Duhnak

"Duhnak"
© Van Ceu Lian

Duhnak—thinlung nunnak tuamtu min-can;
Dawtnak, huatnak zong kengtu ziaza, biachattu.
A runinn - thinlung, pakhat ziaza ngan aa phumnak.
A ngeitu le a petu, a kawltu le a cotu nih,
hitin an auh tawn: "a mitcaw; tuanbia; khuaruahhar;
kaakipah a um; molhnak, hruhnak, kuainak, ngaihchiatnak,
lawmhnak, nuamhnak, thlennak, le nunnak..." an ti.
Duhnak hi thinlung ziaza, thinlung nih angeih.
Thinlung hi nunnak ziaza ngan, nang le kei, ngeitu.
Nang le kei, caan nih ngeihmi, caan chung um.
Duhnak nih, dawtnak lam an hmuhsak te lai;
lungawttawm lo te'n zulte, an hruainak ah,
dawtnak an coter tik ahcun, hihi ngeitu na si:
Nunnak le a zeizong.
Duhnak—nu zong, pa zong a si—ziaza,
Thinlung ttha na ngeih lo ahcun: zawn tuk hlah,
an hlen hlai; ngamhtuk hlah, an deuh lai.
Nang, kei vawlei ah kan herh caan a tam;
lem loin, hleng loin, pel loin, thinlung innka ong usih.
TTih loin arak lut lai, lungawttawm loin arak lut lai;
Duhnak—a runinn, nang le kei thinlung.