"Kaltaak Lomi Vawlei"
Kei cu ka co lo hnga mi duhtu men ka si,
Kei cu aka philhmi minung a cinkengtu men ka si.
Kan ngeihmi lungtuarnak: dawtnak, tlaihchannak, duhnak;
An loh tikah khoi ahdah an liam? An tlau dih maw?
"Keimah lawng a ceu khua chung i tlonlennak cun,
Nangmah he amui khua chungah len ka duh deuh,"
kan rak timi biatam kha thinghnah an si maw?
Kut zatial itlaih in, "Zungzal in zungzal ca tiang,"
kan rak timi kha, hote tuanbia dah asi?
Minu, kan lungtuarnak nun areu cang ko rua.
Ai! Kei cu ka hmun thluangthluan rih ko,
Minu, "Ka zan thlapa, ka niceu, ka thlumthlum,"
kan rak iti mi vialte kha ngakchia hawhnak an si maw?
"Kan dawttuk, kan duhtuk...kan philh ti lai lo,"
Kan rak timi kha chimtlu bianaang an si maw?
Minu, kei cu mu kan tuanbia hi kaa nunpi thluan:
Ka philh lo kan iton tirni; fiang ririai mitlung nih,
Kan thinlung hmanh arak hmuh, ni sunglawi kha,
Zeitin philh ka sian hnga, thluak ngeilo maw ka si?
Thluak ka herh lemlo, thinlung ka ngeih ko.
Minu, vanva hmanh nih neh le naang an riahtaak lonak,
van cahmai ahkhin, kan tuanbia na rak ttial ko rua;
Kei riaklang va bang neh le naang ahlammi ka si.
Tuanbia tampi he ka ra lo; hmailei tuanbia kaa put lo,
Atu tuanbia zong ka ttial lo; liamcia tuanbia
kaa rak put: philh cangmi ka si; tlaihchanmi ka si tilo;
fahnak cinkennak men i an can hnu theipar ceo ka si,
'A nung nain min ngeilo mi, tuanbia ttialmi reltu ngei lomi',
zanmang chia paoh he aa kommi ka si; hi tuanbia hi
ti hlah! Ka kaltaak khawh lomi vawlei a si.
