Tuah dingmi cazin ah ttial
Caan kilkawi thiamnak ṭhancho ter hi lam hmuhsak tu he aa thok mi khualtlawnnak
a si. Cu bang cun, lam a thei cang mi a kan hruaitu kan zulh lo ahcun tlau a
fawi ngaingai caah, lam a kan hmuhsaktu hruai ning in kan tuah le kan zulh a
herh ngaingai ve.
Caan hi a hman zia ka thiam lo; zeihlei tuah awk bak ka hngal lo; zeibantuk
caan ahdah cucu le hihi...ka tuah lai timi ka hngal lo a timi minung hi kan tam
hringhran. Vui tampi cu keimah pumpak ka si ah, ka hawile pawl zong; zei na
tuah lai tiah kaa hal tawn, i zei na tuah lai tiah ka hal tawn hna. Lehnak ka
hmuh mi cu, "Ka thei bak lo...um sawhsawh si ko lai hih," tibaktuk
deuh lawngte a si tawn.
Zeihmanh tuah awk hngalh lonak nih hin umharnak a chuahpi. Cu umharnak cu nitin
in kan vun ton lengmang tikah zia le za khan ah an cang lan tawn, i cu nih cun
lilennak, ngaihchiatnak, thathutnak, nun i hneknak...tbk a chuahpi hna. Cu
bantuk thil kan ton lengmang tikah, minung cu, taksa lei in siseh, lung le thin
lei in siseh, thlarau lei in siseh, a ba kho mi kan si--kan nun khua a rit i
caan hi a hman nuam tawn lo.
Rian kan ṭuan le sianginn kan kai tibantuk ahcun caan hleivuang tam kan ngeih
theng ti lo caah aa rel deuh, asinain ṭuan lo caan le kai lo caan tibantuk
ahcun caan hi a lawngkang deuh tawn. Zeiti si hmanh ah, kan caan a lawngmi
chungah zei ka tuah lai ti kan hngalh lo ahcun caan kan pamhheih men khi a si.
Cucaah, dairy ah maw, silole, catlap pakhat khat chungah, cucu le hihi, khikhi
le khakha...ka tuah lai tibantuk--kan tuah ding mi kha cazin ah i khumh hna usih.
T.C: "Cu caan ahcun ca ka rel lai; inn ka thianh lai, rawl ka chum
lai...tbk.
Cazin cu a fawinak tein Zei, Zeiruang, Zeitin timi he aa
pehtlaih in khumh i zuam hna usih.
Zei:
Zei kan tuah ding mi kha cazin ah i kumh hna usih law kan
kikbawm (refrigerator) ah maw, silole, kaa khatkhat vampang tibantuk ah benh
hna usih--a kan theihtertu an si lai.
Kan tuah ding bakbak lawng cazin chungah ttial usih; a
tlawmtam kong ah buai hlah usih, nikhat hnu nikhat in kan tthangcho lai.
Caan he i rep ding in hman i zuam hna usih.
[...]
Zeiruangah:
Na duh ahcun, "Kaa phurritmi dinhdorh deuhnak
caah," na ti khawh.
TThanchonak caah..
Pumpak-dingrep tthawnternak caah..
Caan hman thiam deuhnak ding caah..
[...]
Zeitin:
Zing tin in maw silole, zanlei tin in maw, silole nitin
in dek...
Na tuah dingmi na tuah cang mi kha cafung in zah pe hna..
Na chungkhar maw, silole na hawikom he tuah ding tibantuk
i chim u...
[...]
Hi bantuk in caan hman ning kan cawn le kan thiam ahcun relrumnak cu a um
hrimhrim lai. Zarh khathnih na tuah i thlennak a um lo ruangah baang colh hlah,
a thla zong in hnuai ko. Zia le za ah an cang lanh te tikah cun nun cu a mer
zaang deuh suaumau te lai.
