"Bia"
© Van Ceu Lian
Bia na chim khawh nain—na bawi ah na ser lo a si ahcun;
bia na ser khawh nain—na bawi ah na ser lo a si ahcun;
biachokvai nih an hleng lai lo i,
biavaivuan nih an tuai thiam hnga lo,
Bia na hngalh nain—biatthalo chim naa sum ahcun;
bia na duh nain—biadik lawng na ttanh a si ahcun,
biathluan tthattha na herh lo i
biathlum tampi na herh hnga lo,
Bia na ngaih thiam nain—biachim naa sum a si ahcun;
bia naa cinken khawh nain—lih na chim lo a si ahcun;
bia na paumi nih an in cawm lai,
biasung sung pau na herh hnga lo,
Bia zei na rel nain—upat ttihzahnak he na pau ahcun;
bia na luak nain—ngaihthiamnak bia na tiam khawh ahcun,
bia nih sual an phaw lai lo i,
bia nih bia an ceih hnga lo,
Bia hi zeizongte aa thoknak hram a sinak
biatak hi na hngalh ahcun:
biatak sinak a ngeihmi tthawnnak;
bia chungum thilti khawhnak hna hi, ralrin tein
bianem he pau hna—'na thih sia a rem lai'.
