Tutan cu kokek thingram hna le iang ngei par dawh pawl hna vun tar ve ning ka ti. I manh caan tete ah hmanthlak a zuam mi ka si. Hmanthlak ti tikah selfie ṭukṭak le minung hmanthlak khi ka ti duh mi a si lo. Saram, pawngkam, hmunhma, thingram, pangpar, tlang, rili, tiva, lam, inn le lo tibantuk pawl hmanthlak khi ka zuam.
Tutan ka hmanthlak pawl hi Coffs Harbour ah um mi Botanic
Gardens timi dum chung in thlak mi an si hna. A hmunhma te hi a daidam.
Chungkhar lengchuahnak le lenvahnak ah a ṭha ngai. Ram kip le hmun kip in
thingram le pangpar hna cu lak i cin an si hna. A tling ngaingai. Japan le
Tuluk ram chuak pangpar pawl le thingkung pawl khi aa dawh pawl an si, tiah
pumpak mithmuh cun ka hei hmuh ning a si.
Kawlram le Laitlang nun a ngai mi caah lenkai awkah a ṭha
ngaingai. Cinthlak zeimawzet tete zong an um hna. Tiva hmete zong a um i a
caan ahcun lung leng te khi a si. Hmun
daidam, hmun nuam le hmun thianghlim ngaingai a si.
Coffs Harbour ah tlawngkaitu dirhmun in a ra mi nan um ahcun
hi hmun cu pel lo tein nan len ding mi pakhat ah aa tel ve. Aruang cu Pathian thilser
kokek thil pawl le minung hna i zuamnak in kilkawinak an tuah mi tehte hna cu
fiang ngai in hmuh khawh an si: aa dawhnak, aa remnak, a ṭhatnak le aa tlaknak
hmunhma a tam taktak.
Luh man ah zeihmanh pek a hau lo. A chungah kofi dawr hmete
zong an tuah. Din-ei ṭukṭak cawknak zong dawr hmete an tuah. A ṭha ngaingai.
Coffs Harbour ah kum fatin in tuah mi ni sunglawi pakhat
Harmony Day zong hi dum ahhin tuah lengmang a si. Cucaah, hi dum hi ralzaam hna
le hika ram mi hna kan i pehtlaihnak ca zongah hmelchuntu ngan pakhat a si ve.
Laimi kan ca zongah a sunglawi ngaingai mi hmun a si.
Coffs Harbour um mi minung an si ahcun hi dum ahhin caan
hman khawh lengmang i zuam ve. Tlawngkaitu dirhmun in Coffs Harbour a phan mi
na si ahcun hi dum ahhin na retheihnak le thabatnak chia ta tawn ve, naa chir
lai lo.
