Tlangval no a si i amah lawng khuasa mi Pate, pakhat a um. A nunnak hnga caah nitin manh lo ngai le bang ngai in ṭuan-kawl cu aa thawh lengmang ve. Mi fanau, amah lawng khuasak hrat cu: inn ah rawl-chum lem loin leng ah a ei lengmang. A rianṭuannak ah nihlawh tampi zong a hmu lo; nain lungrethei in a um bal lo. Mi bawmhchanh a duh ngaingai mi le mi zawn a ruat ngaingai mi pakhat zong a si. Nitin, a um-kal pah ahhin thilṭha timi hi tuah khawh lengmang aa zuam--a tuah lengmang mi zong a si.
Vuikhat cu a rianṭuannak lei fuh ding ah ai thawh. Tlakrawh le mirang-vawlei in sakmi inn-di cung in ti a tlak thluahmah cu, a hmuh. Cu ti a tlaknak pawng ahcun: a thi deng cang mi pangpar; uai dirder tein a um ko, a hei hmuh. Leklak tiah pangpar cu di-sap ti tlaknak ahcun, a hei thawn. Zing fatin--cu ka zawn cun ti cu a tla lengmang i pangpar cu ti a hmu lengmang tawn.
Nikhat cu rawl dawr pakhat ah rawl-ei awkah a vung ṭhu. Facang-buh le arsa pheibom cu a hei cah i, a ei. A ei cuahmah lio ahcun uico pakhat: a pawng ah cilkadi he a to ko cu a hmuh. A zaangfah ngaingai caah sa vo cu a hei cheuh. Hmutu pawngkam mi nih an lu an lei hnawh len. Zei poi loin le kaa thaw ngai in rawl-ei cu aa lim. Inn lei panh awk ah a vun thawh bak khin--uico zong cu a tho ve, i uico nih cun a zulh. Uico zong cu ṭhawl lem loin aa kal pi ve ko(Ngeitu ngei lo si rua).
A lin ngaingai mi chun-lai-cer ah, a khuk le kha aa tong deng mang cang mi tarnu: zalam cung ah a thil zuarnak leng, thi deng in a nam len ko cu a hei hmuh. A rannak in a vung tli i a vung bawmh. A kir lei ah nufa hna pahnih sianginn kai nak caah kut-dawk dirhmun in zalam cung ah an ṭhut ko cu a hei hmuh. Zaangfahnak lungthin he; a rannak in a tangka bawm cun, a tangka cu cheuthum-cheuhnih in a pek hna. Cuticun, nifatin in cu hna nufa cu a bawmh hna. Hmutu pawngkam mi nih 'mihrut' hna ah an ruah tawn.
Cuti thil a tuah lengmang mi cu caan sinah an liam lengmang. Thlatam a rauh hnu ah zing dang tawn kel bang, rianṭuannak lei cu a panh.
Di-sap ti a tlak termi pangpar: dawh ngai in a par ko cu a hei hmuh. Aa lawm tuk hringhran. Thil zuarnak leng a nam piak lengmang mi tarnu zong: amah thawng cun; siannak lungthin a ngeih deuh ve; thil cawtu zong a hlei in ṭhanh-chap a hmang ngai. Cu thil a hmuh ahcun a lau pah nawn. Zeicahtiah, pawngkam thil nih pei, "A tuahmi man a ngeih zia an hmuhsak cu...". Cun, tangka a pek lengmang mi hna nufa sinah: vuidang kel bang phaisa vung pek ding ah a kal; amah bel, nute a rak um ti lo! (A lau dih) Ngakchia nu i a nu biang cung ahcun lawmhnak mitthli a hmuh. A khuaruah har chinchin. Tlawmpal an pawng in, "Ka Nu!" timi aw-nem thawng cu a theih. A lu aa mer cu! "Sianginn thilri he merh siamsiam tein ngakchia nu, a hei hmuh khawh.
Mi fanau, lawmhnak mitthli al cu kirhkirh in an tla. Lu lei a rak ṭhawng ngai mi pawl hmanh an lau; i cheukhat cu an ṭap. Aa lawmh tuk ahhin a ti awk ṭha lo. Cu caan le lawmhnak cu vawlei cung suingun le hranchaw he: a zeizat hmanh si ah; a thleng siang lai lo. Inn ah a ṭin. A uico nih a rak don cu a hmuh. Hohmanh nih duh ti lomi uico he hawikom ṭha an si tikah aa lawm hringhran. Um har zong ngei lo.
Hi pa nih, hi thil a tuah ruangah a lar lem lo. A min thang lem lo. A rum zong a rum hlei lo. A mui zong zoh a co hlei lo. Nain, tangka nih a banh khawh lomi: thin le lung lawmhnak tiang; daihnak tiang; hnangamnak tiang, a hmuh i a ngeih, a ngeih i a co khawh.
Dawtnak le zaangfahnak in tuah mi thil hna hi khuaruahhar thil i i thlen awkah caan tampi an la tawn. Nain, a can tik ahcun: ho dah lawmh loin um lai.
