I (Theih hngalhnak…)
Thlizil sin laam parṭha een,
Vanmi bang mi nunnak nih ham sin,
tlaantu a ngei—a par chung rimhmui thaw,
cu Tlaantu aa lawmhnak sung.
II (Pehtlaihnak…)
Na aanka khat kei ka van Ni,
Na mirh mit-hmai kei ka van Ruah,
Na Duhdawtnak kei ka van Thli,
Nang na thinlung kei ka Nunnak,
Nang na nunnak kei ka Zeizong:
Dawtnak ruhkhua khat in komhmi nang le kei;
Nang na dawtnak lo cun,
Kei ka tling hrim lo.
III (Theihthiam Lonak…)
Nang le kei kar ah
Duhnak le dawtnak kap an ngeih ti lo hnu—
Kan lung a kuai veve hnu ah
Kan tuanbia hna kei nun lilen tertu—
Minu na lo cun kei ka bau.
A kuai cia pelpawi rual he
Ip cup in ai rialmi kei ka tuarnak vialte
A thuptu ka lih-nihnak iang kha te hi
Iang kip a tlinnak ramhring lak i
Papar bantuk ceo te a si.
IV (Ṭhennak…)
Atak deumi na dawtnak nih,
capo biatak in fahnak an ka pek—
dang khat hmuhton in:
i pehtlaihnak a cah sin
mithmai sin ah mit ai sul;
nithar sin ah thinlung a hit,
cun, kei ka nunnak a chanbau.
V (Nang Loin Tling Lomi Kei…)
Van ah neh-nang ngei lomi Va bang
tlau naa zuamnak—kei ka tuarnak chung
tukforhtu ṭhalo an si—Ngaihnak cerhti nih dawpmi,
hlamnak zun, kik therhtherh tein a luang, kei pum chung ah.
Aw muihnak-par, kei ka hawi hlun
Nang chawnhbiak ah ka ra tthan;
Ka lu thlungin ka thinlung tiang
A lawnmi cinkennak ro tuanbia fung—
Par dawh na ziamh zuk thlam:
Na par nain na hmui lo,
Na uai lo nain na ṭil tho,
Khi pin hmailei tuanbia ah na lo;
Zungzal kan bia tiam kha an tar dih,
Kei, nang zuun in a rung bei ding.
VI (Chunmang le Ruahchannak sinah…)
Din loin a vaimi mang ngeitu kei.
Na thlam a hran tertu mi ralchia ka si.
Chunmang le ruahchannak a bia tawn ka bang;
Khuaza ka pel, chungmang ka zel, I nun ka bei—
Hmanhseh, thinlung di a riam lo
Chunmang le ruahchannak di lawng a riam—
A par ah, mi nahchuahtu ah ka cang.
Hmanhseh, vuivai loin cucu kai lungsak.
VII (Damnak kawlmi thinlung…)
Ka fiang. Zeipaoh nih caan an ngeih:
An caan ning tein an umkal;
Nang le kei zong caan ngei kan si,
Cun kan caan te a hmang veve mi kan si.
Hma le rung taktak he umnak cun,
K-k-kei…hmape tal um ko kun ning…
Minu
Mangttha.
