"Donghnak Hngaktu Nunnak"
Ka nun,
Ningttih ma fak deuh hnga ningzah...
--Muihnak nih a hun nanhmi zanṭim ah:
Mang chia he a hung i hlaumi kei;
ningttih tukah--mui chin puanvu tangah kai nok.
--Ningzah pan tukah, duh hmanh tiam ngam lo,
A cangmi paoh Amen pek--thinlung le ruahnak tiang,
An mawt, an man, i an kuai tawn.
Ka dirhmun,
Ralchiat ma a phing deuh hnga mi hemlo...
--Duh sam ngam loin a tthang lawng a tthang;
Thinlung nih a zawi kho ti lo--ttihnak nih a muai;
Kilsapang ah ai bual, amah le mah ai ṭhih.
--Duhtlin lonak kaakhat te hmanh ah:
duhlo ser ngam hlah, mitthli le lungzur in,
Nihin, thaizing, hmaizarh, thla...kum...liam tawn.
Ka sining,
Lungtur thawng ma thang deuh hnga dur-lawng...
--Ruah lonak nih a huai khawh, cang sual tawn.
Vanchiatnak nih a zuanh khawh, tur ceicui in.
Duhdawtnak nih ahrem khawh, dinh ter loin...
--Keimah pum chungah: a linh chel, a daih chel,
a nem chel, a hah chel, a fah chel, a dam chel...
Hi hna he hin, zeitik hmanhah kaa tthen lai lo...
Ka lungthlitum,
Thli maw vai deuh hnga ka lungthli tum...
--Leikil-li cul lengmang: van in siseh, lei in siseh,
Nichuah lei in siseh, nitlak lei in siseh...
Ho hmanh nih theih lo-- chunmang maantu men ka si.
--Khi nu khi, khi thil khi, khi sinak khi,
Khi hmunhma khi, khi inn khi...kaakip lo ah;
A taang i a lan ṭhan lengmang men mi ka si.
Kaa ruahchannak,
Nizan maw, Nihin maw, Thaizing dah...
--Nizan caan: A sungbik a si; tlamtling tein ka lim.
--Nihin caan: Ruahchannak nakin a cawlcaang mi--
'Vei mi lo' te pawl an tam deuh tawn.
--Thaizing caan: phan ing ti kaa ruahchan,
hmu ing ti kaa ruahchan, kaa ruahchan,
Ruahchannak cu thaizing ah ai hnim.
Ka zumhnak,
Lunghrinhnak hrum kaw ruahcuk-ruahcho a tho...
--Anttamci mu ngaw zumhnak--hmetuk in ka hmuh.
Keimah zumhnak, ka hmu tawn lo--deh nakin hme rua.
--Kha pawl, khi pawl hna tham cu chimthli men;
an pumpak ruahdomhnak in purh chom men;
zei an si lo cu aa, phang duh hlah,
A vei te ko lai dakaw, ka dua te.
Ka nun,
Atling ballo.
Abau peng.
Awlokchong peng.
Au-khuang peng.
"Ka u, donghnak ka hngak."
