"Mipa Nih Zeidah A Ngeih?"
Mipa ralhrang cu aho asi na hngal maw?
Amah a thinlung lila, amah a thinlung lila.
Mipa rosung cu aho asi na hngal maw?
Amah a thinlung lila, amah a thinlung lila.
Mipa nih zeidah a ngeihmi asi na hngal maw?
Amah hnakruk lila in sermi nu sunglawi pakhat:
cu Nu lo cu, vawlei ah a ngeihmi a umlo; cu Nu lo cu
zeihmanh ka ngeihmi a ti kho lo, a ti kho lo.
Mipa nunnak ah zei thil pahnih dah um thluangthluan?
Chun le zan: duhdawtnak le huatnak: biatak le mang;
ziaza hna lakah a hlumpi pawl; hi hna hi mipa nih
ahman athiam hna ahcun 'a ngeihmi thil' chap asi lai.
Mipa nih zeidah ahal tawn na hngal maw?
A zumh khawh lomi, a hngalh khawh lomi, a ngeih khawh lomi;
a ngeih cang mi thil hman thiam zia ahal lo,
zeitin a nun cu a hramhkauh khawh hnga?
Kei, mipa nih zeidah ka buaipi tawn na hngal maw?
Ka rak isemnak le ka kir lainak vawlei le ari;
ka ngeihchunhmi pakhat, caan chungah buaipi in,
let lo let ka let, thawilo thawi ka thawi, kaa ciap.
Kei, mipa nih zeidah ka co na hngal maw?
Sunparnak? Nuamhnak? Sunlawihnak? Khuaruahharnak?
Nemmam! Zeihmanh! Ka thinlung lila in sermi nu sunglawi
lila zong aliam, hi vawlei ahhin zeidah ahmun?
Hi vawlei; ahmunmi thil caah hmun asi lo:
Sualnak aa nehmi kan pumsa hlawnhnak hmun asi;
Kei, mipa zong ka sualnak he kaa tthen tetik ahcun,
Ngeihmi lawng siloin ngeitu zong ka si ve te lai.
