Australia: Centrelink bawmhnak an kaiter tthan
Atulio Ukraine le Russia ral I tuknak ruang ahhin vawleipi chawlehthalnak biatak tein a hnursawn. Cu tikah, thil man a kai I mah hlan bantukin tangka aa hmang kho ti lo. Ram chungah tangka chuah luhnak a tlawm tik ahcun, ramchung chawlehthalnak a hnursawn ngaingai.
Money inflation timi, thil man lawng a kai tikah, tangka hman a si ti lo tikah, sang le veng chung chawlehthalnak a tuah mi zong biatak tein a hnursawn hna. Cun, naite bak ah, fak tuk in NSW le QLD hna cu tilian nih a kan phum tikah, inn le lo a ngei lomi le, thil le ri a ngei lomi an tam tuk.
Cu kong he pehtlai in, Australia cozah nih Centrelink bawmhnak a ei mi hna minung ting 6 (6m) caah bawmhnak tangka an karh ter ding kong an thanh. Cu bawmhnak tangka karh piak ding mi ah aa telmi hna cu age pension (kum khua upa pengsen), disability pension (pumtlamtlinlo pengsen), JobSeeker payment (rian kawl bawmhnak) le carer allowance (mi zohkhenhtu bawmhnak) hna hi an si.
Hi bawmhnak cu March 20 in aa thok te ding mi a si. Bawmhnak tangka an karh ter nak ruang cu, Australia hi Keynesian economic theory (mipi kut ah tangka chiah ahcun sipuaizi a tthawng) timi biatak tein a kalpi mi an si. Cozah aa tinh ning ahcun tutan thil man a kai i nun man a kai lio ahhin, mipi kut ah tangka kan chiah ahcun mah hlan ningkel bantukin fawi deuh mipi a kan nun ter lai ti hi a si.
Kum khua upa pengsen, Pumtlamtlinglo pengsen le mi zohkhenhtu bawmhnak hna cu minung pakhat lawng ca ahcun $20.10 in an karh i, Zarh 2 ahcun $987.60 a si cang lai. Nuva ca ahcun $30.20 in an karh i, Zarh 2 ah $1488.80 a si ve lai. An nu silole an pa tibantuk rian an ttuan ahcun hi nak tlawm zong in an hmu kho. Rian a ttuan mi tangka lut an zoh chih lengmang lai.
Rian kawl bawmhnak zong $13.20 in an karh i, fa ngei lo, single ca deuh ah a si i Zarh 2 $629.50 a si ve lai.
Mah lawng in fale a zohkhenh mi nule silole pale caah $18.10 in an karh ve i, Zarh 2 ah $874.10.
Inn hlan man bawmhnak zong an kai ter i single caah $145.80 si lai i chungkhar caah $193.62 a si ve lai.
Hi vialte hi March ni 20 in aa thok ding an si. Acheu cu April hrawngah nan ngah khawh te men. Zarh 2 vuikhat bawmhnak tangka a luh ning nih a ngeih te lai.
