"Hawi Hlun"
Na manh zanmang thlum le chunmang vialte,
Naa ruahchanmi thaizing sinah na luah lo tikah,
Na lu buai in na thinlung riangvai maw?
--Kei cu ka riangvai. Awlokchong in.
Na tum nithar thar le thlathar vialte,
Na saduhthahmi hmailei sinah na tongh lo tikah,
Na nun buai in na mang chia maw?
--Kei cu ka mang chia. Ka nun abuai.
Nang kan ton hnu in:
Ruahchannak he kaa hawikom lo,
Mang he kaa pehtlai lo,
Ruahchungnak tampi ka ngei lo;
Sihmanhsehlaw ka nun ahrio,
Sihmanhsehlaw saduhthahnak ka tlaihchan.
Ka caah a sungmi tuanbia,
Na lungkil ah siloin na lukil ah ttial ka duh;
cuticun, na ka philh lai lo.
Na lukil um tuanbia,
Na lungkil zongah hmun pe ve.
--Kei cu na hawikom ka si;
na Vanzuang ka si; na Uico ka si;
ka holh ka bo kho ko, nang sinah...
Naa rehchih na hmailei tuanbia ah:
um hlah hmanh ning, itel hlah hmanh ning,
ipehtlaih hlah hmanh ning; kaa rehchih ka hmailei tuanbia ah,
na um, naa tel, naa pehtlaih...
--Na kar le ka karah donghnak umlo. Um rihlo.
Thaizing ahmaw, hmailei ahmaw timi ka hlawt cang lai;
Kan phaicia tuanbia ka rel cang lai:
I ruahchan ti hlah ing, dai cang ning
I sunhsak ti hlah ing, ngol cang ning
I duh ti hlah ing, thlah cang ning
I manh ti hlah ing, hlau cang ning
Muihnak chungum ka hawi hlun,
Na sinah ka ra. Ka ra.
Ka lu nih hmailei le hmailei tuanbia aka hmuhter lo caah,
Na sinah ka ra, kei ka hawi hlun.
