"Cattialtu Phun 3" -- Pumpak Ruahchuk ruahcho
Minung hi ca le holh he aa tthen kho ding kan si lo. Kan duh herhmi chim le relnak dingah holh kan chim hau, ca kan ttial ahau. Holh le ca hi, kan nunnak ah, ti le rawl an biapit tlukin a biapi taktak ve mi an si. Holhkaa a thiammi nih cun hawikom ttha ser hi aa herh lemlo, i cathiam nih cun nun pawcawm hi aa herh ve theng lo. A fawinak in cun holh le ca hi an biapi tuk. An biapi.
Ca hi khuaza ramkip ah le, a mikip sinah a tthangcho. Cu tthanchonak nih cun kan nih Laimi zong a vun kan khenh ngaingai, i tukar hrawng cu mino tampi nih cattial hi a taw, kan hun domh phot ve. Laitlang, Kawlram, Malay, India, US, Norway le Australia (khuaza ramkip) hna ah Lai mino nih, Laica, a thawtnam kan hun teh khawh pinah kan kilven awk a si tiin a biapitnak thei in Laica ttial ah tei a ma mi tampi kan um hna. Cu lawng hlah, CACC zong nih Laica tthanchonak ah biatak tein ttuanvo zong a hun lak i a tawlrel chih. Media kip, Laica in, ttial an hung si. Fawi tein kan hmaika ah vawlei hi a lu le taw kan let kho cang. Cucu ca le holh an thilti khawhnak asi.
Kan ca hi kan tthanpi. Cucu thilttha ngaingai asi. Sihmanhsehlaw hi kan tthancho pi lio ahhin ruah ve awk thil zong a um ve hoi. Lai mino tampi nih hin kan hngalh lomi a si rua tiah ka ruahmi thil aum. Cucu hi hi asi: Copy Right kongkau hi a si. Copy Right kongkau hi aa fiangmi kan tlawm rua ka ti. Ahlei in Kawlram le Laitlang khuasa kan unau deuh hi copy right a biapit ning kan hngal deuh rua lo tiah ka ruah. Cucu pumpak ruahnak a si, i pumpak va hnursuannak lungput he theihternak tuah hi kaa timhmi asi lo.
A fawinak, a tlang pi, in 'Cattialtu Phun 3' tiah ka hei cheubauh, i cu ka cheubauhmi cu vun kauh ka duh.
Cattialtu 1nak: Cattialtu
Mino leikap deuh in la ko usihlaw, zeicahtiah cun mino deuh hi ruahnak hler le lung a hler mi, le a vai mi kan si.
Mi pakhat khat nih ca a ttial tikah--biazai si kho, lenhloi si kho, tuanbia si kho, pumpak kongkau si kho, capar si kho...adang dang kongkau a si kho--amah ruahnak le a tuarmi thil hna cafang le biafang in tampi a zamh hna, i a nunter hna. Mi pakhat nih cun a ngaihchiatnak, a kuainak, aa lawmhnak, aa nuamhnak...tbk zong a ttial khawh/tawn. Cu a ttialmi cu media chungah--facebook maw, blog ah maw, silole magazine/cauk ah maw--a photzamh in a thlah tawn. Zeiruangah cuticun a tuah hnga ti cu hngalh cawk awk cu si lai lo. Asinain, a tonmi thil kong hawi nih ka theihpi hna seh ti a duh caah zongah asi kho.
Cattialtu 2nak: Careltu
Cu a ttialmi a reltu hi a 2nak cattialtu kan hung si colh. A reltu le a ttialtu zong i lawhnak tampi hna kan ngei tawn. Cu nih cun an ttialmi ca he i pehtlaihnak zongah a kan bawmh chih fawn. Cheukhat ca cu kan rel tikah kan nun maw silole kan sining he aa rup ngai tawn, i kan thinlung a lak ngai tawn caah, mikip nih hngalh cio ve awk zongah kan zamh chih tawn. Cun a ttialtu zong, pumpak in, chimrel piaknak--thangtthatnak, thazaang peknak--zong kan ngeih chih tawn hna. Cucu a ttialtu zong nih thazaang tampi an i laknak a si taktak ve.
