in thil hi kan hal hna awk a si lo. Kan duh-herh mi tlamtling in a kan pe kho men lai lo; nain tlamtling tein a kan dawt.
