Lawmh (nak) le Lomh (nak) Hmannak
-=Lawmhnak le Lomhnak hmannak ah pumpak ruahnak=-
Laica in ṭialmi, cabia hi ka rel tawn ve hna, cu i thil pakhat ka hmuhmi cu, mi pakhat (caṭialtu) nih a lunglawmhnak le lungsaknak a langhter tikah: 'Lawmhnak' le 'Lomhnak' a hmangmi tiin an um tawn hna. Ahlei in laica lei ah 'upa deuh' kan timi ko nih hin le lai in ṭialmi cheukhat mekazin nih hin "Lomhnak" timi hi an hman tam khun. Cu nih khua a ka ruahter mi cu, "Ziah, Laimi hi kan holh le ca hi biatak tein maw aa dan hnga?" ti hi a si. Zeicahtiah cun, hi bantukin, kaa khat ah 'mah tining in'--kaa khat lei ah cu bak a si ve hoi tikah, careltu ruahnak le lungthin buaibainak te a um tawn.
A ngaingai ti ahcun, 'Lawmhnak' timi hi lung le thinlei thil kan hlawi ahcun kan hman cio dingmi a si ko. Cheukhat biatlang ka langhter hmanh hna lai:"
"...Lunglomhnak tampi ka ngei..."
"...A/an cungah lunglomhnak a um..."
"...Kaa lomh ning..." tbk.
Hi 'Lomhnak' hi 'Lawmhnak' te zohṭi tuah hnik usih:
• Law - Lawm- Lawmh
• Lo - Lom- Lomh
Law: Lai in 'law' ti biafang kan hman tik ahhin lung in thil langhter lei deuh, silole, nawlnak lei deuh ah, kan biatlang (holh) hi ṭan a la. Tc: "Khakha, hihi...cu tuahdih ta usih 'law' a ṭha hnga." Hi biatlang nih hin biahalnak ngaingai a ngei lo nain, leh a haumi a si. Cucaah, hi biatlang hi, "Aw, dih lawlaw ding si ko hen cu," tiin lehnak vun tong sehlaw, a chimtu/nawltu lungthin ah diriamnak a um hrimhrim lai. Zeicahtiah a lungduhnak a vunmi a si tikah...
Lo: Lai in 'lo' timi biafang kan hman tik ahhin biahal le bialehnak, silole, biaphihnak lei deuh ah, ṭan a la. Tc: "Kawi, tiva kal na zuam lo maw?" Hika ahhin Lo hi zoh usih. A ngaingai ti ahcun Phihlik khengtlang vel in dawh biahalnak a tuah ko cu. Ruahnak in biahalnak a tuah mi zong a si. "Kawi, tiva kal usih," tiah dingtawp in hal khawh a si. Cucaah amah zuam le zuam lo he lawng aa pehtlaimi a si. Lung le thin he zeihmanh aa pehtlai lo.
Lawm: Lawm timi cu a nuamhnak lei ah ilungsak le diriamh khi a si. Tc: Certe cu inn tiang ka va thlah caah aa lawm ngaingai. 2. Nan ka dawt caah kaa lawmtuk.
Lom: Lom timi hi saram silole minung duh an nunning chimrelnak lei lawngah hmanmi a si. Tc: Ceute te fapa pi cu a, a lom ning hi, duhbak a nung tuk.
Lomh: Lomh timi hi tutiang a hmannak ka thei rih lo.
Lawmh: Lawmh timi cu a nuamhnak lei in diriamhnak le lungsaknak 'langhternak' caah hmanmi a si. Tc: "Kawi, kadua, kan lawmh pi tuk ve..."
Cucaah cun, zeitik paoh ah lungsaknak le lungdiriamnak kan ngeihmi kan langhter duh ahcun: Lunglawmhnak hi hmang cio cang hna usih. Cuticun, kan biasih le kan biaphai zong mipi caah dotlami le cohlan awk tlakmi a pin ah, mah lungthin langhternak dik zong a si lai.
