Mi hrinṭhan (piangthar) bak ka si tiah aa ruat mi nu nih fanu pakhat te a ngeih. Zu he ai ṭhen siang ve lomi Pa Hnok te dawng he an i innpa ai. Pa Hnok zong nih cun nu he pa he telh in fa thumli cu a ngeih ve hna.
Nikhat cu Pa Hnok nih an nu tangka, an nu nih zaanlei mehhang cawknak ah a timi zanga tlap te, a ngeihchunhte, a fim mi cu zu cawknak ah a fir ai. Zu cu a va cawk--nain a tuan deuh rih tiah, zaanlei deuh ah ka din te lai tiah vamtlang ah a fim.
Inn kiangkap ahcun ralkap innka cawng ti awk cun ai hel. Cu lio ahcun an innpa nu a fanu le amah Pa Hnok fale rual cu Pa Hnok te inn ahcun lente an i celh ṭi. Ngakchia kan ti cu vai tuai luklak nak ah, vamtlang zudur cu kek put in zelṭuang ahcun an thlak tawp ko.
Pa Hnok nih cun a vun zuan hnawh colh ve hna. Zudur maan cu a hei zoh ahhin a thinlinh hi a celh lo. Nute cu a thawh i, "Ngakchia, nu si hlei i hi titi rumro in i tawlh cu dah! Nu le Pa chimhcawnpiak lo fa bantuk..." tiin bia eng cun a vun sik.
Nute a nu nih cun thei kaw a lung a fak ruam ve rua. A fanu cu, "Ka fa! A rannak in hawng lawi zokzok! Miṭha hna dawng he na vai ton cu na van a ṭha tuk lehlam! Zeiruang ko ahhme an biakmi an pathian hna cu na va hrawh piak hna! An in nawnlo le an in thah lo cu na van a ṭha--hawng lawi zokzok..." tiin Pa Hnok lehlam cu sual phawt phun in bia eng cun a zemh ve.