Cattialtu 3nk: Carawitu
Careltu he aa ralkahmi cu 'carawitu' ka hei ti hna. Cucu cattialtu 3nak min ah ka hei bunh. Mi ttial sa le ttial cia rumro, mah duh ning in biatlang le cafang zong rawi dih (thlennawn dih) tbk, le mah nih ttialmi ti phun in laknak le ttialtu zong langhter lem lo khin siarem ngai in kan zamh chih tawn. Athei/arel bal ve rih lomi mi pakhat khat nih an rel tikah chimrelnak--thazaang peknak siseh, thangtthatnak siseh, uhttanhnak--vialte cu cu minung sinah cun a kal dih. A tong tak maw tong tak lo ti zong hngalhpiak lem loin, "A ttha tuk; I zuam thluahmah ko", tbk hna in an ti mei. Aneh hnu ah midang ttial cia, amah min in a ttial tthan tikah cu bantuk thotho cun a kal. Cucu thil tthalo ngaingai asi. Zeicahtiah cun, cattialtu 1nk nih a sining le a tonmi thil a ttialmi kha, cattialtu 3nk nih cun amah pumpak cungkainak ah ahman. Cucu fir phunkhat asi. A ngaingai tiah cun firtlei a si ve ko. Zeibantuk ca le holh a va si zongah cu bantuk cu kan tuah ding a si lo. Thil dawhcah lo asi.
Atu cu, nangmah hrimhrim dirawnh kaan duh! Zeibantuk cattialtu dah kan si tihi kan i hngalh awk asi. Mah nih ton lomi le mah sining si lomi hna, ka tonmi le ka sining a si kan ti ahcun lihchim kan si. Cucaah cun, dinfelnak le tthatnak hi i tlaih cio usih. Cucu lamding kan zulh pinah a dingmi tthanchonak zong kan ngeih a si. A dingmi lam cungah a kalmi ke cu a fek. Chuk le cho a hrawng mi ke cu a con. Phundang cun, mi sinak ka sinak va ti nak cun, ruahnak zong i hal ding, silole kong pakhat khat zong ceihhmai tti ding, a si ko. Cu nih cun tthanchonak a fehter fawn. Tuah usih law!
Kan Hngalh Awk!!!
Mi pakhat khat nih ca a ttialmi thlahnolh le zamhnolh kan duh a si ahcun, a ttialtu min kan langhter awk asi. Cucu tthanchonak ngan taktak asi pinah, dinfelnak i tlaih zong asi. Kan nih Laimi cu mah le mah kan vai theithiam. Ramdang hna ahcun, copy right kongkau ah tangka liammi le a cawimi hi an tam pinah thong a tlami zong an um. Cawi le khih mi zong a tam. Cu ve bantuk cun hi thil hi kan tuah thluangthluan a si ahcun, cu bantuk thil cu kan sinah a cang lai lo ti khawh a si lo. A cang kho taktak mi a si. Cu ruangah cun i ralring cio hna usih, tihi chimh pah pinah sawmnak zong kan pek chih.
Biadonghnak ah chim ka duhmi cu: na ca le na holh na dawt ahcun a dingmi tlaihtleng he tthanchonak dirkamh usih! Kan Ca, kan ca hi sawk le sam an can sualnak hnga lo ttuanvo lakin tawlrelnak ngeitti usih. Tampi kaa lawm.
Biadonghnak ah chim ka duhmi cu: na ca le na holh na dawt ahcun a dingmi tlaihtleng he tthanchonak dirkamh usih! Kan Ca, kan ca hi sawk le sam an can sualnak hnga lo ttuanvo lakin tawlrelnak ngeitti usih. Tampi kaa lawm.
